قازاقستان ءوز مۇنايىن باكۋ – تبيليسي – جەيحان قۇبىرى ارقىلى ەكسپورتتاۋدى ارتتىرۋدى جوسپارلاپ وتىر. بۇل تۋرالى قازاقستاننىڭ سىرتقى ىستەر ءمينيسترى مۇرات نۇرتىلەۋ استانادا ازەربايجاننىڭ سىرتقى ىستەر ءمينيسترى جەيحۋن بايراموۆپەن كەلىسسوز وتكىزگەننەن كەيىن مالىمدەدى.

ء"بىز قازاقستاننىڭ ەنەرگەتيكالىق رەسۋرستارىن ازەربايجان ارقىلى الەمدىك نارىققا جەتكىزۋ بويىنشا ءوز كەلىسىمدەرىمىزدى ءساتتى جۇزەگە اسىرىپ جاتىرمىز. بىلتىر باكۋ – تبيليسي – جەيحان قۇبىرى ارقىلى 1,4 ميلليون توننا مۇناي ەكسپورتتالدى. الداعى ۋاقىتتا قازاقستان مۇنايىنىڭ ترانزيت كولەمىن جىلىنا 2,2 ميلليون تونناعا دەيىن ارتتىرۋ جوسپارلانىپ وتىر", – دەدى كەزدەسۋدە مۇرات نۇرتىلەۋ.

رەسەي ۋكراينادا سوعىس باستاعالى بەرى قازاقستان تارابى باكۋ – تبيليسي – جەيحان قۇبىرىنا ءمان بەرە باستادى. 2023 جىلدىڭ ءساۋىر ايىندا قازاقستان پرەزيدەنتى قاسىم-جومارت توقاەۆ ازەربايجانعا ساپار شەگىپ، رەسەيدى اينالىپ وتەتىن ترانسكاسپي كولىك مارشرۋتىن دامىتۋ تۋرالى كەلىسىم جاسادى. استانا ورتا دالىزگە زور ءۇمىت ارتىپ، بۇل باعىتتاعى ەكسپورتتى جىلىنا 20 ميلليون تونناعا دەيىن جەتكىزۋدى باستى جوسپارعا ەنگىزدى.

كەيىنگى ۋاقىتتا وسى باعىتتا تاسىمال كولەمى ارتقانىمەن، ءالى دە بولسا كاسپي قۇبىر كونسورتسيۋمى (كقك) ارقىلى وتەتىن كولەممەن سالىستىرعاندا الدەقايدا از. بىلتىر باكۋ – تبيليسي – جەيحان قۇبىرى قازاقستاننان 1,5 ميلليون توننا مۇناي قابىلدادى. سول ۋاقىتتا ۇكىمەت جوسپارىندا مۇناي تاسىمالىن جىلىنا 20 ميلليون تونناعا دەيىن جەتكىزۋ جاعى ايتىلعانىمەن، ناقتى مەرزىمى اتالعان جوق.

جاقىندا رەسەيدىڭ كراسنودار ولكەسىندەگى كقك-نىڭ "كروپوتكينسكايا" مۇناي ايداۋ ستانتسياسىنا جاسالعان شابۋىلدان كەيىن ماماندار ازەربايجان، گرۋزيا جانە تۇركيانىڭ جەيحان ايلاعى ارقىلى وتەتىن بالامالى مۇناي قۇبىرىن دامىتۋ قاجەتتىلىگى تۋرالى قايتادان ءسوز قوزعادى.

كاسپي قۇبىر كونسورتسيۋمى (كقك) باتىس قازاقستانداعى كەنىشتەردە وندىرىلگەن مۇنايدى استراحان، قالماقيا جانە كراسنودار ولكەسى ارقىلى نوۆوروسسيسك ماڭىنداعى وڭتۇستىك وزەرەەۆكا تەرمينالىنا تاسىمالدايدى. سول جەردە تانكەرلەرگە تيەلگەن مۇناي الەمدىك نارىققا شىعارىلادى. وسى باعىتپەن قازاقستاننىڭ ەكسپورتقا شىعاتىن مۇنايىنىڭ ۇشتەن ەكىسىنەن كوبى، سونداي-اق كاسپيدەگى رەسەي كەن ورىندارىنان الىنعان شيكىزات تاسىمالدانادى. 2024 جىلى كقك 63 ميلليون توننا مۇناي تاسىمالدادى (ونىڭ 53 ميلليونى قازاقستاننان). وسى مۇناي كولەمىنىڭ ۇشتەن ەكىسى ەۋروپا مەن اقش-قا جونەلتىلدى.

قازاقستاندىق ساراپشىلار ۇكىمەتتى رەسەيگە تاۋەلدى بولۋدى ازايتۋعا شاقىرىپ، ايماقتا جانجالدار كۇشەيە قالعان جاعدايدا ونداي تاۋەلدىلىكتىڭ زور قاۋىپ-قاتەر تۋدىراتىنىن ەسكەرتكەن.

Abai.kz