قۇدايدىڭ ەرەكە بالاسىنا اينالىپ، ماڭدايىنان جەل ەسكەن تيمۋر قۇلىباەۆقا دا «اياز ءالىڭدى ءبىل، قۇمىرىسقا جولىڭدى ءبىلدىڭ» كەرى كەلدى.

قولدا بار ەسەپ قيساپقا سەنەتىن بولساق، قۇلىباەۆتار Halyk كومپانياسىنان $435 ملن استام ديۆيدەند الادى ەكەن. 30 ساۋىردە Halyk مسا وتكىزىپ، ءوز اكتسيونەرلەرىنە 2024 جىلعى ديۆيدەندتەر تولەۋ تۋرالى شەشىم قابىلداعان.

ايتا كەتەتىن بولساق، بانكتىڭ وتكەن جىلى تابىستى بولىپ، تازا پايدا 921 ملرد تەڭگەنى قۇراعان. وسى تابىستىڭ 35%-ىن اكتسيونەرلەر اراسىندا ءبولۋ ۇسىنىلدى.

«المەكس» كومپانياسى قۇلىباەۆتار جۇبىنان، Halyk كومپانياسىنان 224 ملرد استام تەڭگە الادى. بۇل شامامەن 435 ملن دوللاردى قۇرايدى. بىراق ونىڭ تابىسى تاپ وسى سومامەن شەكتەلمەۋى مۇمكىن. ويتكەنى، بانك ديۆيدەندتەردى جىلىنا ەكى رەت تولەي الادى. 2024 جىلى Halyk ءوزىنىڭ بارلىق اكتسيونەرلەرىنە تازا پايدانىڭ 55%-ىن ءبولىپ بەرسە، بيىل بار جوعى 35%-دى بەرىپ وتىرۋىنىڭ استارىندا ءبىراز دۇنيەلەر جاتقانى انىق.

بانك توراعاسىنىڭ ورىنباسارى مۇرات كوشەنوۆ تالداۋشىلارمەن بولعان كەزدەسۋدە: «كەڭەس ەكىنشى تولەمدى وسى جىلدىڭ ەكىنشى جارتىسىندا ۇسىنۋى مۇمكىن، بىراق ول شەشىم جىلدىڭ ەكىنشى جارتىسىندا قابىلدانادى. سوندىقتان مەن قازىر ناقتى جاۋاپ بەرە المايمىن. بىراق مەن، ءوزىمىزدىڭ جالپى ديۆيدەندتىك ساياساتىمىزعا سىلتەمە جاساي الامىن، وندا بەلگىلى ءبىر جاعدايلاردا ديۆيدەندتەردى تولەۋ كوەففيتسيەنتى تازا پايدانىڭ 50-دەن 100%-عا دەيىنگى دياپازونىندا بولادى دەپ جازىلعان»، - دەگەن.

بۇل جىرىمدالعان اقشا قۇلىباەۆقا اسا قاجەت بولۋى مۇمكىن، سەبەبى Bloomberg اقپان ايىندا جازعانداي، تيمۋر قۇلىباەۆ ءبىرىنشى پرەزيدەنت كەزىندە جيناقتالعان قارجىسىنا قاتىستى ۇكىمەتتىك تەرگەۋ اياسىندا مەملەكەتكە 1 ملرد دوللار تولەۋ تۋرالى كەلىسسوزدەرگە باسى ءبۇتىن سۇڭگىپ كەتتى.

باسىلىم حابارلاعانداي، ەگەر كەلىسىمگە قول جەتكىزىلسە، نۇرسۇلتان نازارباەۆتىڭ كۇيەۋ بالاسى قاراجاتتىڭ ءبىر بولىگىن اقشامەن، ال ەكىنشى بولىگىن ينۆەستيتسيا تۇرىندە تولەيدى. بۇل رەتتە اتالعان تولەم ونىڭ كەزىندە جالعاندى جالپاعىنان باسىپ جاساعان ەكونوميكالىق-قىلمىستىق كىناسىن باسى ءبۇتىن مويىنداۋىن ەش بىلدىرمەيدى.

وتكەن جىلى قۇلىباەۆتار Halyk كومپانياسىنان 265 ملرد تەڭگەدەن ءسال عانا استام قاراجات الا العان. ياعني، ءوز اكتسيونەرلەرىن اقشادان قاققان قۇلىباەۆ تەك بانكتەن تۇسكەن تابىسى ارقىلى عانا 2 جىل ىشىندە ديۆيدەندتەر الىپ، مەملەكەت الدىنداعى قارىزىن تەز ارادا جابا الادى، دەپ جازادى Bloomberg.

Abai.kz