الماتى وبلىسىنىڭ جامبىل اۋدانىن كوگىلدىر وتىنمەن قامتاماسىز ەتۋدە اتىمتاي جومارت اكەلى-بالالى مولديار-دانيار نۇرباەۆتاردىڭ ۇلەسى وراسان زور بولعانىن كوپشىلىك جاقسى بىلەدى.

ۇزاق جىلدار وت جاعىپ، كۇل شىعارعان تۇرعىنداردىڭ تۇرمىس-تاۋقىمەتىن جەڭىلدەتۋگە الماتى وبلىسىنىڭ قۇرمەتتى ازاماتى، «پاراسات» جəنە «قۇرمەت» وردەندەرىنىڭ يەگەرى مولديار قىلشىقۇلى بەل شەشە كىرىسسە، «ات تۇياعىن تاي باسار دەگەندەي» اكەسىنىڭ ىزگى ءىسىن بالاسى دانيار جالعاستىرعان.

كاسىپكەر مولديار نۇرباەۆ 1992 جىلدان باستاپ گازداندىرۋ سالاسىندا جەمىستى ەڭبەك ەتتى. وڭىردە العاشقىلاردىڭ ءبىرى بولىپ تۇرعىنداردى تابيعي گازبەن جابدىقتايتىن جوعارى، ورتا قىسىمداعى گاز تارتۋ جەلىلەرىنىڭ قۇرىلىسىن قولعا الدى. جۇيەلى ەڭبەڭتىڭ ناتيجەسىندە 2001 جىلدان باستاپ ءوزى ۇيىمداستىرعان «تəۋەكەل-ت» جشس-نىڭ قۇرىلتايشىسى جəنە ديرەكتورى اتاندى. سەرىكتەستىك 2001-2012 جىلدارى الماتى وبلىسىنىڭ قاراساي، جامبىل اۋداندارىنىڭ، الماتى قالاسىنداعى ناۋرىزباي اۋدانىنىڭ تۇرعىندارىن تابيعي گازبەن جابدىقتاۋ جۇمىستارىن جەكە ينۆەستيتسيا ەسەبىنەن جۇزەگە اسىرعان.

كاسىپ يەسى ءوزىنىڭ بəسەكەگە قابىلەتتى، ىزدەنگىش ەكەنىن باسەكەلى نارىقتا تولىعىمەن دəلەلدەدى. سالاداعى تابىسى ورگە باسقان كəسىپكەر 2013 جىلى الماتى وبلىسى گاز شارۋاشىلىقتارى اسسوتسياتسياسى زاڭدى تۇلعالار قوعامىن ۇيىمداستىردى. وسى ەڭبەگى ءۇشىن وردەندەرمەن، العىس حاتتارمەن ماراپاتتالدى. ەرەكشە جومارتتىعىمەن تانىلىپ، اسىرەسە əلەۋمەتتىك جاعىنان جەتكىلىكسىز قامتىلعان وتباسىلارعا، بالالار ۇيىنە ايرىقشا قولداۋ كورسەتتى. قايىرىمدىلىعى ءۇشىن «التىن جۇرەك – زولوتوە سەردتسە» رەسپۋبليكالىق جوباسىنىڭ جەڭىمپازى بولىپ، ارنايى ماراپاتتى يەلەندى.

كوپ جىلعى ەڭبەگىنىڭ زەينەتىن كوردى. كەيىن كومپانيا جۇمىسىن ۇلى دانيارعا تاپسىردى. دانيار نۇرباەۆ اكەسى باسقارعان كومپانيادا قاتارداعى شەبەر بولىپ ەڭبەك ەتىپ، تəجىريبە جيناقتادى. كەيىن كومپانيا تىزگىنىن قولىنا الىپ، جەتەكشىلىك جاسادى.

ءوز ماماندىعىن جەتىك مەڭگەرگەن دانيار بىرنەشە ىرگەلى وقۋ ورنىن بىتىرگەن. ول جوعارى ءبىلىمدى زاڭگەر جəنە ەكونوميست ەدى. الماتى قالاسىنداعى قازاق مەملەكەتتىك تەحنيكالىق ۋنيۆەرسيتەتىنىڭ مۇناي-گاز فاكۋلتەتىن گاز شارۋاشىلىعى ماماندىعى بويىنشا مەڭگەرگەن. 2014 جىلدان بەرى «تəۋەكەلگازقۇبىرى» جاۋاپكەرشىلىگى شەكتەۋلى سەرىكتەستىگىنىڭ ديرەكتورى قىزمەتىن ابىرويلى اتقاردى.

سايلاۋشىلار سەنىم ءبىلدىرىپ، الماتى وبلىسى مəسليحاتىنىڭ دەپۋتاتتىعىنا بىرنەشە مəرتە سايلادى. مەرەكەلىك مەدالدارمەن، وبلىس، اۋدان əكىمدەرىنىڭ العىس حاتىمەن، ماقتاۋ قاعازدارىمەن ماراپاتتالعان. بۇدان باسقا دا العان سىي-ماراپاتتارى جەتەرلىك. رۋحاني سالانى قولداۋى ەسكەرىلىپ، حالىقارالىق جامبىل اتىنداعى سىيلىققا يە بولدى.

الايدا وتكەن جىلى قاڭتار ايىندا دانيار مولديارۇلى مەزگىلسىز قازا تاۋىپ، ەل-جۇرتتىڭ قابىرعاسىن قايىستىرىپ كەتتى.

قر پارلامەنتى ءمəجىلىسىنىڭ ەكسدەپۋتاتى، «ەگەمەن قازاقستاننىڭ» ارداگەر ءجۋرناليسى، مارقۇم مەيرامبەك تولەپبەرگەن əلەۋمەتتىك جەلىدە مارقۇم  دانياردى - «قازاق جىگىتتەرىنىڭ سىرتتانى ەدى» دەپ سيپاتتاپ، تومەندەگىدەي جازبا جاريالاعان ەدى:

«تəۋەكەلگازقۇبىرى» جشس-ءنىڭ باس ديرەكتورى، الماتى وبلىستىق مəسليحاتىنىڭ ەكس-دەپۋتاتى، جامبىل، تالعار، اقسۋ اۋداندارىنىڭ قۇرمەتتى ازاماتى دانيار مولديارۇلى نۇرباەۆتىڭ تاپقان دəۋلەتىن، بۇيىرعان ريزىعىن تۋعان حالقىمەن بولىسكەن مەيىرىمدىلىگى مەن يماندىلىعى، ادال دوستىعى ايرىقشا اتالۋى دا بەكەر ەمەس. اينالاسىن دوسپەن قورشاعان ازامات وسىنداي-اق بولار!».

ايتسا-ايتقانداي مارقۇم دانيار نۇربايەۆ سانالى عۇمىرىندا ەل ەسىندە قالاتىن يگى ىستەر جاسادى. جەتىم-جەسىر، كوپبالالى وتباسىلارىنا دەمەۋ بولىپ، قولىنداعىسىن ءبولىپ بەرىپ، قايىرىمدىلىق تانىتۋدا ايانىپ قالمايتىن دانيار مولديارۇلىنىڭ شاپاعاتى تالايعا ءتيدى. جۇزدەگەن الەۋمەتتىك وسال توپتاعى وتباسىلاردىڭ جەڭىلدەتىلگەن تاريفپەن گازعا قوسىلۋىنا جاردەمدەستى. ۇزىناعاش اۋىلىنداعى سوعىس جəنە ەڭبەك ارداگەرلەرىنە، «التىن القالى» انالاردىڭ شاڭىراعىنا، باسقا دا ەلدى مەكەندەردەگى جەتكىلىكسىز قامتىلعان وتباسىلارىنا گاز قۇبىرىن تەگىن كىرگىزدى. ارنايى ەسەپتەگەندە ءتورت جۇزدەن استام وتباسى ونىڭ قولداۋىمەن شاڭىراقتارىنا جىلۋدى تەگىن كىرگىزىپ، ازاماتتىڭ جان جىلۋىن سەزىنگەن. مەملەكەتتىك مەرەكەلەردە ازىق-تۇلىك، كيىم-كەشەكپەن ۇزدىكسىز قامتاماسىز ەتىپ وتىرعان. ءالى دە جالعاسىن تابۋدا.

«ورنىندا بار وڭالار» دەمەكشى، دانياردىڭ شىراعىن جاققان جارى ءلايلا مەن ۇلى دارىن ەكەۋى مارقۇم وتاعاسىنىڭ جارقىن ءىسىن جالعاستىرىپ، دامىتۋدا. اۋداندا بۇقارالىق سپورت تۇرلەرىنەن جارىس وتكىزىپ، دەمەۋشىلىك جاساۋدى ءوز جاۋاپكەرشىلىكتەرىنە الۋدا.

بۇدان بولەك، ءوزى ولسە دە ارتىنا وشپەس ءىز قالدىرعان مارقۇم «دانيار مولديارۇلى» اتىنداعى قوعامدىق قور قۇرىپ، جۇمىسىن جۇيەلى جۇرگىزۋگە بەكىنىپ وتىر.

«ءبىز اكەلى-بالالى مولديار مەن دانياردىڭ ەلدىڭ ەرتەڭى ءۇشىن قوسقان ۇلەستەرى ايرىقشا ەكەنىن اتاپ ايتامىز. ومىردەن ەرتە وتكەن دانياردىڭ قازاسى قابىرعامىزدى قايىستىردى. ويلانا كەلە ءبارىمىز ءبىر تۇجىرىمعا كەلدىك. جۇرتتى جىلۋمەن قىراۋلى قىستا قامتاماسىز ەتۋ وڭاي ەمەس. مىڭداعان وتباسى ونىڭ قىزىعىن كورىپ كەلەدى. تاعى قانشاما ادام جۇمىسپەن قامتىلۋدا. ۇجىمداعى جۇزدەگەن ادامعا تەگىن تۇسكى اس، ارنايى كيىممەن، اۆتوكولىكپەن قامتاماسىز ەتىلۋىنىڭ ءوزى ونىڭ ازاماتتىق كەلبەتىن اڭعارتادى. سوندىقتان اكەسى مولديار نۇرباەۆ، اناسى التىنسارا، دانياردىڭ جۇبايى ءلايلا ادىلقىزى، ۇلى دارىن دانيارۇلىمەن كەزدەسىپ، قوردىڭ ماقساتى مەن مىندەتى جايلى ءبىر شەشىمگە كەلدىك. ولار بۇل باستامانى قۋانا قولدادى. وسىلايشا، دانياردىڭ وتباسىلىق بيزنەستەگى ۇلەسى ەسەبىنەن ءوز اتىنداعى قور ۇيىمداستىرىلىپ، تۇسكەن ديۆيدەند ەسەبىنەن ءۇش جىل سايىن ەسكەرۋسىز قالعان بابالارعا ارناپ ۇلكەندى-كىشىلى ەسكەرتكىشتەر تۇرعىزۋ، تاعى باسقا ەل ىشىندەگى قايىرىمدىلىق شارالارىنا، مادەنيەت سالاسىنا ۇلەس قوسۋ. قۇرىلاتىن وسى قور بيىل قوبىزشى مولىقباي اتاعا قويىلاتىن ەسكەرتكىش تۇرعىزۋدان  جۇمىسىن باستايدى»، – دەيدى اقسۋ اۋدانىنىڭ قۇرمەتتى ازاماتى، «دانيار مولديارۇلى» اتىنداعى قوعامدىق قور جەتەكشىسى بەرىكبول قاسىموۆ.

دانيار مولديارۇلىنىڭ ىزگى ەسىمى، يگى ىستەرى ەل ەسىندە ماڭگىلىك ساقتالاتىنى انىق.

Abai.kz