ترامپتىڭ اق ۇيگە قايتا ورالىپ، ەكىنشى پرەزيدەنتتىك مەرزىمىن باستاعانىنا 100 كۇن تولدى.

قاڭتاردىڭ 20-سى كۇنگى ۇلىقتاۋ مۇراسىمىندە «امەريكانىڭ التىن عاسىرى بۇگىننەن باستالادى» دەپ مالىمدەگەن ول سول كۇننەن باستاپ تاريف شوقپارىن كوتەرىپ، اكىمشىلىك بيلىكتىڭ پارمەنىن كۇشەيتتى. فەدارالدىق جوبالاردى توقتاتتى. بارلىق سالادا: قۇقىق، مەدساقتاندىرۋ، وقۋ-اعارتۋ سالاسىندا رەفورمانى قولعا الدى. امەريكالىقتارعا ءوزى بيلىك قۇراتىن 4 جىلدا امەريكانىڭ ءداستۇرلى سەنىمىن، ەركىندىگى مەن دەموكراتياسىن، بايلىعىن وزىنە قايتارىپ، قۇلدىراۋدان قۇتقارۋعا ۋادە بەردى.

بەرگەن ۋادەلەرى شىندىقتان الشاق بولسا دا، كەيىنگى ايلاردا دا سول سوزىنەن تانعان جوق.

سىرتقى ساياساتتاعى ونىڭ اتى شۋلى «كانادانى اقش-تىڭ 51-ءشى شتاتىنا اينالدىرۋ»، «پاناما مەن گرەنلاند ارالىن قوسىپ الۋ»، «پالەستينالىقتاردى كوشىرىپ، گازانى جۇماققا اينالدىرۋ» باستامالارى الەم جۇرتىنىڭ نارازىلىعىن تۋدىردى. ۋكراينا مەن رەسەي سوعىسىندا ءپۋتيندى ايىپتاۋدىڭ ورنىنا، زەلەنسكيدى كىنالاپ، ابدەن شاتاستى. ونىڭ الەم ەلدەرىنە اشقان تاريف سوعىسى ەل سىرتىندا عانا ەمەس، ەل ىشىندە دە وعان دەگەن سەنىمگە سەلكەۋ ءتۇسىردى.

امەريكالىقتاردىڭ ترامپتىڭ ءجۇز كۇنىنە باعاسى دا ەكىگە جارىلدى. ساۋالناماعا قاتىسقان جانداردىڭ 66 پايىزى ونىڭ جۇرگىزگەن ساياساتىن «دۇرلىكتىرۋ» دەپ باعالاسا، 59 پايىزى «قورقىنىشتى» دەپ سيپاتتاعان. ونى قولداۋشىلار قاتارى باستاپقى 48 پايىزدان 42 پايىزعا تومەندەگەن.

سوعان قاراماستان ترامپتىڭ پارتيالاس جاقتاستارى «ونى 21-ءشى عاسىرداعى ەڭ كەرەمەت پرەزيدەنت» دەپ كوككە كوتەرۋدە. اق ءۇي ءباسپاسوز حاتشىسى ترامپتىڭ ءجۇز كۇنىن «اقش تاريحىنداعى ەڭ شۇىلالى مەرزىمنىڭ باستاۋى» دەپ سيپاتتادى.

دەموكراتتار بولسا ترامپتىڭ بيلىكتى مونوپوليالاپ العانىنا نارازىلىق بىلدىرۋدە. بۇعان ارينە ترامپتىڭ اۋزىنان قاعىنىپ: «ءۇشىنشى رەت پرەزيدەنت بولۋعا كەت ارى ەمەسپىن» دەگەنى سەبەپ بولعانى انىق.

ال ترامپ ءجۇز كۇندىككە وراي: «ءبىز ىستەۋگە ءتيىستىنىڭ ءبارىن ىستەدىك نەمەسە ىستەۋ ۇستىندەمىز. ءبىر عانا كوشى-قون ماسەلەسىن الساق، ءبىز ونى 99.9 پايىزعا جەتكىزە ورىندادىق. ساۋدا جاعىنان بۇرىن ءبىز كۇنىنە ميللياردتاعان دوللار زيان تارتىپ كەلدىك. ەندى مىنە كوپ وتپەي كۇرەپ اقشا تاباتىن بولامىز»، - دەپ پىكىر بىلدىرگەن.

دەسە دە دەموكراتيا پارتيا وكىلدەرى ونىڭ شەشىمدەرىمەن كەلىسپەيدى. ولار: «اقش-تىڭ ورتا تاپ وكىلدەرى ترامپقا داۋىس بەرەم دەپ وڭباي الداندى. ونىڭ تاريف سوعىسى نارىقتىڭ استاڭ-كەستەڭىن شىعاردى»، - دەپ سانايدى.

حالىقارالىق ساراپشىلار دا ترامپتىڭ الەمدىك ەكونوميكاعا، گەوساياساتقا تۇبەگەيلى وزگەرىس اكەلگەن ءجۇز كۇنىن الەمدىك دەڭگەيدەگى جەر سىلكىنىسىنە بالاپ، «ترامپ الەمنىڭ ءنومىرى ءبىرىنشى قۋاتتى ەلى سانالاتىن امەريكانىڭ عانا ەمەس، جاھاننىڭ تاعدىرىن باسقا ارناعا بۇرىپ جىبەردى» دەپ پىكىر بىلدىرۋدە.

Abai.kz