وتكەن جۇما كۇنى «AMANAT» پارتياسىنىڭ بازاسىندا ۇكىمەتتىڭ وڭىرلىك ساياسات جونىندەگى جوبالىق كەڭسەسى ساراپتامالىق ورتالىعى اشىلدى. ول «اكىمدەر مەكتەبى» جوباسىن جۇزەگە اسىرۋمەن، باسقارۋ پروتسەستەرىن تسيفرلاندىرۋمەن، اۋداندىق جانە اۋىلدىق وكرۋگ اكىمدەرىنە ەكونوميكالىق دامۋ باعدارلامالارىن ىسكە اسىرۋعا كومەكتەسۋمەن اينالىسادى. ورتالىقتىڭ جۇمىسىمەن ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ تانىستى. ءىس-شاراعا پرەمەر-ءمينيستردىڭ ورىنباسارى قانات بوزىمباەۆ قاتىستى.

فوتو: ءالي عالىم

بەلگىلى بولعانداي، مەملەكەت باسشىسى قاسىم-جومارت توقاەۆ جاقىندا وتكەن ۇكىمەتتىڭ كەڭەيتىلگەن وتىرىسىندا تىكەلەي سايلانعان اكىمدەردىڭ جاڭا ساناتى – سايلانبالى باسقارۋشىلار پايدا بولعانىن اتاپ ءوتتى. ولاردىڭ اراسىندا مۇعالىمدەر، دارىگەرلەر جانە مەملەكەتتىك قىزمەتتە تاجىريبەسى جوق باسقا دا ماماندار بار. سوندىقتان پرەزيدەنت «AMANAT» پارتياسىنىڭ تاجىريبەسىن ەسكەرە وتىرىپ، «اكىمدەر مەكتەبى» وقۋ جوباسىن ىسكە قوسۋدى تاپسىردى.

 «اكىمدەردى تىكەلەي سايلاۋ – بۇل پرەزيدەنتتىڭ نەگىزگى رەفورمالارىنىڭ ءبىرى، ەلدى ودان ءارى دەموكراتيالاندىرۋ جولىنداعى ۇلكەن قادام. قوعام سايلانعان اكىمدەرمەن بىرگە وزەكتى ماسەلەلەردى شەشۋگە بەلسەندى تۇردە كىرىسە باستادى. سايلاۋدا جەڭىسكە جەتكەندەردىڭ باسىم كوپشىلىگى – ءبىزدىڭ پارتيانىڭ وكىلدەرى. ەندى ولاردىڭ باستى مىندەتى – سايلاۋشىلاردىڭ سەنىمىن اقتاۋ. مەملەكەت باسشىسىنىڭ تاپسىرماسىنا سايكەس، پارتيا ۇكىمەتپەن بىرلەسىپ، سايلانعان اكىمدەردى جاڭا قۇزىرەتتەرگە، زاڭدارمەن جانە بيۋدجەتپەن جۇمىس ىستەۋگە ۇيرەتەتىن بولادى. مۇنىڭ بارلىعى حالىقتىڭ ءومىر ءسۇرۋ ساپاسىن جاقسارتۋ ءۇشىن كۇندەلىكتى جۇمىستا كومەكتەسەدى»، – دەدى ەرلان قوشانوۆ.

فوتو: ءالي عالىم

ءماجىلىس سپيكەرى اۋىلدى جان-جاقتى دامىتۋ – مەملەكەت باسشىسىنىڭ ساياساتىنىڭ باسىمدىعى ەكەنىن اتاپ ءوتتى. وسىعان بايلانىستى وتكەن جىلى «AMANAT» پارتياسى ەلدىڭ بارلىق وڭىرلەرىندە جاڭادان سايلانعان اۋىل اكىمدەرىنىڭ فورۋمدارىن وتكىزدى. بۇل ءىس-شارالارعا وبلىس اكىمدەرى قاتىسىپ، سايلانعان باسشىلاردىڭ العاشقى جۇمىس قورىتىندىلارى جاسالدى. اۋىل اكىمدەرىنىڭ وكىلەتتىكتەرىن كەڭەيتۋ، سونىڭ ىشىندە ولاردىڭ بيۋدجەتتەرىن ۇلعايتۋ بويىنشا ۇسىنىستار ازىرلەندى. اتاپ ايتقاندا، ەندى اۋىل اكىمى كوشە ساۋداسى، قوعامدىق ورىنداردى رەتتەۋ ماسەلەلەرىن اكىمشىلىك تۇرعىدان باسقارا الادى، سونداي-اق اۋىل بيۋدجەتىنە جەكە جانە زاڭدى تۇلعالاردىڭ مۇلىك، جەر، كولىك سالىقتارى تۇسەدى.

ءوز كەزەگىندە ۇكىمەتتىڭ وڭىرلىك ساياسات جونىندەگى جوبالىق كەڭسەسىن باسقاراتىن ۆيتسە-پرەمەر قانات بوزىمباەۆ اۋىلدىق اكىمدەردىڭ دەربەستىگىن كۇشەيتۋ بويىنشا جۇيەلى شارالار قابىلداناتىنىن اتاپ ءوتتى. تسيفرلاندىرۋ ارقىلى اكىمدەر بىرىڭعاي اقپاراتتىق جۇيەلەرگە قول جەتكىزىپ، تۇرعىنداردىڭ سانى، مال باسى، جەكە قوسالقى شارۋاشىلىقتاردىڭ جاعدايى جانە باسقا دا پارامەترلەر بويىنشا تولىق ستاتيستيكالىق اقپاراتقا يە بولادى. ۆيتسە-پرەمەردىڭ ايتۋىنشا، اكىمدەردە جەتكىلىكتى قارجىلىق قۇرالدار بولۋى ماڭىزدى، سوندا ولار قاجەتتى ناتيجەگە قول جەتكىزە الادى.

فوتو: ءالي عالىم

«AMANAT» پارتياسى باستاماشىلىق ەتكەن جانە ۇكىمەت پەن مەملەكەتتىك قىزمەت ىستەرى اگەنتتىگى بىرلەسىپ ىسكە اسىرىپ وتىرعان «اكىمدەر مەكتەبى» جوباسى 2400-دەن استام اۋداندىق جانە اۋىلدىق وكرۋگ اكىمدەرىن قامتيدى. وقۋ كۋرسى، باسقا دا تاقىرىپتارمەن قاتار، اۋىلدىق وكرۋگتەردىڭ ەكونوميكالىق دامۋ باعدارلامالارىن ازىرلەۋ جانە ولاردى تاجىريبەدە قولدانۋ ادىستەمەسىن ۇيرەتۋگە باعىتتالعان. اكىمدەر ءوز اۋىلدارىنىڭ ەكونوميكالىق مامانداندىرىلۋىن انىقتاۋدى، سونداي-اق ءونىم وندىرۋدەن باستاپ، ونى سەرتيفيكاتتاۋ مەن ساتۋعا دەيىنگى تىكەلەي تىزبەكتى قۇرۋدى ۇيرەنەدى.

فوتو: ءالي عالىم

«قارىزسىز قوعام» جوباسىنىڭ اتقارۋشى ديرەكتورى ولجاس ورداباەۆ قازاقستاندىقتاردىڭ قارجىلىق ساۋاتتىلىعىن ارتتىرۋ بويىنشا اتقارىلعان جۇمىستاردىڭ ناتيجەلەرىمەن جانە الداعى جوسپارلارمەن ءبولىستى. سوڭعى ەكى جىل ىشىندە 840 مىڭ ادام وقىتۋدان ءوتتى، ونىڭ ىشىندە 70 مىڭى زاڭگەرلىك كومەك الدى. ەندى جوبانى كەڭەيتۋ ماقساتىندا وفلاين وقىتۋمەن قاتار، كۋرستار ونلاين فورماتتا دا قولجەتىمدى بولادى. سونىمەن قاتار زاڭگەرلىك كەڭەستى مىندەتتى وقۋسىز الۋعا مۇمكىندىك تۋادى، ال حالىقتىڭ ىڭعايلىلىعى ءۇشىن «قارىزسىز قوعام» جوباسىنىڭ call-ورتالىعى اشىلادى.

مامىر ايىنىڭ سوڭىنا دەيىن ۇكىمەتتىڭ وڭىرلىك ساياسات جونىندەگى جوبالىق كەڭسەسى «AMANAT» پارتياسىمەن بىرلەسىپ، ەلدەگى بارلىق اۋىلدىق وكرۋگتەردىڭ ەكونوميكالىق دامۋ باعدارلامالارىن ازىرلەيدى جانە اكىمدەردى ولاردىڭ باعدارلامالارىن ىسكە اسىرۋ بارىسىندا سۇيەمەلدەيتىن بولادى. سونداي-اق ورتالىق جەكە قوسالقى شارۋاشىلىقتاردا وندىرىلگەن ونىمدەردى سەرتيفيكاتتاۋ جانە ولاردى ۇيىمداستىرىلعان ساتىپ الۋلار مەن ساۋدا جەلىلەرى ارقىلى ساتۋ ماسەلەلەرىمەن اينالىسادى.

«AMANAT» پارتياسىنىڭ ءباسپاسوز قىزمەتى

Abai.kz