شەرزات پولات ءىسى بويىنشا سوتتالعاندار اپەللياتسيالىق شاعىم ءتۇسىردى. بۇل تۋرالى شەرزات پولاتتىڭ وتباسىنىڭ مۇددەسىن قورعايتىن ادۆوكات مەيرام شەكەەۆ حابارلادى.

بۇل شاعىمدى شىڭعىس بەلعوجaەۆ پەن دۋمان ىسقاق وتباسىلارىنان باسقالارىنىڭ بارلىعى بەرگەنىن ايتتى.

ادۆوكاتتىڭ مالىمدەۋىنشە، ەكى قىز بەن ەكى جىگىتكە قاتىستى ۇكىم جاريالانعان ساتتە، قورعاۋ تاراپى سوتتىڭ ۇكىمىمەن قاتار، پروكۋرورعا قاتىستى شىعارىلعان جەكە قاۋلى بويىنشا دا شاعىم تۇسىرگەن.

ونىڭ ايتۋىنشا، ايىپتالۋشى تاراپ ۇكىمدى العاننان كەيىن 15 كۇن ىشىندە شاعىمدانۋعا زاڭدى قۇقىقتارى بولعان جانە بۇل مەرزىمدە شاعىم رەسمي تۇردە بەرىلگەن.

"شەرزات پولاتتى ءولتىرۋ ءىسى بويىنشا ايىپتالۋشىلاردىڭ تۋىستارى اتىنان الەۋمەتتىك جەلىلەردە پىكىر ءبىلدىرىپ جۇرگەن باۋرجان ابدراحمانوۆ تا سوت الدىندا جاۋاپ بەرگەن", - دەدى ادۆوكات.

وسىدان بۇرىن ول جەكە پاراقشاسىندا ونلاين رەجيمدە وتكەن سوت وتىرىسىنىڭ بەينەجازباسىن جاريالاعان. ونىڭ ايتۋىنشا، بۇل ءىس بويىنشا قاجەتتى ساراپتامالار تاعايىندالعان.

تالدىقورعان قالالىق سوتىندا 5 ماۋسىم كۇنى شەرزات پولاتتىڭ ىسىنە قاتىستى تورەعالىق ەتۋشى سۋديا ەرجان جانۇزاقوۆ سوت ۇكىمىن شىعاردى. ىسكە قاتىستى 9 سوتتالۋشىدان جاۋاپ الىندى.

سوت قورىتىندىسى بويىنشا ءجاسوسپىرىمنىڭ ولىمىنە كىنالى دەپ:

- باستى ايىپتالۋشى ابزال شىناسىل 23 جىلعا;

- راۆيل ساكيەۆ 20 جىلعا ;

- ازامات توقتاۋباەۆ 15 جىلعا;

- نۇرقياس ءىلياسوۆ 9 جىلعا سوتتالدى.

سونداي-اق شىڭعىس بەلعوجاەۆ، دارحان اسكەنتاي، نۇربول توقتاۋباەۆ، ديدار قالياحمەتتى 7 جىلعا ورتاشا قاۋىپسىزدىكتەگى مەكەمەدە جازاسىن وتەۋگە ۇكىم شىعارىلدى.

كامەلەتكە تولماعان جاسوسپىرىمگە شەرزات پولاتتىڭ اكەسى قارجاۋباي نۇرىموۆ كەشىرىم بەرەتىنىن ايتقان. وعان «اسا اۋىر قىلمىستى حابارلامادى» دەگەن ايىپ تاعىلىپ، 1 جىل 6 اي مەرزىمگە كامەلەتكە تولماعاندارعا ارنالعان تۇزەۋ مەكەمەسىنە جىبەرىلدى.

Abai.kz