قازاقستاندا 8 مىڭعا جۋىق ورتا ءبىلىم بەرۋ ۇيىمىندا 400 مىڭعا جۋىق پەداگوگ جۇمىس ىستەيدى. قر وقۋ-اعارتۋ مينيسترلىگىنىڭ مالىمەتىنشە، ولاردىڭ 300 مىڭعا جۋىعى اتتەستاتسيا قورىتىندىسى بويىنشا بىلىكتىلىك ساناتتارى ءۇشىن ۇستەمەاقى الادى.

2020 جىلدان باستاپ پرەزيدەنت تاپسىرماسىنا سايكەس، پەداگوگتەردىڭ ايلىق ەڭبەكاقىسى 100%-عا ءوستى. سونداي-اق 2023 جىلدىڭ قىركۋيەگىنەن باستاپ مەكتەپكە دەيىنگى ءبىلىم بەرۋ ۇيىمدارىنىڭ تاربيەشىلەرىنىڭ جالاقىسى 30%-عا ارتتى. ال تەحنيكالىق جانە كاسىپتىك ءبىلىم بەرۋ ۇيىمدارىنا كاسىپورىنداردان تارتىلعان ماماندارعا 30-35 % كولەمىندە ۇستەمەاقى قوسىلدى.

«پەداگوگ مارتەبەسى تۋرالى» زاڭ قابىلدانعاننان كەيىن، مۇعالىمدەردىڭ جالاقىسىنىڭ مولشەرى ءبىلىمىنىڭ، ساناتىنىڭ (شەبەر، زەرتتەۋشى، ساراپشى، مودەراتور) دەڭگەيىنە جانە ەڭبەك وتىلىنە، جۇكتەمە كولەمىنە، سونداي-اق ەڭبەك ەتۋ جاعدايىنا بايلانىستى قوسىمشا تولەمدەر، اكادەميالىق دارەجەسىنىڭ بولۋى (10 اەك), تالىمگەرلىك ەتۋى، ساباقتان تىس سپورتتىق دارىستەر بەرۋىنە (بازالىق لاۋازىمدى ەڭبەكاقىدان 100%) بايلانىستى قالىپتاسادى.

وسىلايشا، ءتۇرلى ساناتتارىنىڭ بولۋىنا بايلانىستى پەداگوگتەرگە كەلەسىدەي ۇستەمەاقى تولەنەدى:
* پەداگوگ-شەبەر – 50%
* ⁠پەداگوگ-زەرتتەۋشى – 40%
* ⁠پەداگوگ-ساراپشى – 35%
* ⁠پەداگوگ-مودەراتور – 30%

اۋىل مۇعالىمدەرىنە ەرەكشە كوڭىل بولىنۋدە – ولاردىڭ جالاقىسى قالالىق ارىپتەستەرىنە قاراعاندا، كەمىندە 25%-عا جوعارى.

2024 جىلدىڭ قورىتىندىسى بويىنشا قازاقستاندا مۇعالىمنىڭ ورتاشا ايلىق جالاقىسى 1 مولشەرلەمە ءۇشىن (16 ساعات) 352 مىڭ تەڭگە، ال اۋىل مۇعالىمدەرى ءۇشىن 435 مىڭ تەڭگەنى قۇرادى. بۇل رەتتە ۇلتتىق ءبىلىم بەرۋ دەرەكتەر بازاسىنىڭ مالىمەتىنشە، ەلىمىزدىڭ پەداگوگتەرىنىڭ جارتىسى 1,5 مولشەرلەمەمەن (24 ساعات) جۇمىس جاساپ، ايىنا ورتاشا 581 مىڭ تەڭگە جالاقى الادى.

سونىمەن قاتار، قازاقستان ءبىلىم بەرۋ ىسىندەگى جەتىستىكتەرى، وليمپيادا جۇلدەگەرلەرىن دايىنداعانى جانە مەملەكەتتىك ناگراداعا يە بولعانى ءۇشىن اقشالاي سىياقىمەن ماراپاتتاۋدى ۇردىسكە اينالدىرعان ساناۋلى ەلدەردىڭ ءبىرى. 2023 جىلى 89 پەداگوگ مەملەكەتتىك سىياقىنىڭ لاۋرەاتى اتاندى، سىياقى كولەمى 3,6 ملن تەڭگەنى (1000 اەك) قۇرادى. ماراپاتتالۋشىلاردىڭ اراسىندا – ەڭبەك ەرلەرى، قازاقستاننىڭ ەڭبەك سىڭىرگەن ۇستازدارى، «ۇزدىك پەداگوگ» بايقاۋىنىڭ جەڭىمپازدارى بار.

وسىلايشا، سوڭعى بەس جىلدا قازاقستان ايلىق جالاقىنىڭ ءوسۋىن عانا ەمەس، ۇستەمەاقى تولەۋ جانە ىنتالاندىرۋ جۇيەسىن قامتاماسىز ەتۋ ارقىلى پەداگوگتەردىڭ مارتەبەسى مەن قارجىلىق الەۋەتىن كوتەرۋ باعىتىندا ماڭىزدى باستامالاردى جۇزەگە اسىردى.

Abai.kz