قر ۇقك شەكارا قىزمەتى مەن قازاقستان جازۋشىلار وداعىنىڭ ىنتىماقتاستىعى: اسكەري-پاتريوتتىق تاربيە جولىندا جاڭا قادام
2024 جىلدىڭ 26 قاراشاسىندا قر ۇقك شەكارا قىزمەتى جەتىسۋ وبلىسى بويىنشا دەپارتامەنتى مەن قازاقستان جازۋشىلار وداعى اراسىندا ماڭىزدى ىنتىماقتاستىق مەموراندۋمىنا قول قويىلدى.

بۇل قۇجاتتىڭ ماقساتى – شەكاراشى ساربازداردى اسكەري-پاتريوتتىق تاربيەلەۋگە، ولاردىڭ رۋحاني-ادامگەرشىلىك قۇندىلىقتارىن ارتتىرۋعا، سونداي-اق ادەبيەت پەن مادەنيەت ارقىلى جاستاردى وتانعا دەگەن سۇيىسپەنشىلىك پەن پاتريوتتىق سەزىمگە تاربيەلەۋ.

مەموراندۋمعا قر ۇقك شەكارا قىزمەتى جەتىسۋ وبلىسى بويىنشا دەپارتامەنتىنىڭ باستىعىنىڭ مىندەتىن ۋاقىتشا اتقارۋشى، پولكوۆنيك فارحاد تەمەشۇلى جالماعامبەتوۆ جانە قازاقستان جازۋشىلار وداعىنىڭ توراعاسى مەرەكە ابدەشۇلى قۇلكەنوۆ قول قويدى.

وسى كەلىسىم اياسىندا تاراپتار جاستاردىڭ اسكەري قىزمەتكە جانە مەملەكەتتىك شەكارانى كۇزەتۋگە دەگەن وتانشىلدىق سەزىمىن قالىپتاستىرۋعا باعىتتالعان ءتۇرلى شارالاردى ۇيىمداستىرۋعا كەلىسىم جاسادى.

جاڭا مەموراندۋم شەكاراشى ساربازداردى پاتريوتتىق رۋحتا تاربيەلەۋ ءۇشىن ادەبي كەشتەر ۇيىمداستىرۋدى كوزدەيدى. سونىمەن قاتار، جازۋشىلار وداعىنىڭ مۇشەلەرى شەكاراشى جاستارمەن كەزدەسىپ، ولاردى اسكەري قىزمەتتىڭ ابىرويلى مىندەتىنە باۋلىپ، ۇلتتىق قۇندىلىقتاردى ۇلىقتاۋعا كومەكتەسەدى.

سونداي-اق تاراپتار مەكتەپتەر مەن اسكەري بولىمدەردە ادەبيەت وكىلدەرىن قوناققا شاقىرىپ، ولاردىڭ شىعارماشىلىعى ارقىلى ساربازداردىڭ رۋحاني دۇنيەسىن بايىتۋدى جوسپارلاۋدا.

قول قويۋ راسىمىنە جازۋشىلار وداعى باسقارماسى توراعاسىنىڭ ورىنباسارى عالىم قاليبەكۇلى، «قازاق ادەبيەتى» گازەتىنىڭ باس رەداكتورى باۋىرجان جاقىپ جانە قر ۇقك شەكارا قىزمەتىنىڭ «چاسوۆوي رودينى – وتان ساقشىسى» اپتالىق ۆەدومستۆولىق گازەتىنىڭ مەنشىكتى ءتىلشىسى، مايور ماناربەك قارەكەنوۆ قاتىستى.

كەلەلى جيىندا ەكى تاراپتىڭ دا ىنتىماقتاستىعىنىڭ ماڭىزدىلىعى، اسىرەسە، جاس ۇرپاققا پاتريوتتىق تاربيە بەرۋدە ادەبيەتتىڭ ءرولى ەرەكشە اتاپ ءوتىلدى.

بۇل ىنتىماقتاستىق مەموراندۋمى شەكاراشى جاستاردى عانا ەمەس، جالپى قوعامدى وتانسۇيگىشتىككە تاربيەلەۋ جولىنداعى ماڭىزدى قادام بولىپ تابىلادى.

سونداي-اق، بۇل كەلىسىم ارقىلى اسكەري قىزمەتتىڭ قوعامداعى ابىرويىن ارتتىرىپ، قازاق ادەبيەتىنىڭ تەرەڭ رۋحاني كۇشىن پايدالانۋ كوزدەلگەن.

Abai.kz