مەملەكەتتىك قولداۋدان ۇمىتكەر كينوجوبالاردى ىرىكتەۋدىڭ ءبىرىنشى كەزەڭى اياقتالدى.

ەلەكتروندى تۇردە 444 ستسەناري مەن ستسەناري جوسپارى تىركەلدى.

انيماتسيا سالاسى بويىنشا 42 ءوتىنىم بەرىلگەن. دەرەكتى-حرونيكالى فيلمدەر ساناتى بويىنشا 103, ال ويىن فيلمدەرىنە 299 ءوتىنىم كەلىپ تۇسكەن.

قۇجاتتاردى قابىلداۋ اياقتالعاننان كەيىن، ۇلتتىق كينونى قولداۋ ورتالىعى ءوتىنىش بەرۋشىلەر ۇسىنعان قۇجاتتاردى ساراپتاما كەڭەسىنىڭ قاراۋىنا تاپسىرادى.

ستسەناريلەردى نەمەسە ستسەناري جوسپارلارىن ساراپتاما كەڭەسىنىڭ مۇشەلەرى فيلم تۇرلەرى بويىنشا سەكتسيالاردا قاراستىرادى.

كەڭەس قۇرامى 20 جۇمىس كۇنى ىشىندە باسىم تاقىرىپتارعا، سيۋجەتتىڭ قۇرىلىمى مەن دراماتۋرگيا پرينتسيپتەرى سەكىلدى باستى تالاپتارعا نازار اۋدارىپ، وتىنىمدەردى قاراپ شىعادى.

ەكىنشى كەزەڭدە ساراپتاما كەڭەسى ۇسىنعان جوبالاردىڭ قۇجاتتار پاكەتى جيناقتالادى.

بۇل رەتتە قاتە كەتسە، ونى تۇزەۋگە 3 كۇن ۋاقىت بەرىلەدى.

ايتا كەتەيىك، كونكۋرستىڭ ءبىرىنشى كەزەڭىنە قاتىسۋ ءۇشىن 5-13 ناۋرىز (12 ناۋرىز ساعات 23:59) ارالىعىندا ءوتىنىم قابىلداندى.

قاڭتار ايىندا كينو تۇسىرۋگە ارنالعان باسىم تاقىرىپتار جاريالاندى.

Abai.kz