ءماجىلىس دەپۋتاتى امانجول ءالتاي ۇلتتىق قۇرىلتاي وتىرىسىنا قاتىستى ويىن ايتتى.

ۇلتتىق قۇرىلتايدىڭ مەن ءۇشىن عانا ەمەس، سانالى قازاقستان ازاماتى ءۇشىن ءمان-ماعىناسى تەرەڭ. ويتكەنى وتكەن تاريحي جولىمىزعا قاراساڭىز، اتا-بابالارىمىز ۇلتتىق قۇرىلتاي جاريالاپ، ءتورت قۇبىلاسىن تۇگەندەپ، اقىل-ويدىڭ يەلەرى باسىن قوسىپ، نەبىر كەلەلى كەڭەستەر، ماڭىزدى شەشىمدەر وسى ۇلتتىق قۇرىلتايدا قابىلدانعان. مەملەكەت باسشىسىنىڭ قۇرىلتايدى وتكىزۋ باستاماسى - بۇگىن شىعا سالعان يدەيا ەمەس، - دەدى دەپۋتات.

امانجول ءالتاي ۇلىتاۋداعى، تۇركىستانداعى، اتىراۋداعى باسقوسۋدا دا رۋحانيات، مادەنيەت سالالارىنداعى كەلەلى ماسەلەلەر كوتەرىلگەنىن ايتتى. بۇل ماسەلەلەر جاي عانا قوزعالماي، ول بويىنشا ءتيىستى زاڭدار قابىلداندى.

امانجول ءالتاي بيىل ۇلتتىق قۇرىلتايعا العاش رەت مۇشە بولىپ وتىر.

قۇرىلتايعا كەلگەن ادام جاي كەلمەۋى كەرەك. ءوزىنىڭ ىشكى ۇسىنىستارىن، جۇرەگىنە تۇيگەن ۇلتتىڭ پايداسىنا تيەدى دەگەن كەلەلى ويلارىن ءتۇيىپ كەلۋى قاجەت. مەن دە قوعامعا پايداسى بولادى دەگەن اقىل-ويىمدى، ۇسىنىستارىمدى الىپ كەلىپ وتىرمىن، - دەدى دەپۋتات.

ول قانداي ۇسىنىس ەكەنىن ايتتى.

رۋحانيات سالاسىنىڭ وكىلىمىن. سوندىقتان ۇسىناتىن ۇسىنىستارىم، ويلارىم وسىنىڭ توڭىرەگىندە بولادى. ءبىرىنشى كەزەكتە اۋىلدىق جەرلەردەگى قۇلازىپ بارا جاتقاگ مادەنيەت وشاقتارىنىڭ كۇيى. 90-جىلدارى ابىرجىعان كەزەڭدە اۋىلداعى مادەني ينفراقۇرىلىمدارىمىزدان ايىرىلىپ قالدىق. كەڭەس ۇكىمەتى كەزەڭىندە قالىپتاسقان اۋىلدارداعى قانشاما مادەني ۇيلەرى، وشاقتارى بۇزىلىپ قالدى. بۇگىندە اۋىلدىڭ ەڭسەسىن كوتەرۋ ءۇشىن ونىڭ ەكونوميكالىق، الەۋمەتتىك جاعدايىن عانا ەمەس، اۋىلدىڭ رۋحاني، مادەني كەلبەتىن كوتەرۋگە كۇش سالۋىمىز كەرەك. ءبىزدىڭ عىلىمداعى، ونەردەگى، رۋحانياتتاعى الىپتارىمىزدىڭ ءبارى قالادان شىعىپ جاتقان جوق قوي، ولار اۋىلدان شىققان الىپتار. ال ەندى ۇلتتىڭ گەنوفونىنا اينالعان تۇلعالاردىڭ التىن بەسىگى، التىن ۇياسى – اۋىلدىڭ مادەني الەۋەتىن كوتەرۋىمىز كەرەك، - دەپ ايتتى ءالتاي.

Abai.kz