تاڭ پاتشالىعى داۋىرىندە ءومىر سۇرگەن اتاقتى اقىن دۋ فۋدان ءبىر ولەڭ.

ول 712 جىلى قازىرگى قىتايدىڭ حىنان ولكەسى گۇڭشيان اۋدانىندا تۋعان. كوپ ءومىرى سەرگەلدەڭمەن وتكەن اقىن 770 جىلى 58 جاسىندا قايتىس بولادى. ونىمەن زامانداس اقىن لي ءبايدى ءبىزدىڭ شۋ جەرىندە تۋعان جوق دەپ ەدىك قوي. سول شۋ ەكى اقىننىڭ دا ولەڭدەرىنەن كەزدەسەدى. ەكەۋى جىرلاعان شۋ ءوڭىرى قازىرگى چىڭدوۋ قالاسى. ول قالادا دۋ فۋ تۇرعان جۇپىنى ءۇيدىڭ جۇرتى ءالى ساقتاۋلى. قازىر ۇلكەن مۇراجايعا، قىتايلىق اقىنداردىڭ ءتاۋ ەتەتىن جەرىنە اينالعان.

755 جىلدارى وردادا قىتايلاسقان تۇرىكتەردىڭ كوتەرىلىسىن باستاعان ءان لۋشان مەن شىسى ميىڭ دەگەن قولباسىلار تاڭ پاتشالىعىن ءبىراز ابىگەرگە سالدى، ىرگەسىن شايقادى. تاق تالاسىنىڭ كەسىرىنەن ەكەۋى قۇرعان پاتشالىق تا كوپ وتپەي جويىلدى. دۋ فۋ تۋرا سول كەزدە، كوتەرىلىس الدىندا وردادا شاعىن مانساپتى بولىپ، اۋىزى اققا جارىپ، ەندى باعى جانا باستاعان شاق ەدى. پاتشالىق الاساپىران بولعاندا قايران شايىر ءوز باسىن ساقتاۋ ءۇشىن جيھان كەزىپ كەتتى. جۇرگەن جەرىندە شاراپ ءىشىپ، ولەڭ جازدى. ءومىرى اسا اۋىر بولدى.

ءان لۋشاننىڭ شىن اتى - روحشان. 703 جىلى پارسى جەرىندە تۋعان. باتىستان تاڭ ەلىنە كەرۋەن تارتىپ كەلگەن سوعدى. وتە پىسىق، سوعدى ءبيىن عالامات بيلەيتىن جىگىت ەكەن. سونىڭ ارقاسىندا پاتشانىڭ كوزىنە ءتۇسىپ، ورداداعى بىلىكتىلەردىڭ بىرىنە اينالعان. سوڭىندا وزىنە تىلەۋلەستەردى جيناپ، پاتشالىقتىڭ استاناسى چاڭ-ان قالاسىن باسىپ الادى. ونىڭ بيلىگى ۇزاق بولمادى. 757 جىلى 29-شى قاڭتاردا ءوزىنىڭ ۇلى ان جينسۋدىڭ قولىنان ولەدى. ۇلى ونى ۇيىقتاپ جاتقاندا قىلىشتاپ ولتىرگەن.

ول ءبىر كوك تۇرىكتەرىنىڭ داۋرەنى كەتىپ، دەسىپ قايتا باستاعان ءداۋىر ەدى. وردوس الابى سوعىستىڭ قىزىل ورتىنە شارپىلعان شاق.

دۋ فۋ جىرلارىندا سوعىس تاقىرىبى ءبىراز ايتىلاتىنى سودان.

مەيمان كەلگەندە

وڭ مەن سولىم قيماستاي سۋلارى ءمولدىر كوكتەمنىڭ،
شاعالا انە كەلەدى قۇشقالى ايدىن كوكتەمىن.
جۇرگەنىم جوق سىپىرىپ قوناققا بولى ءجۇل ءۇستىن،
ءشوپ كۇركەمنىڭ ەسىگىن اشقالى شىقتىم مىرزا ءۇشىن.
جەرىمىز بۇلتاق، قالا الىس، كەلمەدى ءتۇرى تاعامنىڭ،
ءۇيىمىز كەدەي قول تارتقان وتىرعان قۇيىپ شارابىم.
كورشى قارتپەن ءبىر توست الۋعا سوقسا زاۋقىڭىز،
كەلەيىن بارىپ شاقىرىپ، بىرگە ىشەلىك ءبارىمىز...

客至

舍南舍北皆春水，但见群鸥日日来。花径不曾缘客扫，蓬门今始为君开。盘飧市远无兼味，樽酒家贫只旧醅。肯与邻翁相对饮，隔篱呼取尽馀杯。

تۇپنۇسقادان اۋدارعان ءازىمحان ءتىشانۇلى

ماتەريال ۇلاربەك دالەيۇلىنىڭ جەلىدەگى پاراقشاسىنان الىندى. 

Abai.kz