"تسيفرلىق تەحنولوگيالار ارقىلى ءبىز ازاماتتاردىڭ كۇندەلىكتى ءومىرىن بارىنشا جەڭىلدەتۋگە جانە بارلىعىنا تەڭ مۇمكىندىكتەرگە قول جەتكىزۋگە نيەتتىمىز. ول ءۇشىن مەملەكەتتىك باسقارۋدى تسيفرلاندىرۋدىڭ ساپالى جاڭا فورماتىنا كوشۋ كەرەك. ونىڭ ءمانى مەملەكەتتىك ساياساتتىڭ باستى باعىتى ادامعا، ونىڭ قاجەتتىلىكتەرى مەن مۇددەلەرىنە باعىتتالعاندىعىندا", – قر پرەزيدەنتى قاسىم-جومارت توقاەۆ.

2024 جىلى قازاقستان مەملەكەت باسشىسىنىڭ تاپسىرماسىن ىسكە اسىرۋدا ايتارلىقتاي ناتيجەلەرگە قول جەتكىزدى. تسيفرلىق ترانسفورماتسيانىڭ نورماتيۆتىك جانە ادىسنامالىق نەگىزدەرى ازىرلەندى، ساراپتامالىق بازا قالىپتاستىرىلدى جانە ءتۇرلى سالالاردا اۋقىمدى رەفورمالار ىسكە قوسىلدى.

تسيفرلىق ترانسفورماتسيانىڭ نەگىزگى قۇرالدارىنىڭ ءبىرى بيزنەس-پروتسەستەردى قايتا قۇرۋ بولدى. 1200-دەن استام مەملەكەتتىك ۇدەرىستەردى قايتا قاراۋ ناتيجەسىندە 23 مەملەكەتتىك ورگاندا 468 بيزنەس-ۇدەرىس وڭتايلاندىرىلدى، بۇل ولاردىڭ ورىندالۋ مەرزىمىن ورتا ەسەپپەن 45%-كە قىسقارتۋعا مۇمكىندىك بەردى.

اتاپ ايتقاندا، اۋىل شارۋاشىلىعى مينيسترلىگىندە 98 پروتسەستىڭ رەينجينيرينگى قىزمەت كورسەتۋ مەرزىمىنىڭ 55%-كە قىسقارۋىنا اكەلدى. ىشكى ىستەر مينيسترلىگى مەن ۇلتتىق ەكونوميكا مينيسترلىگىندە بۇل كورسەتكىش سايكەسىنشە 55% جانە 85%-دى قۇرادى.

جىلدىڭ باستى جەتىستىگى مەملەكەتتىك قىزمەتتەردى تسيفرلاندىرۋ دەڭگەيىن ارتتىرۋ بولدى. بۇۇ دەرەكتەرىنە سايكەس، قازاقستان ونلاين-قىزمەتتەر يندەكسى بويىنشا توپ-10 ەلدىڭ قاتارىنا كىرىپ، تسيفرلاندىرۋ دەڭگەيى بويىنشا 193 مەملەكەتتىڭ ىشىندە 24-ءشى ورىندى يەلەندى.

بۇگىنگى تاڭدا حالىقتىڭ 93%-تەن استامى eGov پورتالى ارقىلى ەلەكتروندىق قىزمەتتەرگە قول جەتكىزە الادى. مەملەكەتتىك قىزمەتتەردىڭ 90,8%-ءى سمارتفوندار ارقىلى قولجەتىمدى. بيومەتريالىق سايكەستەندىرۋ مەن QR-قولتاڭبالاردى ەنگىزۋ ەلەكتروندىق قىزمەتتەردى الۋ پروتسەسىن جەڭىلدەتتى — ءبىر جىل ىشىندە قازاقستاندىقتار QR-كودتار ارقىلى 23 ميلليوننان استام قۇجاتقا قول قويدى.

قازاقستانداعى تسيفرلىق ترانسفورماتسيا مەملەكەتتىك قىزمەتتەردى نەعۇرلىم قولايلى، قولجەتىمدى جانە ءتيىمدى ەتۋگە باعىتتالعان.

قازاقستاندىقتار ءۇشىن ناقتى پايداسىن كورسەتكەن بىرنەشە تسيفرلىق شەشىمدەرگە توقتالعىمىز كەلەدى.

ازاماتتاردىڭ ءومىرىن جاقسارتقان تسيفرلىق شەشىمدەردىڭ مىسالدارى:

• ساندىق اسكەري بيلەت قاعاز قۇجاتتارىن تولىعىمەن اۋىستىردى.

• بالاباقشالارعا ونلاين تىركەلۋ ۆاۋچەرلىك قارجىلاندىرۋ جۇيەسىنىڭ ارقاسىندا پروتسەستى اشىق ەتتى.

• "ەۋروپالىق حاتتامانى" ەنگىزۋ ساقتاندىرۋ تولەمدەرىن الۋ مەرزىمىن 40 كۇننەن 5 كۇنگە دەيىن قىسقارتىپ، پوليتسيانىڭ قاتىسۋىنسىز جكا رەسىمدەۋگە مۇمكىندىك بەردى.

• اتقارۋشىلىق ءىس جۇرگىزۋدى اۆتوماتتاندىرۋ ازاماتتارعا قارجىلىق جۇكتەمەنى ازايتا وتىرىپ، جەكە سوت ورىنداۋشىلارىنىڭ قاتىسۋىن بولدىرمادى.

• تسيفرلاندىرۋ بالاباقشالارعا، مەكتەپتەرگە، جوعارى وقۋ ورىندارى مەن جاتاقحانالارعا ءتۇسۋدى جەڭىلدەتتى، سونداي-اق دەنساۋلىق ساقتاۋ، الەۋمەتتىك قورعاۋ جانە تىركەۋ قىزمەتتەرىندەگى پروتسەستەردى وڭتايلاندىردى.

2025 جىلى 44 مەملەكەتتىك قىزمەتتىڭ مەرزىمىن قىسقارتۋ، 20 مەملەكەتتىك قىزمەتتى پرواكتيۆتى فورماتقا اۋىستىرۋ، سونداي-اق 35 مەملەكەتتىك قىزمەتتى ترانسفورماتسيالاۋ جوسپارلانعان.

تسيفرلىق ترانسفورماتسيانىڭ ناتيجەلەرى بۇگىندە ميلليونداعان قازاقستاندىقتار ءۇشىن ايقىن. ءاربىر جوبا مەملەكەتتىك قىزمەتتەردىڭ ىڭعايلىلىعىن، اشىقتىعىن جانە قولجەتىمدىلىگىن ارتتىرۋعا باعىتتالعان. تسيفرلاندىرۋ دەڭگەيىن ارتتىرۋ ءبىلىم بەرۋگە، دەنساۋلىق ساقتاۋعا جانە الەۋمەتتىك قىزمەتتەرگە قولجەتىمدىلىكتى جاقسارتادى، ولاردى ىڭعايلى جانە ءادىل ەتەدى. قازىر كوپتەگەن مەملەكەتتىك قىزمەت ونلاين-فورماتتا، كەزەكسىز جانە قوسىمشا بيۋروكراتيالىق راسىمدەرسىز قولجەتىمدى.

Abai.kz