قر پارلامەنتى ءماجىلىسىنىڭ
توراعاسى ە.ج. قوشانوۆقا!

قۇرمەتتى ەرلان جاقانۇلى!

رامازان ايىندا ۇستاعان ورازاڭىز بەن جاساعان قۇلشىلىقتارىڭىزدى، دۇعا-تىلەكتەرىڭىزدى اللا قابىل ەتسىن!

مەنىڭ «AMANAT» پارتياسىنان جۇمىستان كەتكەنىمە ەكى جىلدان استى. ارينە، بۇل جۇمىستان مەنى ەشكىم قۋعان جوق، ءوز ەركىممەن كەتتىم.

بىراق، سوڭعى كەزدە سول «AMANAT» پارتياسىنان جۇمىستان كەتكەنىمە، شىنىمدى ايتايىن، قاتتى وكىنىپ ءجۇرمىن!

ارينە، ءوزىمنىڭ جەكە باسىمنىڭ مۇددەسى ءۇشىن ەمەس، كوشى-قون جانە ەلدىڭ ءىشى-سىرتىنداعى قانداستارىمىزدىڭ تاعدىرى جانە ءوزىم ءدامىن تاتقان پارتيا مەن سول ۇلى كوشكە مۇددەلى قاۋىمنىڭ اراسىنا دانەكەر بولۋ ءۇشىن!

سوڭعى ون-ون بەس جىلدىڭ كولەمىندە كوشى-قون ءۇردىسىن رەتتەۋگە ارنالعان زاڭدار مەن نورماتيۆتىك قۇجاتتارعا ەنگەن ءتيىمدى وزگەرىستەر مەن تولىقتىرۋداردىڭ دەنى مەنىڭ ۇسىنىستارىممەن جانە تاباندى تۇردە كۇرەسۋىممەن جۇزەگە اسقانىن ەشكىم جوققا شىعارا الماسا كەرەك.

سول وزگەرىستەر  مەن تولىقتىرۋداردىڭ جەتپىس-سەكسەن پايىزى   بۇرىنعى «نۇر وتان» پارتياسىندا قىزمەت اتقارعان التى جىل ىشىندە زاڭداسقانىن، ونى شەشۋگە اتالعان پارتيانىڭ زور مۇمكىندىك بەرگەنىن مەن ۇنەمى ريزالىقپەن ايتىپ كەلەمىن.

«نۇر وتاننىڭ» بەدەلى بەلشەسىنەن تومەن ءتۇسىپ، سىزدەر ونىڭ اتىن «امانات» دەپ وزگەرتۋگە ءماجبۇر بولىپ جاتقاندا، اتالعان پارتياعا العىس ايتىپ كەلەتىن قانداستارىمىزدىڭ اياعى ۇزىلمەيتىن...

مەنىڭ سول ەڭبەگىمدى سول كەزدەگى پارتيا توراعاسىنىڭ ءبىرىنشى ورىنباسارى، قازىرگى قر پارلامەنتى سەناتىنىڭ توراعاسى ماۋلەن اشىمباەۆ: «Nur Otan» پارتياسىنىڭ رەسپۋبليكالىق قوعامدىق قابىلداۋ بولمەسىندە جۇمىس ىستەي ءجۇرىپ، كوشى-قون ماسەلەلەرى بويىنشا ازاماتتاردى تاقىرىپتىق قابىلداۋدىڭ ارنايى تۇجىرىمداماسىن دايىنداعان ەڭبەگىڭىزدى ايىرىقشا اتاپ وتكىم كەلەدى. بۇگىنگى تاڭدا بۇل تۇجىرىمداما پارتيانىڭ رەسپۋبليكالىق جەلىلىك كەستەسىنە ەنگىزىلدى...»، - دەپ جوعارى باعالاعان ەدى.

ول از دەسەڭىز، تۇڭعىش پرەزيدەنت نۇرسۇلتان نازارباەۆ: «سونداي-اق، جۇرتشىلىق ءسىزدى شەت ەلدەردە تۇراتىن قانداستارىمىزدىڭ قازاق توپىراعىنا ورالۋىنا جاناشىرلىق ءبىلدىرىپ، وسى ورايدا ۇشىراساتىن قيىندىقتاردىڭ وڭتايلى شەشىلۋىنە بەلسەنە اتسالىسىپ جۇرگەن ازامات رەتىندە دە قادىرلەيدى»، - دەپ ەلۋگە تولعانىمدا ارنايى قۇتتىقتاۋ جىبەرگەن بولاتىن.

ماۋلەن ساعاتحانۇلى ايتىپ وتىرعان سول «كوشى-قون ماسەلەلەرى بويىنشا ازاماتتاردى تاقىرىپتىق قابىلداۋدىڭ ارنايى تۇجىرىمداماسى» سەكىلدى جوبا قازىر پارتيادا جوق!

وكىنىشكە وراي، 2022 جىلى بەكىتىلگەن «قازاقستان رەسپۋبليكاسىنىڭ كوشى-قون ساياساتىنىڭ 2023-2027 جىلدارعا ارنالعان تۇجىرىمداماسى» سول الىسىپ ءجۇرىپ, زورعا تۇزەتكەن كوشى-قوندى قايتادان تاس-تالقان ەتتى. قازاق كوشى كارىم ءماسىموۆ زامانىنداعى بۇرىنعى تاز كەپەشىن قايتا كيدى.

ءبىر-ەكەۋىن عانا ايتايىن:

- 2023 جىلعى 19 ساۋىردە سەناتتىڭ قاراۋىمەن بەكىتىلگەن «حالىقتىڭ كوشى-قونى تۋرالى» زاڭنىڭ 20-بابىنىڭ 5) تارماعى اتاجۇرتقا كوشىپ كەلىپ، ۇكىمەت ايقىنداعان سەگىز وبلىستان وزگە توعىز ءوڭىر مەن ءۇش ۇلكەن قالاعا قونىستانعىسى كەلەتىن ەتنيكالىق قازاقتاردىڭ ازاماتتىق الۋىن جانە تۇرعىلىقتى جەرىن ەركىن تاڭداۋ قۇقىعىن شەكتەپ تاستادى;

- «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرىنىڭ ەشبىر زاڭمەن بەكىتىلمەي قالعانىن وتكەن جىلى 14 قازاندا سەنات مويىندادى (اتالعان «اتا جولى» كارتاسىنا قاتىستى نورما 2023 جىلعى 20 ساۋىردە ءماجىلىس پەن سەناتتىڭ قاراۋىنان ءوتىپ، پرەزيدەنت قول قويعان)...

ماعان الا قاپتىڭ اۋزىن اشتىرعان – وسىنداي كەلەڭسىزدىكتەر!

قۇرمەتتى ەرەكە!

وسى جاعدايلاردى ەسكەرە وتىرىپ، مەنىڭ «امانات» پارتياسىنداعى جۇمىس ورنىما قايتا بارعىم، مىنا ماسەلەلەردىڭ وزدەرىڭىزبەن سايكەسە وتىرىپ شەشۋگە ارەكەت ەتكىم كەلگەن.

سوعان بايلانىستى، جاقىندا ارىپتەسىڭىز ەرمۇرات باپي اعامەن اقىلداسىپ، ەرەكەڭ ارقىلى وسى وتىنىشپەن وزىڭىزگە قولقا سالىپ ەدىم.

وكىنىشكە وراي، ءسىز مەنىڭ ول ءوتىنىشىمدى قابىلداماپسىز.

شاماسى، ماعان وكپەلەگەن كورىنەسىز.

ساياساتتى قايىرىپ قويىپ، قازاقى جولمەن ءجون سۇراسساق، ءسىز – ارعىننىڭ، مەن – نايماننىڭ ۇرپاعىمىز. ءسىز اعا بالاسىسىز. سىزدەر وتىرعان جەردە ءبىز ءسوز باستامايمىز، باتا دا جاسامايمىز. اتالارىم سولاي ۇيرەتكەن...

ارينە، ءسىزدىڭ وكپەڭىز دە، رەنىشىڭىز دە ورىندى.

ارتىق كەتكەن جەرىم ءۇشىن مەن دە وزىڭىزدەن اشىق كەشىرىم سۇرادىم.

بىراق، ماسەلە ءسىز بەن ءبىزدىڭ جەكە باسىمىزعا قاتىستى قايشىلىقتان تۋىنداپ وتىرعان جوق قوي!

جالپى، مەن مامىلەنىڭ، كەلىسىمنىڭ ادامىمىن. اعانى سىيلاۋ مەن قۇرمەتتەۋدى، ارينە، مەن دە جاقسى بىلەمىن.

بىراق، سويتە تۇرا، مەنى ءسىزدىڭ اتىڭىزعا قاتتى-قاتتى سوزدەر ايتقىزۋعا دەيىن اپارعان – تاعى قايتالاپ ايتام، مەنىڭ جەكە باسىمنىڭ مۇددەسى ەمەس، شەكارا سىرتىندا قالىپ، تاعدىرى قىل ۇستىندە تۇرعان التى-جەتى ميلليون قازاقتىڭ تاعدىرى!

ونى، ەراعا، ءسىز اقىلدى ادامسىز عوي، وتە جاقسى بىلەسىز جانە تەرەڭ تۇسىنەسىز دەپ ويلايمىن!

ءيا، مەن قاي ماسەلە تۋرالى بولماسىن، الدىمەن سىزدەر جاققا سىپايىلاپ حات جازامىن.

ماسەلە بىردەن شەشىلىپ جاتسا، وعان ءومىر بويى العىسىمدى جاۋدىرىپ جۇرەمىن.

ال، شەشىلمەسە، كەمىندە ءۇش مارتە قايتالاپ حات جولدايمىن!

ول حاتتارىم دىتتەگەن جەرىنە جەتپەي، وزگە مەكەمەگە لاقتىرىلا بەرگەن سوڭ، جايلاپ «اشىق حات» جازۋعا كوشەمىن.

ال، قۇزىرلى ورگان باسشىلارى وعان دا قۇلاق اسپاعان جاعدايدا، ايقايعا باسۋعا، اتى-ءجونىن اتاپ تۇرىپ سىناۋعا تۋرا كەلەدى.

تۋىنداعان ماسەلەنى ۋاعىندا كوتەرىپ، شەشۋگە ىقپال ەتپەسەڭ، ەلدىڭ تىنىشتىعى بۇزىلادى، ەرتەڭ پرەزيدەنتتىڭ ابىرويىنا داق تۇسەدى، ارتى تراگەدياعا اپارىپ سوعۋى مۇمكىن...

سودان بارىپ، سىزدەر ماعان وكپەلەيسىزدەر!

جالپى، مەن سىزگە اقىل ايتۋدان اۋلاقپىن.

دەگەنمەن، ادام تاعدىرىن شەشەتىن قىزمەتتە وتىرعان باسشىلار وكپەشىل، كەكشىل بولماۋى ءتيىس!

بۇل جاعىنان كەلگەندە، كەڭدىك پەن كەشىرىمشىلدىكتى قاسىم-جومارت كەمەلۇلىنان ۇيرەنۋ كەرەك دەپ ەسەپتەيمىن.

ەگەر، قاسىم-جومارت كەمەلۇلى وكپەشىل، كەكشىل بولسا، وندا بۇگىن ەرمۇرات باپيدى ماجىلىستىڭ تورىنە وتىرعىزباس ەدى;

ەگەر، قاسىم-جومارت كەمەلۇلى وكپەشىل، كەكشىل بولسا، وندا بۇگىن ءسىز ات-تۇيەدەي قالاپ اكەلىپ دەپۋتات جاساعان رينات زايتوۆتى ماجىلىس تۇرماق، پارلامەنت ءۇيىنىڭ ماڭىنا جولاتپاس ەدى;

ەگەر، قاسىم-جومارت كەمەلۇلى وكپەشىل، كەكشىل بولسا، وندا بۇگىن ابزال قۇسپان مەن ەلنۇر بەيسەمباەۆتى دا ماجىلىستەن كورمەس ەدىك...

دەپۋتات بولاردا وسى جىگىتتەردىڭ قاي-قايسى دا قاسەكەڭنەن دىزەرلەپ بارىپ كەشىرىم سۇراماعانى بەلگىلى.

ارى كەتكەندە ەرلان قارين ارا اعايىندىق جاساعان بولۋى مۇمكىن...

قۇرمەتتى ەراعا!

جالپى، ەراعا، ەسىڭىزدە بولسىن، ۇلى كوشكە مۇددەلى قاۋىم – از حالىق ەمەس! ولار ارتتا قالعان ەلدىڭ تاعدىرىنا قاتتى الاڭداۋلى. سونداي-اق، كوشىپ كەلگەن اعايىننىڭ قۇجاتتانۋ پروتسەسسى كىمدەر جاعىنان قيىنداتىلىپ وتىرعانىن جانە وعان قايسى جاۋاپتى تۇلعالاردىڭ نەمكەتتى پيعىلمەن ارەكەتسىزدىك تانىتىپ كەلە جاتقانىن دا وتە جاقسى بىلەدى...

اللا قالاسا، ەرتەڭ VIII شاقىرىلىمنىڭ دا مەرزىمى بىتەدى. پارتياڭىزدى باستاپ، سايلاۋدا سول حالىقتىڭ الدىنا باراسىز. ءسىز بارماساڭىز، ءسىزدىڭ ورنىڭىزعا ەلنۇر بەيسەمباەۆ باستاعان، امانجول التاەۆ پەن اسحات ايماعامبەتوۆ قوستاعان ىنىلەرىڭىز بارۋى مۇمكىن.

و، سوندا «امانات» پارتياسىنىڭ ۇلى كوشكە مۇددەلى قاۋىمعا ايتار بەتجۇزدىك بىردەمەسى بار ما ءوزى؟!

مەنى قىنجىلتاتىن دا، الاڭداتاتىن دا – وسى سۇراق!

كىلەڭ قيانات جاساۋمەن كەلەدى.

ەندىگى جەردە زايتوۆتىڭ ءسوزى ولارعا وتە قويمايدى...

ءيا، «امانات» پارتياسى الىستان ورالعان اعايىننىڭ داۋىسىنا ءزارۋ دە ەمەس شىعار. بىراق، اشىنعان جۇرت اياۋلى ىنىلەرىڭىزدى يت قوسىپ قۋسا، بەتىنە تۇكىرسە قايتەسىز؟!

مەن قاسىم-جومارت كەمەلۇلىنىڭ جاناشىر ءىنىسى، تىنىمسىز قولداۋشىسى رەتىندە ماسەلەنىڭ بۇل جاعىن دا اۋىق-اۋىق ويلاپ ءجۇرمىن. الداعى سول كۇندەردى ويلاسام، ەكى بەتىم دۋىلداپ، ارقامنان سۋىق تەر شىعىپ كەتەدى...

قۇرمەتتى ەرلان جاقانۇلى!

اتقارۋشى بيلىك پەن زاڭ شىعارۋشى ورگان «اتا جولى» كارتاسىمەن قاسەكەڭدى ۇياتقا قالدىردى.

توبەمدە قۇداي تۇر عوي، ەرتەڭ تاعى وسىنداي ۇيات بولىپ جۇرە مە دەپ قاتتى الاڭدايمىن.

وسى حاتتى سىزگە ادەيى رامازان ايىندا، ءولى تۇندە جازىپ وتىرمىن. قاسىم-جومارت كەمەلۇلى: «ءبىرىنشى باسشىلار ازاماتتاردى جەكە قابىلداۋعا ءتيىس. بۇل – وتە ماڭىزدى», - دەدى سوڭعى اشىلعان ۇكىمەتتىڭ كەڭەيتىلگەن جينالىسىندا.

قازاق ايتادى عوي، «كويلەكتىڭ كىرى جۋسا كەتەدى، كوڭىلدىڭ كىرى ايتسا كەتەدى...» دەپ. كوڭىلىمدە جۇرگەن ءبىراز ءسوزدى حات ارقىلى بولسا دا سىزگە اقتارىپ، كادىمگىدەي جەڭىلدەپ قالدىم.

وسىعان دەيىن كوشى-قون ماسەلەسى بويىنشا قابىلداۋىڭىزدى سۇراۋمەن كەلدىم، قابىلدامادىڭىز...

ەندى وكشەڭىزدى باسىپ كەلە جاتقان ءىڭىڭىز رەتىندە مەنىڭ سىزگە سالەم بەرىپ بارعىم، سىزبەن جەكە وتىرىپ اڭگىمەلەسكىم، پىكىرلەسكىم كەلەدى...

مەنى جەكە قابىلداۋىڭىزدى سۇرايمىن!

قۇرمەتپەن، اۋىت مۇقيبەك

Abai.kz