Qazaq Air اۋە كومپانياسىنىڭ اتاۋى VietJet Kazakhstan بوپ وزگەرەدى. بۇل تۋرالى «سامۇرىق-قازىنا» اق باسقارما توراعاسى نۇرلان جاقىپوۆ ەلوردادا قازاقستان-ۆەتنام ىسكەرلىك دوڭگەلەك ۇستەلىندە ايتتى.

2023 جىلى Qazaq Air كومپانياسىن ۆەتنامدىق VietJet Air ساتىپ الاتىنى جاريالانعان ەدى.

ن. جاقىپوۆتىڭ ايتۋىنشا، بۇل مامىلە جەكەشەلەندىرۋدىڭ كەشەندى جوسپارى اياسىندا جۇزەگە اسىرىلدى. ساتىپ الۋشى رەتىندە SOVICO Group كومپانياسى بەلگىلەندى.

− مامىلەنىڭ بارلىق شارتتارى ورىندالدى، تولەم قابىلداندى، ال اكتسيالار ينۆەستوردىڭ جەكە شوتتارىنا بەرىلدى. اتالعان ستراتەگيالىق ارىپتەستىك اۋە تاسىمالداۋشى مەن سالانىڭ دامۋىنا وڭ اسەر ەتۋگە باعىتتالىپ قانا قويماي، قازاقستان مەن ۆەتنام اراسىنداعى ەكونوميكالىق بايلانىستاردى نىعايتۋدىڭ جاڭا كوكجيەكتەرىن اشىپ، ءوزارا ءوسىم مەن وڭىرلىك قاتىناستاردىڭ دامۋىنا جول اشادى. ءبىز SOVICO Group پەن VietJet Air كومپانيالارىنىڭ Qazaq Air-ءدى VietJet Kazakhstan جاڭا برەندى اياسىندا باسقارۋعا جانە وپەراتسيالىق قىزمەتىنە قاتىسۋ نيەتىن جوعارى باعالايمىز. وڭىردەگى مارشرۋتتىق جەلىنىڭ كەڭەيۋى كولىك بايلانىسىن نىعايتىپ، جاڭا ەكونوميكالىق ءوسۋ نۇكتەلەرىن قالىپتاستىرادى. ەندى ءبىز اۋقىمدىراق جانە ءبىر-بىرىمىزگە جاقىنىراق بولامىز، − دەدى نۇرلان جاقىپوۆ.

ەسكە سالساق، 2023 جىلدىڭ جەلتوقسانىندا «سامۇرىق-قازىنا» Qazaq Air اكتسيالارىن ساتىپ الۋ-ساتۋ شارتىنا قول قويىلعانىن حابارلادى.

2023 جىلى قازاقستان ۆەتنامنىڭ VietJet Air اۋە كومپانياسىمەن مەموراندۋم جاساعان ەدى.

بۇل رەتتە ۆەتنامدىق ينۆەستور بىرقاتار مىندەتتى ورىندايدى، كومپانيانىڭ اۋە پاركىن Boeing جانە Airbus ۇشاقتارىمەن تولىقتىرادى.

Abai.kz