12-اقپاندا بەلگىلى پەدياتر، قازاقستانداعى بالالار حيرۋرگياسىنىڭ نەگىزىن قالاعان كامال ورمانتاەۆ 88 جاسىندا قايتىس بولدى. بۇل تۋرالى ونىڭ ۇلى جاراس ورمانتاي Facebook-تەگى پاراقشاسىندا حابارلادى.

"بۇگىن تۇندە ارداقتى اكەم، قازاقستانداعى بالالار حيرۋرگياسىنىڭ نەگىزىن قالاۋشى اكادەميك كامال ورمانتاەۆ ومىردەن وزدى", – دەپ جازدى ول.

كامال ورمانتاەۆ 1936-جىلى قىزىلوردا وبلىسى قارماقشى اۋدانىندا دۇنيەگە كەلگەن. ورمانتاەۆ – حيرۋرگ، عىلىم دوكتورى، پروفەسسور، اكادەميك. ءار جىلدارى پەدياتريا جانە بالالار حيرۋرگياسى عىلىمي ورتالىعىن باسقارعان.

عىلىمي ەڭبەكتەرىنىڭ دەنى بالالار حيرۋرگياسىنا ارنالعان. باس پەن ميعا جاسالاتىن وتانىڭ جاڭا ادىستەرىن تاجىريبەگە ەنگىزگەن. وسى سالادا عىلىمي مەكتەپتىڭ نەگىزىن قالاعان. ءوز سالاسىنداعى 50-گە جۋىق اۆتورلىق كۋالىك جانە پاتەنت يەسى. ونداعان مىڭ وتا جاساعان دارىگەر.

1990-جىلداردىڭ باسىندا ول «ازات» ازاماتتىق قوزعالىسى جەتەكشىلەرىنىڭ ءبىرى بولعان، حالىقتىق-دەموكراتيالىق پارتيانى قۇرىپ، باسقارعان.

Abai.kz