بۇگىنگى كۇننىڭ اقپاراتى: برازيليا بۇعان دەيىن رەسەيلىك اۋە قورعانىسى اتىپ ءتۇسىردى دەپ بولجانعان AZAL ۇشاعىنىڭ «قارا جاشىكتەرىن» دەكودتاۋدى اياقتادى. مالىمدەمەدە رەيستى تىركەۋشى ەكى قۇرىلعىدان دەرەكتەردى الۋ جۇمىسى سەنبى كۇنى اياقتالىپ، بارلىق دەرەكتەر قازاقستاننىڭ تەرگەۋ ورگاندارىنا تاپسىرىلعانى ايتىلعان.

اقتاۋ ماڭىندا اپاتقا ۇشىراعان ۇشاقتىڭ قارا جاشىگىن قازاقستان وسىعان دەيىن برازيلياداعى «اۋە اپاتتارىن زەرتتەۋ جانە ولاردىڭ الدىن الۋ ورتالىعىنا» (CENIPA) جىبەرگەن ەدى. ازەربايجانعا تيەسىلى جولاۋشىلار ۇشاعى باكۋدەن گروزنىيدى بەتكە الىپ ۇشىپ، اپاتتى جاعدايدا اقتاۋعا بۇرىلعان. ۇشاق اقتاۋ اۋەجايىنىڭ ماڭىنا جەتەر-جەتپەس جەرگە 2024 جىلدىڭ 25 جەلتوقسانىندا قۇلاعان.

قۇرىلعى برازيلياعا 1 قاڭتاردا جەتكىزىلگەن، ەرتەسىندە مالىمەتتەردى ساراپتاۋ باستالعان.

رەسمي اقپاراتتا: مالىمەت جازاتىن ەكى قۇرىلعىداعى دەرەكتەردى جيناۋ جانە تەكسەرۋ 4 قاڭتاردا اياقتالعان. دەرەكتەردى سارالاۋ تۋرالى اقپارات قازاقستانعا جىبەرىلگەن.

«الىنعان مالىمەتتەر وقيعانىڭ سەبەپتەرىن انىقتايتىن ورگان – قازاقستاننىڭ اۋە اپاتتارىن تەرگەۋ كوميسسياسىنا جىبەرىلەدى»، - دەلىنگەن رەسمي اقپاراتتا.

كەشە ازەربايجان پرەزيدەنتى يلحام اليەۆ اقتاۋدا قۇلاعان ۇشاق اپاتىنا قاتىستى رەسەيدى ايىپتاپ، مالىمدەمە جاساعان ەدى.

اليەۆ:

- ۇشاق اپاتىنا كىنالىلەر جازالانۋى ءتيىس! بۇل اپاتتان ازەربايجان ازاماتتارىنىڭ قازا بولۋىنا رەسەي فەدەراتسياسىنىڭ وكىلدەرى كىنالى دەپ سەنىممەن ايتا الامىن. ءبىز ادىلدىكتى تالاپ ەتەمىز، كىنالىلەردىڭ جازالانۋىن تالاپ ەتەمىز، تولىق اشىقتىق پەن ادامي مىنەز-قۇلىقتى تالاپ ەتەمىز، - دەدى.

Abai.kz