بيىل شومىلۋ ماۋسىمىنا قاراي جاڭارعان ينفراقۇرىلىمى بار، ىڭعايلى كولىگى قاراستىرىلعان، قاۋىپسىزدىك شارالارى كۇشەيتىلگەن الاكول تۋريستەردى قارسى الۋعا دايىن، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وسى ورايدا نازارلارىڭىزعا جاڭا ماۋسىمنىڭ 10 باستى يگىلىگىن ۇسىنامىز:

1. ءۇشارال قالاسى باعىتىندا اۋە رەيستەرىنىڭ سانى ارتتى. ەندى الاكولگە كۇن سايىن استانا جانە الماتى قالالارىنان «الماتى-ءۇشارال» جانە «استانا-ءۇشارال» باعىتتارى ارقىلى جەتۋگە بولادى. مەملەكەت تاراپىنان سۋبسيديالانعان بيلەتتەر قۇنى - نەبارى 20 000 تەڭگە. اۋەجايدىڭ ۇشۋ-قونۋ جولاعىن قايتا جاڭارتۋدىڭ ارقاسىندا ءۇشارال قالاسىندا ءىرى اۋە كەمەلەرىن قابىلداۋعا جاعداي جاسالعان.

2. جازعى شومىلۋ ماۋسىمىنا قاراي قوسىمشا پويىزدار ىسكە قوسىلدى. كولگە 13 پويىز جۇرەدى، ونىڭ ىشىندە استانا مەن الماتىدان «تالگو» جۇردەك پويىزى دا بار. وسكەمەن، پاۆلودار، قىزىلوردا، سەمەي جانە اقتوعاي باعىتتارى قوسىلدى.

3. اقشي جانە كوكتۇما اۋىلدارىنا اۆتوبۋس مارشرۋتتارى ۇيىمداستىرىلدى. الماتىداعى «سايران» جانە تالدىقورعانداعى اۆتوبەكەتتەردەن اۆتوبۋستار تۇراقتى جۇرەدى. بيلەت قۇنى - 5 000 تەڭگەدەن 9 000 تەڭگەگە دەيىن.

4. اقشي اۋىلىندا دارىگەرلىك امبۋلاتوريا، ءدارىحانا جانە تاۋلىك بويى جەدەل جاردەم جۇمىس ىستەيدى. وبلىس ورتالىعىنان حيرۋرگتار، كارديولوگتار، تراۆماتولوگتار جانە باسقا دا ماماندار ىسساپارعا جىبەرىلەدى.

5. سۋداعى قاۋىپسىزدىكتى جانە ءورت قاۋىپسىزدىگىن قامتاماسىز ەتۋ ءۇشىن بيىلعى شومىلۋ ماۋسىمىندا اقشي اۋىلىندا تاۋلىك بويى توتەنشە جاعدايلار دەپارتامەنتىنىڭ قۇتقارۋ بولىمشەلەرىنىڭ كەزەكشىلىگى ۇيىمداستىرىلادى. 19 قۇتقارۋشى مەن قوسىمشا 28 پوليتسيا قىزمەتكەرى جاعالاۋدا ءتارتىپتى قامتاماسىز ەتەدى. قۇتقارۋ جۇمىستارىنىڭ تيىمدىلىگىن ارتتىرۋ ءۇشىن 9 قۇتقارۋ مۇناراسى ورناتىلادى.

6. تىيىم سالىنعان جەرلەردە سۋ كولىكتەرىنىڭ باقىلاۋسىز قوزعالىسى ماسەلەسىن رەتتەۋ ماقساتىندا جەتىسۋ وبلىسىندا سۋدى ورتاق پايدالانۋ ەرەجەسى بەكىتىلدى. ەرەجەلەردىڭ ساقتالۋىن كولىكتىك باقىلاۋ ينسپەكتسياسى جۇرگىزەدى، بۇل رەتتە ينسپەكتورلار سانى ۇلعايدى. 3 سۋ كولىك تۇراعى جانە قۇقىق بۇزۋشىلارعا ارنالعان ارنايى 1 ايىپپۇل تۇراعى بولادى.

7. بايلانىس پەن ينتەرنەتتىڭ ساپاسىن ارتتىرۋ ماقساتىندا جاعالاۋدا 16 بازالىق ستانتسيا جۇمىس ىستەيدى، 2024 جىلى وپتيكالىق-تالشىقتى جەلى تارتىلدى. ينتەرنەت بايلانىسىنا تۋريستىك نىساندار كەزەڭ-كەزەڭىمەن قوسىلۋدا.

8. سونداي-اق جاعالاۋدىڭ سانيتارلىق ينفراقۇرىلىمىن جاقسارتۋ ءۇشىن بىرقاتار شارالار قابىلدانۋدا. بۇگىنگە دەيىن 11 سانيتارلىق-گيگيەنالىق توراپ قويىلعان، ماۋسىمنىڭ سوڭىنا دەيىن تاعى 12-ءسى قويىلادى. قوسىمشا 60 قوقىس جاشىگى قويىلىپ، 20 بيوتۋالەت ورناتىلادى.

9. اقشي اۋىلىندا كارىز-تازارتۋ قۇرىلىسى باستادى، بۇل – ءوڭىردىڭ ەكولوگيالىق قاۋىپسىزدىگىن قامتاماسىز ەتۋگە دەگەن ماڭىزدى قادام.

10. ەلەكترمەن ۇزدىكسىز جابدىقتاۋدى قامتاماسىز ەتۋ ءۇشىن جاڭا «اقشي» قوسالقى ستانتسياسىنىڭ قۇرىلىسى جۇرگىزىلۋدە، بيىل بەسكولدەن اقشيگە دەيىن جوعارى ۆولتتى ەلەكتر بەرۋ جەلىلەرىن سالۋ جۇمىستارى اياقتالادى. سونداي-اق، كوكتۇما جانە اقشي اۋىلدارىندا جاعالاۋدى نىعايتۋدىڭ اۋقىمدى جۇمىستارى باستالدى.

جەتىسۋ وبلىسىنىڭ الاكول دەمالىس ورنى ءتۋريزمنىڭ ەڭ تانىمال باعىتى رەتىندە ۇنەمى دامۋ ۇستىندە. وعان كولىكپەن بارۋ مۇمكىندىگىن كەڭەيتۋ، قاۋىپسىزدىكتى قامتاماسىز ەتۋ، جاعالاۋدىڭ ەكولوگيالىق ينفراقۇرىلىمى مەن زامانعا ساي قولايلى جاعداي جاساۋ – قازاقستاندىقتار مەن شەتەلدىك تۋريستەر ءۇشىن كول جاعالاۋىندا دەمالۋدى جايلى ەتە تۇسەدى.

Abai.kz