ترامپ ەكىنشى پرەزيدەنتتىك مەرزىمىن باستاعان 20-شى قاڭتاردا حاماس پەن يزرايل اتىستى ۋاقىتشا توقتاتىپ، تۇتقىن الماسۋدى باستاعان ەدى. ارتىنان نەتانياحۋ العاشقى شەتەلدىك قوناق رەتىندە اق ۇيگە ات باسىن تىرەپ، سول جولى ترامپ الەم ەلدەرىنىڭ نارازىلىعىن تۋدىرعان پالەستينالىقتاردى كۇشتەپ كورشى اراب ەلدەرىنە كوشىرىپ، «گازانى جۇماققا اينالدىرۋ» جوسپارىن جاريالادى.

مامىردىڭ باسىندا يزاريل اسكەرى گازانى قايتادان سوققىنىڭ استىنا الدى. ايماقتى قايتادان تۇمشالادى. گازا تۇرعىندارى قايتادان اشتىق پەن سوعىس قۇربانىنا اينالدى. الەم ەلدەرىنىڭ ەرەكشە نازارىن اۋداردى. انگليا، فرانتسيا، كانادا باسشىلارى يزرايل بيلىگىنىڭ شەكتەن شىققانىن ەسكەرتىپ، قاتاڭ شارالار قابىلدايتىنىن ەسكەرتتى.

مامىردىڭ 21-كۇنى گەرمانيا، يسپانيا، رەسەي، قىتاي قاتارلى 31 مەملەكەتتىڭ ەلشىلىك وكىلدەرى يوردانيا وزەنىنىڭ باتىس جاعالاۋىنداعى جەنين قالاسىنا تەكسەرۋگە بارعاندا ودان ءبىر كۇن بۇرىن كىرگەن ازىق-تۇلىك تيەگەن جۇك كولىكتەرىنىڭ قاڭتارىلىپ تۇرعانىن، تىرشىلىك ءنارىنىڭ قورعانسىز حالىققا مۇلدە تاراتىلماعانىن كورگەن. ەۆرەي اسكەرى ولارعا ەسكەرتۋ وق اتىپ، سەس كورسەتكەن. ارتىنان «شەكتەلگەن اۋماققا ەندى» دەپ اقتالعان.

نەتانياحۋ جەندەتتەرىنىڭ ديپلوماتتارعا وق جاۋدىرعان استامشىلىعىن جوعارداعى مەملەكەتتەرمەن قاتار حالىقارالىق قاۋىمداستىقتار قاتاڭ ايىپتادى. الەم ەلدەرىنىڭ ترامپ بيلىككە كەلگەلى باسەڭسىگەن ەۆرەيلەرگە قارسى نارازىلىعىن قايتا تۇتاتتى. كەشە باسقا ەمەس امەريكادا نيۋ-يوركتە يزرايلدىڭ اقش-تاعى ەلشىلىگىنىڭ ەكى قىزمەتكەرىن اقش فەدارالدى مەكەمەسىنىڭ الدىندا اتىپ كەتتى. قىلمىسكەر قولعا تۇسەر الدىندا «پالەستينا جاساسىن» دەپ ايقايلاعان.

اقش پرەزيدەنتى بۇل قىلمىستى ايىپتاپ: «امەريكادا تەرروريزم مەن ناسىلشىلدىككە جول جوق» دەدى. ول ءبىر اي بۇرىن گارۆارد ۋنيۆەرسيتەتى باسشىلىعىن ستۋدەنتتەر اراسىنداعى پالەستينانى قولداپ، ەۆرەيلەرگە قارسى ەرەۋىلگە شىعۋ قوزعالىسىنا استىرتىن جول بەردى دەپ ايىپتاپ، ايعاقتاردى تاپسىرۋىن، بولماسا جازالايتىنىن ەسكەرتكەن ەدى. گارۆارد ونىڭ ءوزىن سوتقا بەرىپ، كەشەگى شىعارعان «72 ساعاتتا ايتقانىمدى ورىنداماساڭ، شەتەلدەن ستۋدەنت قابىلداۋ قۇقىنان ايىرامىن» دەگەن قۇقايىن دا پىسقىرعان جوق.

كوزى قانتالاعان نەتانياحۋ بولسا حاماس قارۋىن تاپسىرمايىنشا، بيلىكتەن كەتپەيىنشە سوعىستى توقتاتپايتىنىن مالىمدەدى. ول حاماس اسكەري قولباسشىسى ياحيا ءال-سينۋاردىڭ ورىنىن باسقان باۋىرى مۇحاممەت ءال-سينۋاردىڭ ەۆرەي اسكەرىنىڭ شابۋىلىنان ءبىر جەردە ءولىپ جاتقانىنا بەك سەنىمدى.

ايتا كەتەيىك ترامپ جاقىندا عانا پارسى شىعاناعىنداعى ءۇش باي اراب ەلىنە ساپارلاي بارىپ قۇنى 3 تريليون دوللاردان استام كەلىسىم شارتقا قول قويىپ قايتقان ەدى. ورتا شىعىستاعى امەريكانىڭ ەڭ جاقىن وداقتاسى سانالاتىن يزرايلگە بارعان جوق. ساياسي ساراپشىلار سوعان قاراپ ەكى ەل قاتىناسىنا سىزات تۇسكەنىن بولجاعان ەدى. نەتانياحۋ ونى مويىندامادى.

Abai.kz