1. ەگەمەندىك العالى، وسى كۇنگە دەيىن بارلىق مۇمكىندىكتەردى تەك بايۋعا سالۋ، قىسقا مەرزىمدە جەكە باستىڭ جانە كىشكەنتاي اينالىسىنىڭ بايۋىنا، ماقسات-مۇددەسىنە سالۋ، بۇرىنعى جۇيەنىڭ، بيلىكتىڭ، ەسكى قازاقستاننىڭ نەگىزگى يدەولوگياسى بولدى.

نەگىزگى يدەولوگيا – كوررۋپتسيا، ۇرلاۋ بايۋ. قازاق حالقى الداندى. اكادەميك س.زيمانوۆتان باستاپ ىزگىلىكتى جولدى قانشا جازساق تا، ايتساق تا تىڭدامادى. كەرىسىنشە قىسىم، قيانات جاسالدى. اكادەميك ق.ساتباەۆ باستاپ قۇرعان مەملەكەتتىك ۇلتتىق عىلىم اكادەمياسىن جاۋىپ تاستاۋ، عىلىمنىڭ تامىرىنا بالتا شابۋ، پروگرەسسكە جول جوق دەگەن ءسوز… ق.ك.توقاەۆ «ۋكازبەن» «قر ۇعا-نى مەملەكەتتىك» جاسادى، عىلىمدى قايتاردى.

2. ءندى ءبىز تەك وسىنداي كەلەڭسىزدىكتەن باس تارتىپ، جاڭا ءبىلىمدى، عىلىمنىڭ جەتىستىگىن ىسكە اسىرۋ ارقىلى رۋحاني كەمەلدەنۋگە، قوعامدى ىزگىلەندىرۋگە، ۇلى اباي ايتقانداي ءماندى «ەڭبەك پەن اقىلعا» سالساق، ەكەۋى الىپ شىعار ەكى جاقتاپ. قالعانى كەلەدى، حالىقتىڭ كۇن-كورىس دەڭگەيى، جاعدايى كوتەرىلەدى. ءالى دە ات توبەلىندەي ازعانتاي حالىققا بايلىعىمىز شاش ەتەكتەن. تەك ك.ماركس ايتپاقشى 100-1000% بۇرىنعىداي ۇرلاۋدى قويساق، كوررۋپتسياعا بالتا شابىلسا ءومىر تۇزەلەدى.

3. عالىم رەتىندە ايتايىن. الدىمىزدا رۋحاني رەۆوليۋتسيا تۇر: ول ينتەللەكتۋالدى ەكونوميكا، نەيروتەحنولوگيا، جاساندى ينتەللەكت، قوعامدى گۋمانيزاتسيالاۋدان، ت.ب. مىنە، ەندى ءبىزدىڭ كەلەشەگىمىز وسىلاردى يگەرۋگە بايلانىستى. الدىمىزدا جاڭا وركەنيەت عاسىرى، جاڭا فورماتسيا، ينتەگرالدى قوعام، گۋمانيتارلىق نووسفەرالىق تسيۆيليزاتسيا ەسىك قاعىپ تۇر. ول بۇكىل ادامزاتتىڭ بىرىگۋىمەن ىسكە اسادى. بىزدە سونىڭ ىرگەسىنە ءبىر كىرپىش بولىپ قالانۋىمىز كەرەك. سوندا عانا ءبىزدىڭ تۇركى تەگىمىزدىڭ ەۋرازيا قۇرىلىعىندا ەڭ جوعارعى ۇلى يمپەريا بولعانىمىزدى ەكىنشى رەت الەمگە دالەلدەۋىمىز مۇمكىن!

4. جوبا جاسالدى، قىسقاشا ايتسام. ول ءۇشىن ەۋرووداق (ەس) سياقتى تۇركى تەگى (تت) وداعىن قۇرۋ كەرەك. تۋركىستاندا تۇركى تىلدەس 220 ملن. حالىقتىڭ وكىلدەرىمەن، ۇلى جىبەك جولىندا (ۇجج) 1-ءشى رەت الەمنىڭ تۇركى تىلدەس حالىقتارىنىڭ «تۇركى تەگى قۇرىلتايىن» وتكىزۋ كەرەك. 6 مەملەكەت باسشىلارىمەن شەشىم جاساپ «تۇركىستان-تۇران دەكلاراتسياسىن»، قابىلداپ، تۇركى تەگى وداعىن قۇرۋ». ستراتەگيالىق ماقسات – ۇجج-دا تۇركى تىلدەس حالىقتارىنىڭ رۋحاني، مادەني-تاريحي جاڭعىرۋى ارقىلى الدىمىزداعى الەمدىك جاڭا وركەنينەتكە ۇلەس قوسۋ.

تۇركى تەگى (ت.ت. ) وداعىنىڭ تۇپكى ماقساتى – ەۆرازياداعى بارلىق تۇركى تىلدەس ەلدەردى، حالىقتاردى ينتەگراتسيالاپ، بىرلىگىن قالىپتاستىرۋ ارقىلى ولاردىڭ وركەنيەتىن، تاريحي، مادەني، ءدىني،ەتنيكالىق قۇندىلىقتارىن ،ءتىلىن،جەرىن، اۋىل-ايماعىن، جالپى ەكونوميكاسىن ساقتاۋ جانە دامىتۋ جۇيەسىن جاساپ، الەمدە باسەكەلەس وركەنيەتتى دامىعان حالىقتاردىڭ بىرەگەيى بولۋ!

ورازالى سابدەن،

قر مەملەكەتتىك سىيلىعىنىڭ لاۋرەاتى، اكادەميك

Abai.kz