قازاقستان قورعانىس سالاسىندا كرەمل ءۇشىن سوققى بولارلىقتاي قادام جاسادى. ۇجىمدىق قاۋىپسىزدىك شارتى ۇيىمىنداعى (ۇقشۇ) رەسەيدىڭ وداقتاسى بولىپ تابىلاتىن قازاقستان ناتو ەلدەرىمەن اسكەري ىنتىماقتاستىقتى كەڭەيتە باستادى.

«قازاقستان مەن ۇلىبريتانيانىڭ قورعانىس مينيسترلىكتەرى اعىمداعى جانە الداعى جىلدارعا ىنتىماقتاستىق تۋرالى كەلىسىمگە كەلدى. قۇجاتقا قازاقستاندىق دەلەگاتسيانىڭ ۇلىبريتانيا استاناسىنا ساپارى بارىسىندا قول قويىلدى»، - دەپ حابارلادى رەسپۋبليكا قورعانىس ىستەرى دەپارتامەنتىنىڭ ءباسپاسوز قىزمەتى.

كەزدەسۋ بارىسىندا تاراپتار ىنتىماقتاستىقتىڭ قازىرگى جاي-كۇيىن تالقىلاپ، الداعى ۋاقىتتاعى مىندەتتەردى بەلگىلەدى. نەگىزگى باعىتتاردىڭ ءبىرى – قازاقستاندىق ساربازداردى ۇلىبريتانياداعى اسكەري جوعارى وقۋ ورىندارىندا وقىتۋ بولماق. جوسپاردا بىتىمگەرشىلىك جاتتىعۋلارى مەن اعىلشىن ءتىلى كۋرستارى دا بار.

وتكەن جىلى استانا مەن لوندون ستراتەگيالىق ارىپتەستىك تۋرالى قۇجاتقا قول قويدى. سودان كەيىن ۇلىبريتانيا سىرتقى ىستەر مينيسترلىگىنىڭ باسشىسى ورتالىق ازياداعى ساۋدا، تۇراقتى دامۋ جانە ايماقتىق ىنتىماقتاستىق سالالارىنداعى جوبالارعا 50 ميلليون فۋنت ستەرلينگ بولەتىنىن حابارلادى.

ءوسىپ كەلە جاتقان گەوساياسي شيەلەنىس جاعدايىندا قازاقستان قورعانىس سالاسىن نىعايتۋدى جالعاستىرۋدا. وتكەن ايدا ارتيللەريالىق وق-ءدارى شىعاراتىن جاڭا زاۋىتتىڭ قۇرىلىسى باستالدى، ونىڭ ىشىندە ناتو ستاندارتتارى بويىنشا 155 مم سناريادتار شىعارۋ ءىسى قولعا الىندى. ماقسات – قارۋ-جاراق يمپورتىنا تاۋەلدىلىكتى ازايتۋ.

بۇل رەتتە استانا سىرتقى ساياساتىن ءارتاراپتاندىرۋدا جانە رەسەيمەن جاڭا وداقتار مەن بىرلەستىكتەرگە كىرۋگە ساقتىقپەن قارايدى.

جاقىندا قازاقستان پرەزيدەنتى قاسىم-جومارت توقاەۆ ەلىمىزدىڭ بريكس-كە قوسىلۋدى جوسپارلامايتىنىن جانە سەرىكتەس مارتەبەسىمەن شەكتەلەتىنىن ايتتى. بۇل شەشىمدى تۇسىندىرگەن قازاقستان باسشىسى «پراگماتيكالىق سەبەپتەردى» جانە ۇيىمنىڭ ناقتى قۇرىلىمىنىڭ جوقتىعىن العا تارتتى.

كەرىمسال جۇباتقانوۆ،

تاريح عىلىمدارىنىڭ كانديداتى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ دوتسەنتى

Abai.kz