تۇركى دۇنيەسىنىڭ باق-تارى اقش پەن رەسەي كەلىسسوزىن «كۇيەۋ جىگىتسىز وتكەن ۇيلەنۋ تويىنا» بالادى.

رەسەي «زاڭسىز پرەزيدەنت» سانايتىن زەلينسكي اقش-رەسەي كەلىسسوزدەرىنە نە دەپ جاۋاپ قاتتى دەگەن ساۋالعا جاۋاپ ىزدەدىك.

ساۋديادا «قارعانىڭ كوزىن قارعا شۇقمايدى» بولىپ جاتقاندا، تۇركياعا ۋكراينا پرەزيدەنتى زەلەنسكي رەسمي ساپارمەن كەلىپ، انكارادا ءوز ەلىنىڭ ەلشىلىگىنىڭ جاڭا عيماراتىنىڭ سالتاناتتى اشىلۋىن وتكىزدى. بەيبىتشىلىك پەن قاۋىپسىزدىككە كەپىلدىك بەرۋ تۋرالى سويلەگەن زەلەنسكي تۇركيانىڭ ۋكراينا-رەسەي سوعىسىنداعى ديپلوماتيالىق كۇش-جىگەرىنە العىس ءبىلدىردى.

«ءبىز سوعىستىڭ اياقتالعانىن قالايمىز، بىراق قاۋىپسىزدىكتىڭ كەپىلى قاجەت»

زەلەنسكي: «ولار سوعىستى توقتاتقىسى كەلەتىنىن مالىمدەيدى. بۇل بەلگىلى ءبىر قاۋىپسىزدىك كەپىلدىكتەرىنە نەگىزدەلۋى ءتيىس! ءبىز بۇل كەپىلدىكتەردى بۇكىل ەۋروپادان، سونىڭ ىشىندە اقش-تان، ەۋروپالىق وداقتان جانە تۇركيادان ىزدەيمىز»، - دەدى تۇركيا پرەزيدەنتى رەجەپ تايىپ ەردوعانمەن كەزدەسۋدە.

ءارى قاراي: «كيەۆ ەشقاشان رەسەيدىڭ ۋلتيماتۋمىنىڭ جەتەگىندە كەتپەيدى»، - دەپ مالىمدەدى ۋكراينا پرەزيدەنتى زەلەنسكي.

زەلەنسكي ءوز سوزىندە: «ۋكراينا ەڭ قيىن كۇندەردىڭ وزىندە رەسەي قويعان ۋلتيماتۋمعا كونبەدى. قازىر نەگە كونە قالۋى كەرەك؟ رەسەي 2022 جىلى بىزگە ۋلتيماتۋم قويىپ: اسكەردى قىسقارتۋدى، وككۋپاتسيالانعان اۋماقتاردى رەسەيدىكى دەپ مويىنداۋدى تالاپ ەتتى. ۋكراينا رەسەيدىڭ ايتقانىمەن جۇرەتىن «قۋىرشاق» پرەزيدەنت قويعىسى كەلدى.

قازىر قانداي دا ءبىر كەلىسسوزدەر ءوتىپ جاتىر. ول كەلىسسوزدەر اقش پەن رەسەي اراسىندا وتۋدە. رەسەيلىكتەر ءماز ءجۇر. ۋكراينا جايلى ۋكرايناسىز تالقىلاۋدا. ءبىز ونى ەلەمەيمىز. ءبىز ەڭ قيىن كۇندەردە رەسەيدىڭ ۋلتيماتۋمىنا كونبەگەنبىز، قازىر دە كونبەيمىز»، - دەدى.

ءسوز تۇيىنىندە زەلەنسكي: «مەن ۋكراينا پرەزيدەنتى رەتىندە ەشكىمگە ەشتەڭەگە ەمەكسىتە كەپىلدىك بەرگەن جوقپىن. ونىڭ ۇستىنە رەسەيدىڭ ۋلتيماتۋمىنىڭ جەتەگىندە كەتپەيمىز. مەن وعان پسىقىرىپ تا قارامايمىن»، - دەدى.

ءابىل-سەرىك الىاكبار

Abai.kz