بەكتەنوۆ: 5 حابتى ىسكە قوسۋ - سالىق ءتۇسىمىن ۇلعايتادى
پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ترانسشەكارالىق حابتاردى دامىتۋ ماسەلەسى قارالدى.
ساۋدا جانە ينتەگراتسيا ءمينيسترى ارمان شاققاليەۆ پرەمەر-مينيسترگە بۇگىندە اۋماقتارى تەمىرجول جانە اۆتوجولدارى: «قورعاس تورابى»، «كاسپي تورابى»، «ەۋرازيا «ترانسشەكارالىق ساۋدا ورتالىعى»، «ورتالىق ازيا» حوكو جانە يندۋستريالىق ساۋدا-لوگيستيكالىق كەشەنى ارقىلى قوسىلعان 5 ترانسشەكارالىق حابتى قالىپتاستىرۋ بويىنشا جۇمىستار جۇرگىزىلىپ جاتقانىن باياندادى. سونىمەن قاتار ماڭعىستاۋ وبلىسىنداعى اقتاۋ جانە قۇرىق پورتتارىندا كونتەينەرلىك حابتار مەن استانا، الماتى، شىمكەنت جانە اقتوبە قالالارى اۋەجايلارىندا مۋلتيمودالدى اۋە حابتارىن قۇرۋ پىسىقتالۋدا.
پرەمەر-مينيستر ينۆەستورلار ىزدەۋ جانە حابتاردىڭ ينۆەستيتسيالىق جاعىنان تارتىمدىلىعىن ارتتىرۋ جۇمىستارىن كۇشەيتۋدىڭ ماڭىزدى ەكەنىن باسا ايتتى.
«شىعىس-باتىس، سولتۇستىك-وڭتۇستىك جانە ترانسكاسپي حالىقارالىق كولىك باعىتى دالىزدەرى الەۋەتىن ءتيىمدى پايدالانۋ قاجەت. ولار قىتاي، پارسى شىعاناعى ەلدەرى، كاۆكاز جانە ەۋروپا نارىقتارىنا شىعۋدى قامتاماسىز ەتەدى.
قازاقستاندا بەس حابتى تولىق ىسكە قوسۋ جۇكتەردى وتكىزۋ ۋاقىتىن قىسقارتۋعا، ونەركاسىپ ءوندىرىسىنىڭ كولەمىن ارتتىرۋعا جانە سالىق تۇسىمدەرىن ۇلعايتۋعا مۇمكىندىك بەرەدى. سونداي-اق ينۆەستيتسيالار مەن تەحنولوگيالاردى تارتىپ، ماڭىزدى جوبالاردى ىسكە اسىرۋعا، جاڭا تۇراقتى جۇمىس ورىندارىن قۇرۋعا جول اشىلادى»، — دەپ اتاپ ءوتتى ولجاس بەكتەنوۆ.
