ءماجىلىس دەپۋتاتتارى، «AMANAT» پارتياسى فراكتسياسىنىڭ مۇشەلەرى اۆتوكولىكپەن جولاۋشىلار تاسىمالداۋ سالاسىنداعى مەملەكەتتىك فۋنكتسيالاردىڭ ءبىر بولىگىن ءوزىن-ءوزى رەتتەۋگە بەرۋ تۋرالى تۇزەتۋلەردى قارادى. بۇگىندە ءتيىستى زاڭ جوباسى ماجىلىستە قارالۋدا.

كولىك ءمينيسترى مارات قاراباەۆ وسى زاڭ جوباسىن تانىستىرا وتىرىپ، اتالعان قۇجات جولاۋشىلار تاسىمالى سالاسىندا ءتارتىپ ورناتۋعا مۇمكىندىك بەرەتىنىن اتاپ ءوتتى. نارىققا قاتىسۋشىلار ءوزىن-ءوزى رەتتەۋ تەتىكتەرى ارقىلى تاريف بەلگىلەۋ، ەڭبەك كۇنىن ساقتاۋ، تەحنيكالىق بايقاۋدان وتكىزۋ، جولاۋشىلار تاسىمالىنىڭ قاۋىپسىزدىگىن قامتاماسىز ەتۋ سىندى پروبلەمالاردى وزدەرى شەشەتىن بولادى. ۇسىنىلعان نوۆەللالار تاكسي اگرەگاتورلارىنىڭ باعا بەلگىلەۋ ىسىندەگى اشىقتىعىن جاقسارتۋعا، سونداي-اق نارىق قاتىسۋشىلارى ءۇشىن ءادىل باسەكە مەن تەڭ جاعداي جاساۋعا مۇمكىندىك بەرەدى.

تالقىلاۋ بارىسىندا بىرقاتار دەپۋتات ۇسىنىلعان زاڭ جوباسىندا ءوزىن-ءوزى رەتتەيتىن ۇيىمداردىڭ جول قوزعالىسى قاۋىپسىزدىگىن قامتاماسىز ەتۋگە قاجەت جەتكىلىكتى رەسۋرسى مەن وكىلەتتىگى جوق دەگەن الاڭداۋشىلىق ءبىلدىردى. سونىمەن قاتار، نەگىزگى فۋنكتسيالاردى جەكە بىرلەستىكتەردىڭ شەكتەۋلى سانىنا بەرۋ قادامى نارىقتى مونوپوليالاۋعا، باعا كەلىسىمىنىڭ پايدا بولۋىنا جانە وسى سالا نەگىزگى تابىس كوزى بولىپ وتىرعان 500 مىڭنان استام تاكسي جۇرگىزۋشىسىنىڭ قارجى جۇكتەمەسىنىڭ ارتۋىنا اسەر ەتۋى مۇمكىن.

ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ تالقىلاۋ بارىسىن قورىتىندىلاي كەلە، بۇگىندە جولاۋشىلار تاسىمالى سالاسىن رەتتەۋدە جاڭا كوزقاراستى تالاپ ەتەتىن كوپ پروبلەما قوردالانىپ قالعانىن اتاپ ءوتتى. مينيسترلىك ۇسىنعان شارالار تۇسىنىكتى ءارى نازار اۋدارۋعا لايىق بولعانىمەن، بۇل ۇسىنىستار مەملەكەت تاراپىنان جۇرگىزىلەتىن كولىك باقىلاۋىن السىرەتىپ الماۋى كەرەك. ول جولداعى قاۋىپسىزدىكتى قامتاماسىز ەتۋ، سونىڭ ىشىندە جولاۋشىلاردىڭ ءومىرىن ساقتاندىرۋ بويىنشا ناقتى مىندەتتەمەلەردى زاڭدا تىكەلەي بەكىتۋ قاجەت ەكەنىن جەتكىزدى.

«پرەزيدەنت حالىققا جولداۋىندا جول قاۋىپسىزدىگىن قامتاماسىز ەتۋدى تاپسىردى. مينيسترلىك وسىعان قاتىستى ماسەلەلەردى شەشۋگە مۇمكىندىك بەرەتىن دالەلدى ءارى جان-جاقتى پايىم-كوزقاراسىن ورتاعا سالدى.  سولاي بولا تۇرا، تاسىمالداۋ سالاسىنداعى ءوزىن-ءوزى رەتتەۋگە ۇمتىلامىز دەپ تاكسي جۇرگىزۋشىلەرىنىڭ كۇندەلىكتى تابىسىنا تەرىس اسەر ەتپەۋىمىز كەرەك. مينيسترلىك بارلىق جاڭاشىلدىقتى تاكسي سالاسىندا جۇمىس ىستەيتىن ازاماتتاردىڭ پىكىرىن ەسكەرە وتىرىپ ۇسىنۋعا ءتيىس. بارلىق داۋلى ماسەلەنىڭ ورتاق شەشىمىن تابۋ كەرەك. ءبىز كۇن سايىن ميلليونداعان ادامعا تىكەلەي اسەر ەتەتىن جولاۋشىلار تاسىمالى سالاسىنداعى الەۋمەتتىك شيەلەنىستى جويۋىمىز كەرەك»، – دەدى ول.

ءماجىلىس توراعاسى زاڭ جوباسىنا قاتىستى ماسەلەلەردى ەسكەرە وتىرىپ، مينيسترلىككە ءوزىن-ءوزى رەتتەۋ ۇيىمىنىڭ جۇمىسىنا پيلوتتىق تەستىلەۋ جۇرگىزۋدى جانە سونىڭ ناتيجەسى نەگىزىندە وسى ماسەلە بويىنشا تىڭ تاسىلدەر ازىرلەۋدى ۇسىندى.

سونىمەن قاتار، پىكىرتالاس بارىسىندا دەپۋتاتتار ىشكى ىستەر ۆيتسە-ءمينيسترى يگور لەپەحاعا ازاماتتاردى اداستىراتىن رەزونانستىق اقپاراتقا جەدەل ارەكەت ەتۋدىڭ ماڭىزىن اتاپ ءوتتى. ماسەلەن، اۆتوكولىكتى بەس مينۋتتان ارتىق قىزدىرعانى ءۇشىن ايىپپۇل سالىناتىنى ايتىلۋدا.

«اۆتوكولىكتى 5 مينۋتتان ارتىق قىزدىرۋعا شەكتەۋ جوق. ەلدى مەكەندەردە تۇرعىندارعا قولايسىزدىق تۋعىزعان جاعدايدا مەحانيكالىق كولىك قۇرالدارىمەن وتالدىرعان قالپى توقتاپ تۇرۋعا تىيىم سالىنادى. تەك ارىز تۇسكەن جاعدايدا عانا بۇل نورما بويىنشا جاۋاپقا تارتامىز. بىلتىر وسىنداي ءۇش جاعداي تىركەلىپ، ونىڭ ءبىرى پروكۋراتۋرا تاراپىنان جويىلدى. ياعني، ءبىز كولىك قىزدىرعان ادامدى جاۋاپقا تارتپايمىز»، – دەپ سەندىردى ۆيتسە-مينيستر.

سونداي-اق فراكتسيا وتىرىسىنا باسەكەلەستىكتى قورعاۋ جانە دامىتۋ اگەنتتىگىنىڭ، قر «اتامەكەن» ۇكپ-نىڭ باسقارما باسشىلىعى جانە تاعى باسقالار قاتىستى.

Abai.kz