سۋبسيديالاۋدىڭ قاراپايىم جانە ايقىن الگوريتمى قاجەت. بۇل تۋرالى ءماجىلىستىڭ جالپى وتىرىسىندا اۋىل شارۋاشىلىعىنداعى سۋبسيديانىڭ تيىمدىلىگىنە قاتىستى اۋديت قورىتىندىسىن جاريالاۋ كەزىندە جوعارى اۋديتورلىق پالاتانىڭ توراعاسى ءاليحان سمايىلوۆ ءمالىم ەتتى.

— سۋبسيديا الۋشىلاردىڭ كوپشىلىگى مۇنداي قولداۋ شارالارىن تۇپكىلىكتى ناتيجەگە كوزدەمەي، وزدەرىنىڭ شىعىندارىن وتەۋ بويىنشا مەملەكەتتىڭ مىندەتى رەتىندە باعالايدى. سۋبسيديالاردى تولەۋ «الەۋمەتتىك سيپاتقا» يە بولىپ وتىر. مەملەكەت باسشىسى 2022 جىلعى قازاقستان حالقىنا جولداۋىندا «بيۋدجەت قاراجاتىنىڭ قايتارىمى بولۋى كەرەك. مەملەكەت قارجىنى وڭدى-سولدى شاشىپ، ىسىراپ ەتۋگە جول بەرمەيدى. سۋبسيديا بولۋگە جانە ونىڭ جۇمسالۋىنا جۇرگىزىلەتىن باقىلاۋدى كۇشەيتۋ كەرەك»، — دەپ ناقتى اتاپ ءوتتى. قارسى مىندەتتەمەلەردىڭ قاجەتتىلىگى اگروونەركاسىپ كەشەنىن دامىتۋ تۇجىرىمداماسىندا بەلگىلەنىپ، 2022 جىلدىڭ سوڭىنان باستاپ ەنگىزىلۋى كەرەك بولاتىن. ءىس جۇزىندە ولار 17 سۋبسيديا باعىتىنىڭ تورتەۋىنە عانا ەنگىزىلگەن. قارسى مىندەتتەمەلەردە ناقتى، وڭاي باقىلاناتىن كورسەتكىشتەر بولۋى كەرەك جانە سۋبسيديالاردىڭ ناتيجەلىلىگىن كورسەتۋى ءتيىس. ەڭ الدىمەن، ولار ونىمدىلىكتىڭ جوعارىلاۋىنا، ازىق-تۇلىك قاۋىپسىزدىگىن قامتاماسىز ەتۋگە ىقپال ەتۋى قاجەت، — دەدى ءا. سمايىلوۆ.

ونىڭ ايتۋىنشا، بىراق قارسى مىندەتتەمەلەردى ايقىنداۋدىڭ قولدانىستاعى تاسىلدەرى مۇنى قامتاماسىز ەتپەيدى. ولاردىڭ ورىندالۋىن تەكسەرۋ الگوريتمى قۇرىلماعان. سۋبسيديالاردىڭ 15 باعىتى بويىنشا مىندەتتەمەلەردىڭ ورىندالۋ فاكتىسىن راستايتىن ەسەپتىلىك نىساندارى جوق.

— جوسپارلاۋ كەزەڭىندە بيۋدجەتتىك سۋبسيديالاردىڭ ەكونوميكالىق اسەرىن ايقىنداۋعا اۋىل شارۋاشىلىعى مينيسترلىگى 2022 جىلى عانا كىرىسكەن. الايدا بارلىق باعىتتى قامتىمادى. بۇل رەتتە، مال شارۋاشىلىعى جانە وسىمدىك شارۋاشىلىعىنداعى بيۋدجەتتىك سۋبسيديالاردىڭ ەكونوميكالىق اسەرىنىڭ كورسەتكىشى جاي عانا ءوندىرىس كولەمىنىڭ وسۋىمەن شەكتەلەدى. بۇل اۋىل شارۋاشىلىعىنداعى ساپالى وزگەرىستەردى كورسەتپەيدى، — دەدى اۋديتورلىق پالاتانىڭ توراعاسى.

Abai.kz