ۆيتسە-پرەمەر جىلىوي، ماحامبەت اۋداندارىندا، قۇلسارى، اتىراۋ قالالارىندا بولىپ، ەلدى مەكەندەردى ۇلكەن سۋدان قورعاۋ جۇمىستارىن تەكسەردى.

جىلىوي اۋدانىندا قامىسكول كولىنىڭ جاعالاۋى نىعايتىلۋدا. جەم وزەنىنىڭ ارناسى 23 شاقىرىم جانە قۇرساي كانالى 35 شاقىرىم تەرەڭدەتىلگەن. نىساندارعا 100-دەن استام تەحنيكا جۇمىلدىرىلدى.  قۇلسارى قالاسىندا قانات بوزىمباەۆ تۇرعىندارمەن كەزدەسىپ، سۋ تاسقىنىنان زارداپ شەككەندەر ءۇشىن سالىنعان تۇرعىن ءۇيدىڭ ساپاسىن تەكسەردى. ماحامبەت اۋدانىندا جايىق وزەنىنىڭ بويىنداعى جاعالاۋدى نىعايتۋ جۇمىستارىن تەكسەردى.

ماحامبەت اۋىلىندا 4,5 شاقىرىمعا سوزىلعان جاعالاۋ نىعايتىلىپ، ماحامبەت جانە سارىتوعاي اۋىلدارى اراسىنداعى كوپىر قۇرىلىسى اياقتالدى. اۋىل ىشىندەگى جول جوندەلۋدە.

اتىراۋدا قالا ماڭىنداعى تالعايران، اقجار جانە ەركىنقالا اۋىلدارىندا قورعانىس بوگەتتەرى سالىنۋدا. المالى اۋىلىندا «سارىوزەك» كانالىنىڭ بويىنداعى 5,6 شاقىرىم بوگەتتەر نىعايتىلىپ، جايىق وزەنىنىڭ بويىندا ۇزىندىعى 2,5 شاقىرىم جاڭا جاعالاۋ بەكىتكىشتەرى سالىنىپ جاتىر.

Abai.kz