سوڭعى ەكى جىلدا وبلىس بيۋدجەتىنىڭ باسىم بولىگى اۋداندارداعى اۋىل حالقىنىڭ تۇرمىس دەڭگەيى مەن ءال-اۋقاتىن ارتتىرۋعا باعىتتالدى. ەندى الداعى ەكى جىلدا وبلىس ورتالىعىن دامىتۋعا ەرەكشە كوڭىل بولىنەتىن بولادى. وسىعان بايلانىستى 2025-2026 جىلدارعا قالا بيۋدجەتىن ورتا ەسەپپەن 30%-عا ۇلعايتۋ جوسپارلانىپ وتىر.

بۇل تۋرالى بۇگىن تالدىقورعان قالاسىنىڭ تۇرعىندارىمەن كەزدەسۋى كەزىندە وبلىس اكىمى بەيبىت يساباەۆ مالىمدەدى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىس اكىمى ءوز بايانداماسىندا قالا باسشىلىعىنا قىسقا مەرزىمدە الداعى ەكى جىلعا ارنالعان كەشەندى دامۋ جوسپارىن بەكىتۋدى تاپسىردى.

- ەڭ الدىمەن تۇرعىن ءۇي قۇرىلىسىنا، ينجەنەرلىك ينفراقۇرىلىمدى جاڭعىرتۋعا، سونىڭ ىشىندە جىلۋ، سۋمەن جابدىقتاۋ، سۋ بۇرۋ، گازبەن جابدىقتاۋ جەلىلەرىنە جانە جول قۇرىلىسىنا باستى نازار اۋدارىلۋى ءتيىس. سونداي-اق، اۋلالاردى اباتتاندىرۋ، تۇرعىن ۇيلەردىڭ قاسبەتتەرى مەن شاتىرلارىن جاڭارتۋ، كوشەلەردى جارىقتاندىرۋ جۇمىستارىن جالعاستىرۋ قاجەت. جالپى تالدىقورعاندى تۇرعىندار ءۇشىن جايلى، ءارى قولايلى قالاعا اينالدىرۋىمىز كەرەك. اسىرەسە قالانىڭ شەتكى ايماقتارىندا تۇراتىن ازاماتتار زامانعا ساي، جايلى تۇرمىس جاعدايلارىن سەزىنۋى ءتيىس، - دەدى ب. يساباەۆ.

Abai.kz