رەسەي ەلشىسى قازاقستانداعى ورىس ءتىلى مەن ەكىجاقتى قارىم-قاتىناس جايلى پىكىر ءبىلدىردى.

قازاقستانداعى رەسەي فەدەراتسياسىنىڭ ەلشىسى الەكسەي بوروداۆكين رەسەي مەن قازاقستان اراسىنداعى قارىم-قاتىناستىڭ بەرىك ەكەنىن ايتىپ، باتىس سانكتسيالارى بۇل بايلانىسقا كەرى اسەر ەتپەگەنىن مالىمدەدى. ونىڭ ايتۋىنشا، قازىرگى گەوساياسي جاعدايعا قاراماستان، ەكى ەل اراسىنداعى ەكونوميكالىق جانە گۋمانيتارلىق ارىپتەستىك ءوز جالعاسىن تابۋدا.

«رەسمي ەمەس مالىمەتتەرگە سايكەس، رەسەي تاراپىنان قازاقستان ەكونوميكاسىنا سالىنعان ينۆەستيتسيا كولەمى 56 ميلليارد دوللارعا جۋىقتادى. بۇگىندە قازاقستان اۋماعىندا 20 مىڭنان استام بىرلەسكەن رەسەي-قازاق كاسىپورنى تابىستى جۇمىس ىستەپ جاتىر»، – دەدى بوروداۆكين.

ديپلومات سونىمەن قاتار قازاقستان پرەزيدەنتى قاسىم-جومارت توقاەۆتىڭ مالىمدەمەسىنە سۇيەنىپ، رەسەيدىڭ جاھاندىق قىسىمدارعا توتەپ بەرىپ جاتقانىن اتاپ ءوتتى.

«رەسەي ءتۇرلى قيىندىقتاردان وتكەنىنە قاراماستان، ەڭسەسىن تۇسىرمەي، قاتەلىكتەردەن ساباق الىپ، ودان سايىن قۋاتتى ءارى ايبىندى مەملەكەتكە اينالىپ وتىر. پرەزيدەنت توقاەۆتىڭ “رەسەي اسكەري تۇرعىدا جەڭىلمەيدى” دەگەن ءسوزى كەزدەيسوق ايتىلعان جوق»، – دەدى ول.

ەلشى قازاقستانداعى ورىس ءتىلى ماسەلەسىنە دە توقتالدى. ونىڭ ايتۋىنشا، قازاقستان بيلىگى ورىس تىلىنە قۇرمەتپەن قاراپ، ناقتى قولداۋ كورسەتىپ وتىر.

«قازاقستاندا ورىس تىلىنە وڭ كوزقاراس ساقتالعان. بيلىك ورىس تىلىنە قولداۋ كورسەتىپ كەلەدى»، – دەپ تۇيىندەدى بوروداۆكين.

بۇل مالىمدەمەلەر ەكى ەل اراسىنداعى سەنىمدى ستراتەگيالىق سەرىكتەستىكتىڭ جالعاسىپ جاتقانىن كورسەتەدى.

الەكسەي بوروداۆكين - 2018 جىلعى 7 اقپاننان باستاپ - رەسەي فەدەراتسياسىنىڭ قازاقستان رەسپۋبليكاسىنىڭ توتەنشە جانە وكىلەتتى ەلشىسى.

2022 جىلى، 7 اقپاندا رەسەي ەلشىسى "نەزاۆيسيمايا گازەتاعا" سۇحبات بەرىپ، بىلاي دەگەن ەدى: "قازاقستاندا ۇلتشىلدىقتىڭ ءورشۋى راسىمەن بار قۇبىلىس ەكەنىن ايتقىم كەلەدى. ونىڭ ۇستىنە كەي جاعدايدا ول ەكسترەميستىك سيپاتتا كورىنىپ قالادى، مىسالى ءتىل ساقشىلارى ىسپەتتەس. الايدا پرەزيدەنت اكىمشىلىگىنىڭ ءبىر باسشىسى ايتقانداي، ۇڭگىر ۇلتشىلدىعى بيلىك تاراپىنان قولداۋ تاپقان ەمەس، كەرىسىنشە زاڭ بويىنشا قۋدالانىپ كەلەدى. اسقىنعان ۇلتشىلدىق پەن رۋسوفوبتىق كوزقاراسى بار ادامدار پرەزيدەنت توقاەۆ قۇرىپ جاتقان جۇيەدە ءسىڭىسىپ كەتە المايدى. 

قازاقستاندا تۇرمىستىق دەڭگەيدەگى كۇندەلىكتى ۇلتشىلدىق كەڭ تاراعان قۇبىلىس ەكەنىن ايتۋ كەرەكپىز. بۇل قازاقستاندا دا، رەسەيدە دە بار "اۋرۋ" .

كورىپ وتىرعانىمىزداي ارادا ءۇش جىل وتكەندە ورىس ەلشىسى باسقاشا سايراپ وتىر. ونىڭ بىلاي كوزقاراسىن جاقسى جاققا وزگەرتۋىنە پرەزيدەنت توقاەۆتىڭ حالىقارالىق ورىس ءتىلىن دامىتۋ قورىن قۇرۋ باستاماسىن كوتەرىپ، ونى جۇزەگە اسىرۋى، ەلىمىزدە رەسەي ۋنيۆەرسيتەتەرىنىڭ فيلالىن اشۋ قاۋىرت قولعا الىنۋى، قازاعى كوپ وڭتۇستىك وڭىرلەردە رەسەي قارجىسىمەن  ورىس ءتىلدى مەكتەپتەردىڭ اشىلۋى، بارىنەن دە اتاپ وتەرلىگى رەسەيدىڭ باتىس سانكتسياسىنان قاشقان 20 مىڭنان استام كاسىپورنىنىڭ قازاقستانعا جايعاسۋى، پۋتيننىڭ موبليزاتسياسىنان قاشقان ميلليون رەسەي ازاماتىنىڭ ەلىمىزدە تۇراقتاپ قالۋى اسەر ەتكەنى انىق.

Abai.kz