اقش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن سەيسەنبى، 18 ناۋرىز كۇنى سويلەسۋدى جوسپارلاپ وتىر. بۇل حاباردى ترامپ جۋرناليستەرگە فلوريدادان ۆاشينگتونعا ۇشىپ بارا جاتقان كەزدە ۇشاقتا ايتتى، دەپ جازدى Reuters.

ترامپتىڭ سوزىنشە، وتكەن دەمالىس كۇندەرى كوپ جۇمىس اتقارىلعان.

"بۇل سوعىستى توقتاتۋعا شامامىز كەلە مە، سوعان كوز جەتكىزگىمىز كەلەدى. مۇمكىن كەلەر، مۇمكىن كەلمەس. بىراق مەنىڭ ويىمشا، بىزدە وتە جاقسى مۇمكىندىك بار", – دەگەن اقش پرەزيدەنتى.

جۋرناليستەرمەن اڭگىمە بارىسىندا ترامپ كەلىسسوزدەردە سونىمەن قاتار "جەر" مەن "ەلەكتر ستانسالارى" تۋرالى تالاپتار بولاتىنىن اتاپ ايتتى. بۇل ءسوز قازىرگى تاڭدا رەسەي اسكەرى باسىپ العان اۋماقتا ورنالاسقان زاپوروجە اتوم ەلەكتر ستانساسى جايلى بولۋى مۇمكىن، دەپ توپشىلادى بريتاندىق ۆۆس مەدياسى.

"مەنىڭ ويىمشا، بۇل جايتتاردىڭ كوبى قازىردىڭ وزىندە ەكى تاراپتىڭ – ۋكراينا مەن رەسەي اراسىندا تالقىلانىپ جاتقان بولۋى مۇمكىن. ءبىز قازىر وسى ماسەلەلەردى، سونىڭ ىشىندە بەلگىلى ءبىر اكتيۆتەردى ءبولۋ جايىن دا ايتىپ جاتىرمىز", – دەدى دونالد ترامپ.

16 ناۋرىزددا ترامپتىڭ ارنايى وكىلى ستيۆەن ۋيتكوفف اقش پرەزيدەنتى رەسەي باسشىسىمەن ۋكرايناداعى سوعىستى اياقتاۋ جانە كەلىسىمگە قول جەتكىزۋ جونىندە وسى اپتادا سويلەسۋى مۇمكىن دەپ ايتقان. ۋيتكوفف جاقىندا ماسكەۋدە بولعان، ال وعان دەيىن ساۋد ارابياسىنداعى جيددا قالاسىندا اقش پەن ۋكراينا دەلەگاتسيالارى اراسىندا وتكەن كەلىسسوزگە قاتىسقان.

ماسكەۋدەگى كەلىسسوزدەردى ترامپتىڭ ارنايى وكىلى ء"پوزيتيۆتى" دەپ باعالاپ، رەسەي مەن اقش اراسىندا "پوزيتسيالار جاقىنداي" تۇسكەن دەپ مالىمدەگەن.
جيدداداعى كەزدەسۋدىڭ قورىتىندىسى بويىنشا كيەۆ ۆاشينگتوننىڭ ۇسىنىسىن – رەسەيمەن سوعىستى 30 كۇنگە تولىق توقتاتا تۇرۋ تۋرالى ءبىتىم جاساسۋعا كەلىسكەن. بۇل مەرزىم كەيىن تاعى ۇزارتىلۋى مۇمكىن. پۋتين بۇل يدەيانى ءپرينتسيپتى تۇردە جوققا شىعارعان جوق، بىراق ماسكەۋدىڭ بىرقاتار تالابىمەن بايلانىستى "كەيبىر نيۋانستار" بارىن ايتقان.

ازىرگە ەكى تاراپ اتىستى توقتاتۋ تۋرالى ەشقانداي ءبىتىم جاساعان جوق، ۋكراينادا سوعىس جالعاسىپ جاتىر. كيەۆ ماسكەۋدى بىتىمگە كەلۋگە قۇلىقسىز جانە قاقتىعىستى بەيبىت جولمەن رەتتەۋگە قارسى دەپ ايىپتاپ وتىر.

Abai.kz