قازاقستان وپەك + كەلىسىمىنە ادالدىعىن راستاپ، وسىعان دەيىن ۋادە بەرگەن مىندەتتەمەلەرىن تولىق ورىندايدى. بۇل تۋرالى ەنەرگەتيكا مينيسترلىگى ايتتى، دەپ حابارلايدى. 

«تەڭىز كەن ورنىن كەڭەيتۋ جونىندەگى جوبانىڭ ىسكە قوسىلۋىنا بايلانىستى بيىل ءوندىرىستىڭ ۇلعايۋىنا قاراماستان، قازاقستان وپەك+ كەلىسىمى شەڭبەرىندە مىندەتتەمەلەردى ساقتاۋدىڭ ماڭىزدىلىعىن راستايدى جانە حالىقارالىق قۇقىق شەڭبەرىندە ارىپتەستەرمەن كەلىسسوزدەر جۇرگىزەتىن بولادى»، – دەپ جازىلعان ۆەدومستۆو سايتىندا.

وعان سايكەس، قازاقستان 2024 جىلعا ارتىق ءوندىرىستى وتەۋى كەرەك جانە 2025-2026 جىلدارى بەلگىلەنگەن شارت اياسىندا عانا مۇناي ءوندىرۋى ءتيىس.

قازاقستان وپەك+ ۇيىمىنا مۇشە بولعالى بەرى مۇناي ءوندىرىسىن كەلىسەتىن بولعان. بىراق سوڭعى جىلدارى ۇيىم شەڭبەرىندەگى مىندەتتەمەسىن بىرنەشە رەت بۇزىپ، كەلىسكەن كولەمنەن دە ارتىق مۇناي ءوندىردى. بىلتىر قاڭتار-قازان ايلارىندا قارا التىندى 1,11 ملن باررەلگە ارتىق شىعاردى.

Abai.kz