پرەمەر-مينيستر ولجاس بەكتەنوۆتىڭ «ىلگەرىلەۋگە باستاعان التى جىل: قازاقستان ورنىقتى دامۋ جولىندا» ماقالاسىندا 2019 جىلدان بەرى ەنەرگەتيكا سالاسىندا اتقارىلعان ىرگەلى ىستەرگە شولۋ جاسالعان.

ولجاس بەكتەنوۆتىڭ پايىمداۋىنشا، كوممۋنالدىق شارۋاشىلىق جانە ەنەرگەتيكا سالاسىنداعى داعدارىستىڭ ەڭ اۋىر كەزەڭى ارتتا قالدى.

 - پرەزيدەنتتىڭ باسشىلىعىمەن ەلىمىزدىڭ ينفراقۇرىلىمىن اۋقىمدى جاڭعىرتۋ جۇمىستارى جۇرگىزىلۋدە.

ۇزاق جىلدار بويى جىلۋ ەنەرگەتيكاسى سەكتورىنا ءتيىستى كوڭىل بولىنبەي كەلدى: رەسپۋبليكا بويىنشا ينفراقۇرىلىمدىق جەلىلەردىڭ توزۋ دەڭگەيى 65%-عا، ال جەكەلەگەن وڭىرلەردە ءتىپتى 90%-عا جەتتى. قازىر ەنەرگەتيكا جانە كوممۋنالدىق سالالارداعى داعدارىستىڭ اۋىر كەزەڭىن ەڭسەرە الدىق. ەگەر 2019 جىلى جىلۋ كوزدەرىنىڭ ورتاشا توزۋ دەڭگەيى 71%-عا جەتسە، قازىر ونى 61%-عا دەيىن تومەندەتۋگە مۇمكىندىك تۋدى. بۇل جۇمىس جالعاسادى، - دەپ جازادى ول ماقالادا.

ۇكىمەت باسشىسى بىلتىر مەملەكەت باسشىسىنىڭ تاپسىرماسىمەن 86 مىڭ شاقىرىم ينجەنەرلىك جەلىنى جاڭعىرتىپ، جاڭا قۋات كوزدەرىن ىسكە قوسۋدى كوزدەيتىن ۇلتتىق جوبا ىسكە اسىرىلا باستاعانىن اتاپ وتكەن. ۇكىمەت بۇل جوبا ويداعىداي ىسكە اسسا، تەحنولوگيالىق اپاتتار سانىن 20%-عا قىسقارتىپ، ەنەرگەتيكالىق جانە كوممۋنالدىق سەكتورلاردىڭ توزۋ دەڭگەيىن ورتا ەسەپپەن 40%-عا ازايتۋعا، گەنەراتسيانى 7 گۆت-تان استام ارتتىرۋعا مۇمكىندىك بەرەدى. اتالعان باعدارلامانى ىسكە اسىرعان كەزدە قازاقستاندىق ءونىم شىعاراتىن كاسىپورىنداردىڭ الەۋەتىن تولىق پايدالانۋ جوسپارلانىپ وتىر. قازاقستاندىق كومپانيالاردىڭ جوسپارلانعان ءونىم كولەمى شامامەن 3,5 تريلليون تەڭگە دەپ باعالانعان.

- 2019 جىلدان بەرى ەلەكتر ەنەرگياسىن تۇتىنۋ 14%-عا ءوسىپ، شامامەن 120 ميلليارد كۆت/ساع قۇرادى. حالىق سانىنىڭ ءوسۋىن، سونداي-اق جۇرگىزىلىپ جاتقان يندۋستريالىق دامۋ جانە تسيفرلاندىرۋ ساياساتىن ەسكەرە وتىرىپ، ەنەرگيا تۇتىنۋ ودان ءارى ارتا تۇسەدى دەپ بولجانىپ وتىر. وسىعان وراي پرەزيدەنت تاپسىرماسى بويىنشا يادرولىق ەنەرگەتيكانى دامىتۋ قولعا الىندى. ءبىرىنشى اەس قۇرىلىسىنىڭ اۋدانى انىقتالدى. تاعى ەكى ستانتسيا سالۋ ءۇشىن قۇرىلىس ورىندارىن انىقتاۋ جۇمىستارى باستالدى، - دەيدى ۇكىمەت باسشىسى.

ايتا كەتۋ كەرەك، وتكەن اپتادا عانا بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقاەۆ قازاقستانعا ءۇش اتوم ەلەكتر ستانساسىن سالۋ كەرەكتىگىن ايتقان ەدى.

Abai.kz