باتىستىق باسىلىمداردا، قارۋلى قاقتىعىستاردى زەرتتەۋ ينستيتۋتتارىندا كۋرسك وبلىسىنداعى ۇرىستارعا قاتىستى ۆيدەو، فوتو دالەلدەمەلەر وتە كوپ. سولاردى كۇندەلىكتى كىم نە جازدى، نە سالدى دەپ قاراپ وتىرامىن.

كۋرسك وبلىسىنداعى شايقاستاردا كحدر اسكەرى شايقاسىپ جاتىر عوي. ۆيدەولاردان كحدر اسكەرى جايلى تۇسىنگەنىم مىناۋ:

1. ساربازدارى رۋحسىز ەمەس. بۇيرىقتى قارسىلىقسىز ورىندايتىن سياقتى.موتيۆاتسيا بار. مۇمكىن ول ءتىرى قايتۋعا جانتالاس، مۇمكىن اقشا، مۇمكىن سولتۇستىك كورەيادا قالعان وتباسىنىڭ جاعدايىن ويلاۋ.

2. تۇتقىنعا تۇسپەۋگە تىرىسادى. ءبىر-ەكى جاعدايدا عانا تۇتقىن الىندى. ونىڭ ءوزى اۋىر جارالىلار، اقپارات بەرە الماي ءولىپ كەتتى. ال رەسەيلىكتەردىڭ وزدەرى كۋرسكتە تۇتقىنعا كوپ بەرىلەدى.

3. زاماناۋي قارۋدى قولدانۋدان قيىندىقتارى بار. وزدەرى شىعارعان ەسكى 1970-80 جىلعى پۋلەمەت، اۆتوماتتاردى قولدانىپ ءجۇر.

4. درونداردان قورعانۋ ينستينكتى ءالى تولىق قالىپتاسا قويماعان. رەسەيلىكتەر دروننىڭ دىبىسى ەستىلسە بولدى، قاشىپ، تىعىلۋ جولىن ىزدەيدى. قاي باعىتتان ۇشىپ كەلە جاتقانىن بىلەدى. قورعانۋ بويىنشا دا بىرقاتار تاجىريبە بار، مىسالى ءبىر ادام بىرنەشە قورعانىس جيلەتىن جامىلىپ جاتا قالادى نەمەسە بەتوننىڭ استىنا جاسىرىنۋعا تىرىسادى دەگەندەي. ال كحدر ساربازدارى كوپ جاعدايدا درون كەلىپ سوعىلعانشا قاقيىپ تۇرا بەرەدى. قورعانۋدى بىلمەيدى، قۇر جاتا قالادى. ءبىر ۆيدەودا درون كەلىپ سوعىلعانعا دەيىن 100-گە جۋىق سارباز ساپتا تۇرعانىن كوردىم.

5. ءتيىستى فورما بەرىلمەگەن سياقتى نەمەسە تىم از بەرىلگەن. اق قارلى القاپتا، قار باسقان اشىق دالادا جازدىق جاسىل اسكەري فورمامەن جۇگىرىپ ءجۇر. قىستىق كامۋفلياج نەگە بەرىلمەگەنىن تۇسىنبەدىم.

6. بروندى تەحنيكامەن كحدر اسكەرىنىڭ شابۋىلىن قولداۋ جاعى ءالسىز. كوبىنە ءبىر-ەكى بروندى تەحنيكامەن نەمەسە مۇلدە تەحنيكا قولداۋىنسىز شابۋىلعا شىعادى. ارينە ونداي ساتتە شىعىن كوپ بولادى.

7. ءتىلدى ءتۇسىنۋ جانە اۋدارما جاعىنان قيىندىق بار سياقتى. گەوگرافيانى مەڭگەرۋ دە قيىنعا سوعىپ جاتىر. ءبىر شابۋىلدا قاتە باعىتتا جۇگىرىپ كەتكەن، ونى رەسەيلىك ساراپشىلار دا ايتتى.

شايقاستاردا كحدر اسكەرى قىرىلىپ جاتىر. جارالىلارى كوپ. بىراق بارىندە رف اسكەرىنىڭ قۇجاتى بار.

اسحات قاسەنعاليدىڭ جەلىدەگى جازباسى

Abai.kz