2024 جىلى كوكتەمدە ەلدىڭ تەڭ جارتىسىن قىزىل سۋ باسىپ، اۋىر زارداپتار اكەلگەن ەدى. بۇگىنگى ۇكىمەت وتىرىسىندا پرەمەر-مينيستر ولجاس بەكتەنوۆ مەملەكەتتىك ورگاندارعا تاسقىنعا دايىندىقتى كۇشەيتۋدى تاپسىردى.

«سۋ تاسقىنى كەزەڭىنىڭ باستالۋىنا دا كوپ ۋاقىت قالعان جوق. ەلىمىزدىڭ بىرقاتار وڭىرلەرىندە قار كۇرت ەري باستادى. سولتۇستىكتە ءالى بوران سوعىپ تۇر. سوندىقتان كوكتەمگى سۋ تاسقىنىنا دايىن بولۋىمىز كەرەك. اكىمدەر بۇل ماسەلەنى ەرەكشە باقىلاۋعا الۋى قاجەت. توتەنشە جاعداي تۋرالى حالىقتى حاباردار ەتەتىن بارلىق جۇيەلەردىڭ تۇراقتى جۇمىسىن قامتاماسىز ەتىڭىزدەر»، - دەدى ول.

ۇكىمەت باسشىسى الەۋمەتتىك جەلىلەر مەن باق-تا ءتۇسىندىرۋ جۇمىستارىن كۇشەيتۋ ماڭىزدى ەكەنىنە دە توقتالدى.

«توتەنشە جاعدايلار مينيسترلىگى سۋ تاسقىنىنا تولىعىمەن دايىن بولۋعا ءتيىس. سونداي-اق، ورتالىق جانە جەرگىلىكتى مەملەكەتتىك ورگانداردىڭ جۇمىسىن ۇيىمداستىرسىن»، - دەدى ولجاس بەكتەنوۆ.

الداعى اۋا رايىنىڭ بولجامى تۋرالى ەكولوگيا جانە تابيعي رەسۋرستار ءمينيسترى ەرلان نىسانباەۆ تولىق مالىمەت بەردى. ونىڭ سوزىنشە، ەل اۋماعىنىڭ 71 پايىزىن قار جامىلعان.

«بۇل وتكەن اپتاعا سالىستىرعاندا 15 پروتسەنتكە از. ەلىمىزدىڭ وڭتۇستىگىندەگى قىزىلوردا، تۇركىستان، جامبىل وبلىستارىندا، باتىسىنداعى باتىس قازاقستان، اتىراۋ، ماڭعىستاۋ وبلىستارىندا قار ەرىپ جاتىر. ناۋرىز ايىندا تەمپەراتۋرانىڭ كوتەرىلۋىمەن جاڭبىر تۇرىندەگى قاتتى جاۋىن-شاشىن بولعان جاعدايدا تاۋ وزەندەرىندە ەرىگەن قار سۋىنىڭ اسەرىنەن جوعارى تاسقىن ءجۇرۋى مۇمكىن. ورتالىق، سولتۇستىك جانە شىعىس ايماقتاردا قار جينالۋ ءۇردىسى جالعاسىپ جاتىر. ناۋرىز ايىندا جاۋىن-شاشىن مولشەرى ايلىق نورمادان ەكى جانە ودان دا كوپ ءتۇسۋى كۇتىلۋدە. مىسالى، استانادا ايلىق جاۋىن-شاشىن مولشەرى ءبىرىنشى ونكۇندىكتە عانا ءتۇسىپ ۇلگەردى. ناۋرىز جانە ءساۋىر ايلارى ادەتتەگىدەن جىلىراق بولادى دەپ كۇتىلۋدە. سونداي-اق ەلىمىزدىڭ باسىم بولىگىندە جاۋىن-شاشىن مول بولادى»، – دەدى مينيستر. 

ۆەدومستۆو باسشىسى بۇل كوكتەمنىڭ تەز كەلۋىنە جانە سۋ تاسقىنى قاۋپىنىڭ ارتۋىنا ىقپال ەتەتىنىن ايتتى.

سۋ تاسقىنى قاۋپى جوعارى ايماقتار – اقتوبە، قوستاناي، ۇلىتاۋ، اباي، قاراعاندى، اقمولا، سولتۇستىك قازاقستان جانە شىعىس قازاقستان وبلىستارى. قاۋىپتىلىگى ورتاشا ايماقتار – الماتى، جەتىسۋ، جامبىل، باتىس قازاقستان، اتىراۋ وبلىستارى.

تاسقىن قاۋپى تومەن وڭىرلەر – پاۆلودار، ماڭعىستاۋ، تۇركىستان جانە قىزىلوردا وبلىستارى.

«بيىل «قازگيدرومەت» العاش رەت ءار وبلىس بويىنشا ەگجەي-تەگجەيلى انىقتامالار دايىندادى. بۇل انىقتامالاردا گيدرولوگيالىق بەكەتتەر بويىنشا سۋ دەڭگەيىنىڭ جانە اعىسىنىڭ كۇتىلەتىن ەڭ جوعارعى ماندەرى، اعىن كولەمى، سونداي-اق قاۋىپ ايماعىندا ورنالاسقان ەلدىمەكەندەردى بەلگىلەي وتىرىپ، بولجامدى باستالۋ كۇندەرى كۇتىلەدى. وتكەن اپتادان باستاپ گيدرومەت اپتا سايىنعى گيدرولوگيالىق بولجامداردى شىعارا باستادى»، – دەدى ەرلان نىسانباەۆ.

وسىعان دەيىن سۋ تاسقىنىنىڭ سالدارىن جويۋ ءۇشىن 10 000-عا جۋىق اسكەري قىزمەتشى جۇمىلدىرىلۋى مۇمكىن ەكەنى ايتىلدى.

سونىمەن قاتار، توتەنشە جاعدايلار ءمينيسترى سۋ تاسقىنىنا دايىندىقتى جەدەل اياقتاۋدى قولعا الدى.

بۇگىنگى الداعى بولۋى ىقتيمال سۋ تاسقىنىنا بايلانىستى ۇكىمە وتىرىسىنان تۇيگەنىمىز قاتىستى ورگاندار بىلتىرعى ەلدى دۇرلىكتىرگەن قارعىن سۋ اپاتىنان ساباق الىپ، جىبەرگەن كەمشىلىكتەردى قورتىندىلاپ، ايتىپ كەلمەيتىن اپاتقا تاس ءتۇيىن دايىن وتىرعانى بايقالادى. دەسەدە ارقانى كەڭگە سالماي. وسى باستان قاجەتتى شارالاردى قولعا الۋ كەرەك. بۇل ماسەلەدە بيۋروكراتياعا جول بەرمەۋ كەرەك، ءتاز قيمىل جاساۋ كەرەك.

Abai.kz