ەلىمىزدە جىلدان جىلعا اقىلى جولداردىڭ سانى ارتىپ جاتىر. الايدا قۇن تولەپ، قالتاسى جۇقارعان جۇرگىزۋشىلەر قارجىسىنىڭ قايدا جۇمسالىپ جاتقانىن بىلمەيدى. كوپشىلىكتىڭ كوكەيىندەگى بۇل ساۋالعا كولىك مينيسترلىگىنىڭ وكىلى جاۋاپ بەردى.

— بىزدە «QazAvtoJol» ۇلتتىق وپەراتورى بار. جول پايدالانۋشىلارىنان تۇسكەن قاراجاتتىڭ بارلىعى سول ۇلتتىق كومپانيانىڭ ارنايى ەسەپشوتىنا تۇسەدى. جولداردىڭ ءبارى مەملەكەت مەنشىگى. ودان تۇسكەن قاراجات تا 100% ۇكىمەتكە تيەسىلى. ۇلتتىق وپەراتور ول قارجىنى جولدى كۇتىپ ۇستاۋعا، قاجەتتى تەحنيكالاردى الۋعا نەمەسە باسقا دا شىعىندارعا جۇمساپ وتىرادى. ودان باسقا نارسەگە جاراتىلمايدى، — دەيدى اۆتوموبيل جولدارى كوميتەتىنىڭ باسقارما باسشىسى.

مينيسترلىك وكىلى وتكەن جىلى اقىلى جولدان قازىناعا 48 ملرد تەڭگە تۇسكەنىن ايتتى.

— بۇل قاراجاتتىڭ 70%-ى اقىلى جولداردى نورماتيۆكە سايكەس كۇتىپ ۇستاۋعا جۇمسالدى. ول جولداردى كۇتىپ ۇستاۋعا قىستى كۇنى قار شىعاراتىن، جازدا جولداعى قوقىستى تازالايتىن تەحنيكا قاجەت قوي. قالعان 30%-ىنا قاجەتتىلىككە بايلانىستى وسىنداي تەحنيكالار ساتىپ الىندى. بيىل قوسىمشا 4 مىڭ شاقىرىمعا جۋىق اقىلى جولدار ەنگىزەمىز. ولاردىڭ جالپى ۇزىندىعىن 7 مىڭ شاقىرىمعا دەيىن جەتكىزۋ جوسپارلانىپ وتىر، — دەيدى عابيت شىمىرباەۆ.

كولىك مينيسترلىگىنىڭ بيىلعى جوسپارىنا سايكەس اقىلى جولدان تۇسەتىن اقشا 60 ميللياردقا جەتپەك. ال كەلەر جىلى 100 ميلليارد تەڭگە جينالۋى مۇمكىن دەگەن بولجام جاساپ وتىر. عابيت شىمىرباەۆ جيىلعان قارجى ارتىلىپ قالسا، قايدا جاراتىلاتىنىن دا جاسىرمادى.

— ازىرگە اقىلى جولداردان تۇسكەن قارجى تەك جولداردى كۇتىپ ۇستاۋ جۇمىستارىنا عانا جەتىپ جاتىر. قولدانىستاعى زاڭناماعا سايكەس، قاراجات كەزەڭ-كەزەڭىمەن جۇمسالادى. 1-كەزەكتە جولدى كۇتىپ ۇستاۋعا، 2- كەزەكتە تەحنيكا الۋعا، ەگەر دە وسى ەكى شىعىننان قاراجات ارتىلىپ جاتسا، جاڭا جولدار سالۋدى جوسپارلاپ وتىرمىز، — دەيدى ول.

Abai.kz