"ەۋروپانىڭ ەڭ سوڭعى ديكتاتورى" اتانعان بەلارۋس پرەزيدەنتى لۋكاشەنكو 87.6% داۋىسپەن جەتىنشى رەت تاعى دا پرەزيدەنت بولدى" دەپ جازادى فرانس پرەس اگەنتتىگى. سايلاۋدى ءادىل وتكەن ەتىپ كورسەتۋ ءۇشىن لۋكاشەنكو ەجەلگى قۋلىعىنا باسىپ، قولدان ءتورت كانديدات دايىنداپ، وزىمەن "باسەكەلەستىرگەن".

ەۋرووداقتىڭ سىرتقى ىستەر حاتشىسى سايلاۋدان ءبىر كۇن بۇرىن: "30 جىل بيلىكتى بەرمەگەن ديكتاتور لۋكاشەنكو كەزەكتى ساياسي قويىلىمىندا تاعى دا جەڭىسكە جەتپەكشى. بۇل دەموكراتيانى قورلاۋ" دەدى. وپپوزيتسيا جەتەكشىسى تيحانوۆسكايا  "ونى بيلىكتى مونوپيالاپ العان قىلمىسكەر" دەپ اتاپ، قاماۋداعى ساياساتكەرلەردى بوساتىپ، ءادىل سايلاۋ وتكىزۋگە شاقىردى. رەسمي دەرەك بويىنشا لۋكاشەنكونىڭ كەسىرىنەن ساياسي سەبەپتەرگە بايلانىستى 300 مىڭ ادام شەتەلگە بوسىپ كەتكەن. 1200 ادام ساياسي كوزقاراسىنا بايلانىستى تۇرمەدە قامالعان. جەكسەنبىدە وتكەن سايلاۋدان كەيىن ەۋرووداق وعان سالىنعان سانكتسيالاردى تاعى دا قاتايتاتىنىن مالىمدەدى.

الدىنعى جولعى پرەزيدەنت سيلاۋىندا لۋكاشەنكو ۇلكەن قارسىلىققا تاپ بولىپ، ەرەۋىلشىلەردى اياۋسىز جانىشتادى. سودان باستاپ ءبىر جولاتا كرەملگە بەت بۇردى. پۋتين ۋكرايناعا باسىپ كىرگەندە قولداۋ ءبىلدىرىپ، ورىس اسكەري بازالارىن، ستراتەگيالىق قارۋلارىن ءوز جەرىنە ورنالاستىرۋعا رۇقسات بەردى. جەكسەنبى كۇنى دە رەسەيدىڭ دىبىستان جىلدام وقتۇمسىقتارىن ءوز جەرىندە ورنالاستىراتىنىن تاعى دا ايتتى. ول ءۇشىن "ەش وكىنبەيمىن" - دەدى.

لۋكاشەنكو بيلىك قۇرعان 30 جىلدا ەل ەكونوميكاسى ايتارلىقتاي العا جىلجىمادى. كەڭەس كەزىندەگىدەي كارتوپ پەن ءسابىز، تراكتور - لۋكاشەنكونىڭ شەتەلدىكتەرگە ماقتاناتىن، سىيعا تارتاتىن برەندتەرى بولىپ كەلەدى.

30 جىل بيلىكتى بەرمەي، 7 كەزەك سايلانعان 70 جاستاعى لۋكاشەنكو بيلىككە وتىرۋ مەرزىمى جاعىنان ءوزى قولتىعىنىڭ استىنا كىرگەن ءپۋتيندى دە جولدا قالدىردى.

Abai.kz