جەتىسۋ وبلىسىندا ءۇشىنشى قانت زاۋىتىنىڭ قۇرىلىسىن جۇرگىزۋ تۋرالى ينۆەستورلارمەن كەلىسىمدەر جاسالۋدا. سونىڭ ناتيجەسىندە 1 ملن. تونناعا دەيىن قانت قىزىلشاسىن وڭدەۋگە مۇمكىندىك تۋادى.

بۇل تۋرالى وبلىس اكىمى بەيبىت يساباەۆ «Jetisy» تەلەارناسى ستۋدياسىندا وبلىستىق باق وكىلدەرىنە بەرگەن كەڭەيتىلگەن سۇحباتى بارىسىندا ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

سۋرەت: جەڭىس ىسقاباي / وبلىس اكىمى ءباسپاسوز قىزمەتىنىڭ ارحيۆىنەن الىندى.

- بيىل كوكسۋ قانت زاۋىتىنا 60 ملن ەۆروعا مودەرنيزاتسيالىق جاڭارتۋ جۇمىستارى جۇرگىزىلەدى. سول ارقىلى زاۋىتتىڭ جىلدىق قۋاتتىلىعى 500 مىڭ تونناعا جەتەدى. ال اقسۋ قانت زاۋىتىنىڭ قۋاتتىلىعى - 350-400 مىڭ توننا. سوندا قازىردىڭ وزىندە 800-900 مىڭ توننا قىزىلشا وڭدەۋگە قابىلەتىمىز بار. جەتىسۋ جەرىنىڭ قۇنارى جەتكىلىكتى. وعان قوسا سۋارۋ جۇيەلەرىن جاڭعىرتىپ، سۋارمالى جەرلەردىڭ كولەمىن ارتتىرامىز. سول كەزدە قانت قىزىلشاسىنىڭ كولەمىن 1 000 000 تونناعا جەتكىزۋگە مۇمكىندىگىمىز بار. مۇنداي مول ءونىمدى ءۇشىنشى قانت زاۋىتىن ىسكە قوسساق، وزىمىزدە تولىقتاي وڭدەي الامىز، - دەدى ب.يساباەۆ.

ەسكە سالساق، بىلتىر جەتىسۋ وبلىسىندا 13 مىڭ گەكتار جەردەن 630 مىڭ توننا قانت قىزىلشاسى جينالدى. بۇل - تاۋەلسىزدىك العان جىلداردان بەرگى العاشقى مول ءونىم. ورتاشا كورسەتكىش گەكتارىنا 450-500 تسەنتنەردەن اينالدى.  وبلىس اكىمىنىڭ ايتۋىنشا، مۇنداي ۇلكەن كورسەتكىشتىڭ ارتىندا وتە اۋقىمدى جۇمىس جاتقانىن انىق. ال وتكىزۋدەگى ۋاقىتشا قيىندىق جامبىل وبلىسىنداعى ديقانداردىڭ جاعدايىنا بايلانىستى تۋىنداعان. جامبىل وبلىسىنان 100 مىڭ توننا قانت قىزىلشاسىن قابىلداپ، اقسۋ قانت زاۋىتىنا وڭدەۋگە الىنعان.

سۋرەت: جەڭىس ىسقاباي / وبلىس اكىمى ءباسپاسوز قىزمەتىنىڭ ارحيۆىنەن الىندى.

بيىلعى جىلدىڭ جوسپارلارىنا توقتالعان ءوڭىر باسشىسى اۋىل شارۋاشىلىعى ونىمدەرىن وڭدەۋگە كوپ كوڭىل بولىنەتىنىن اتاپ ءوتتى. وسى ماقساتتا وبلىستا قۇس فابريكاسىن جانە جۇگەرى وڭدەيتىن زاۋىت سالۋ تۋرالى ينۆەستورلارمەن جۇمىس جۇرگىزىلىپ جاتىر.

جالپى وڭىردە وندىرىلەتىن قانت قىزىلشاسى، جۇگەرى، بيداي، ەت، ءسۇت سياقتى اۋىل شارۋاشىلىعى تاۋارلارىنىڭ 65%-ى وزىمىزدە وڭدەلەدى. وتكەن جىلى اۋىل شارۋاشىلىعىنداعى ءوسىم 3% بولدى.

Abai.kz