ۇلتتىق بانك 2025 جىلى ينفلياتسيانى تومەندەتۋ ءۇشىن 70 توننا التىن ساتىپ الۋدى جوسپارلاپ وتىر. بۇل تۋرالى بانكتىڭ سايتىندا جازىلعان. 

ۇلتتىق بانك جوسپارىنشا، 2024 جىلدىڭ ءتورتىنشى توقسانىندا اففيناجدالعان التىندى تەپە-تەڭ ساتىپ الۋ ءۇشىن 2025 جىلعى ءبىرىنشى توقساندا شەتەل ۆاليۋتاسىن شامامەن 750 ملرد تەڭگەگە ساتادى.

«تەپە-تەڭدىك وپەراتسيالارى التىن-ۆاليۋتا رەزەرۆتەرىنىڭ كولەمىنە اسەر ەتپەيتىنىن اتاپ وتكەن ءجون، سەبەبى التىن ساتىپ الۋ بيرجادا ۆاليۋتانى ساتۋمەن وتەلەدى. ساتىلعان ۆاليۋتالاردىڭ كولەمى رەسمي سايتتا اي سايىن جاريالانادى»، – دەيدى ۇلتتىق بانك.

2011 جىلى ەنگىزىلگەن نورما بويىنشا، ۇلتتىق بانك قازاقستانداعى التىن ءوندىرۋشى كاسىپورىنداردان التىن ساتىپ الۋدى باستاعان. ونى قازاقستاننىڭ التىن-ۆاليۋتا رەزەرۆتەرىن تولىقتىرىپ، التىن ءوندىرۋ سالاسىن دامىتۋعا باعىتتالادى دەپ تۇسىندىرەدى.

«ەلدە اففيناجدالعان التىن قۇيمالارىن ءوندىرۋ كولەمى ايتارلىقتاي ۇلعايدى. بۇل جاڭا كومپانيالارعا حالىقارالىق دەڭگەيدە تانىلۋعا مۇمكىندىك بەردى. مىسالى، «تاۋ-كەن التىن» جشس اففيناج زاۋىتى لوندون باعالى مەتالدار نارىعى قاۋىمداستىعىنىڭ قۇيما ساپاسىنا ءتان حالىقارالىق ستاندارت بويىنشا اككرەديتتەۋدەن ءوتتى»، – دەپ جازىلعان رەتتەۋشى حابارلاماسىندا.

2024 جىلدىڭ سوڭىنا قاراي التىن-ۆاليۋتا رەزەرۆىندەگى التىن كولەمى تاريحي ەڭ جوعارى كورسەتكىش – 45,8 ملرد دوللارعا جەتكەن. بىراق التىن باعاسى مەن ونى ءوندىرۋ كولەمى ءوسۋى ەلدەگى ينفلياتسياعا تەرىس اسەر ەتە باستاعان.

ەندى رەتتەۋشى التىندى ساتۋ ارقىلى تۇسكەن دوللاردى ىشكى ۆاليۋتا نارىعىندا ساتۋعا شەشىم قابىلداعان. مۇنى ەلدەگى ينفلياتسيانى 5%-دىق نىسانالى دەڭگەيگە تومەندەتۋ ماقساتىندا جاساپ وتىر.

Abai.kz