قازاقستان ۋرانعا بوگىپ جاتقان "بۋدەنوۆ" كەنىشىنىڭ باقىلاۋىن تولىقتاي ءوز قولىنا الدى دەپ جازادى Ertenmedia.

بۇعان دەيىن كەن ورنىن باسقارۋدا "روساتومنىڭ" كەلىسىمى قاجەت ەدى. ەندى نەگىزگى شەشىم قابىلداۋ قۇقىعى قازاقستان تاراپىنا ءوتتى.

كەلىسىمنىڭ ەگجەي-تەگجەيى "سامۇرىق-قازىنانىڭ" ەسەپتى قۇجاتىندا جاريالانعان. قازاقستان كەنىشتى باسقارۋ تەتىگىن وزىنە قايتارۋ ءۇشىن ەشقانداي تولەم جاساماعان.

رەسمي ۇلەس بۇرىنعىداي 51 پايىز كۇيىندە قالعانىمەن، ەندى كەنىشتىڭ جۇمىسىن رەتتەۋ (وندىرىستىك شەشىم قابىلداۋ) ءۇشىن ماسكەۋدىڭ ماقۇلداۋىن كۇتىپ وتىرمايمىز. بۇرىن ەكى تاراپ مىندەتتى تۇردە كەلىسىپ شەشكەن ماسەلەلەردى ەندىگىدە قازاتوم كوپشىلىك داۋىس نەگىزىندە ءوز بەتىنشە قابىلداي بەرەدى.

وندىرىستىك باقىلاۋدىڭ قازاقستانعا وتۋىنە بايلانىستى بىرلەسكەن كاسىپورىنداعى وتاندىق ۇلەستىڭ نارىقتاعى قۇنى قايتا ەسەپتەلىپ، ناتيجەسىندە ەل بيۋدجەتىنە ءبىر رەتتىك  295,7 ملرد تەڭگە پايدا تۇسكەن.

وسى مامىلە بويىنشا بىرلەسكەن كاسىپورىن اكتيۆىنىڭ باعالاۋ قۇنى دا ءوسىپ، قازىرگى نارىقتىق باعاسى 707,1 ملرد تەڭگەگە جەتتى.

كەنىشتىڭ ستراتەگيالىق ماڭىزى زور. جالپى قورى 114 مىڭ توننا ۋرانعا باعالانىپ وتىر. بۇعان دەيىن "قازاتوم" وسى كەنىشتىڭ 18 مىڭ توننا ۋرانى بار قوسىمشا ۋچاسكەسىن پايدالانۋعا قۇقىق العان.

"بۋدەنوۆ" ۋران كەنىشى تۇركىستان وبلىسىنىڭ سوزاق اۋدانىندا ورنالاسقان. "روساتوم" كەنىشتىڭ 49 پايىز اكتسياسىنا يەلىك ەتەدى.

Ertenmedia-عا جەتكەن مالىمەت بويىنشا رەسەيلىك الپاۋىت "سامۇرىق قازىناعا" 1,6 ملرد دوللار ساناپ بەرگەن. كەلىسىمدى "گازپروم" قارجىلاندىرعان. ورىستار 2045 جىلعا دەيىن كەنىشتىڭ قىزىعىن كورمەك. "بۋدەنوۆتەگى" بارلانعان ۋران قورى 250 مىڭ توننادان اسىپ جىعىلادى.

وسىدان ەكى جىل بۇرىن Bloomberg "قازاتومپرومنىڭ" ەكس-باسشىلىعى: باس ديرەكتور عالىمجان ءپىرماتوۆ، باسقارما توراعاسى ءماجيت ءشارىپوۆ، باس وپەراتسيالىق ديرەكتور اسىلان بولەكباي جانە باسقا دا توپ-مەنەدجەرلەر كەنىشتى رەسەيلىك مونوپوليسكە ساتۋعا قارسى بولعانىن جازعان ەدى.

سەبەپ: قۇپيا، استىرتىن جاسالعان كەلىسىمنىڭ ءمان-جايى بەلگىلى بولسا، تاياقتىڭ ءبىر ۇشى وزدەرىنە تيەدى دەپ الاڭداعان. رەسەيلىك مونوپوليسپەن كەلىسسوز جابىق ەسىك جاعدايىندا جۇرگەن.

Abai.kz