ەلىمىزدە ايەلدەرگە ارنالعان 6 تۇرمە بار. ءىىم مالىمەتىنشە، ونداعى سوتتالعان ايەلدەر سانى 2700 جۋىق، ونىڭ 500-ءى – 14 جاسقا دەيىنگى بالاسى بار ايەلدەر، 300-دەن استامى – كوپ بالالى انا.

بۇل ساندار جىلداپ ەمەس، اي ساناپ ارتىپ كەلەدى. نەگە تۇرمەدە انا مەن بالا كوبەيدى؟ بۇل سۇراققا «ءتۇيىن» باعدارلاماسىندا زاڭگەر، ۇلتتىق قۇرىلتايدىڭ مۇشەسى ايمان وماروۆا جاۋاپ بەردى.

زاڭگەر ايەلدەر كولونياسىنداعى احۋال ناشار دەپ دابىل قاعىپ، بۇل جاعدايدى مەملەكەت باسشىسىنىڭ دەڭگەيىنە دەيىن جەتكىزدى.

- وسى ماسەلە بويىنشا پرەزيدەنت ۇلتتىق قۇرىلتايدا ءتيىستى ورگاندارعا ارنايى تاپسىرما بەرگەنىن بىلەسىز. قۇرىلتاي اياقتالاسىمەن 10 مينۋتتان كەيىن ماعان جوعارعى سوتتىڭ قىلمىستىق ىستەر جونىندەگى سوت القاسىنىڭ توراعاسى نازگۇل راحمەتۋللينا حابارلاستى. ءوزارا پىكىر الماسىپ، بۇل سۇراقتى تالقىلادىق. ماڭىزدىسى –امنيستيا ەمەس. سەبەبى امنيستيا – تەك ءبىر رەتتىك شارا. ماسەلەنى تۇبەگەيلى شەشۋ قاجەت. ارينە، قازىرگى كەزدە امنيستيا كەرەك. بىراق مەن پرەزيدەنتكە جولداعان حاتىمدا تەك راقىمشىلىق جاريالاۋ تۋرالى ايتقان جوقپىن. تۇبەگەيلى وزگەرىستەردى ەنگىزۋ جونىندە ۇسىنىستاردى جازدىم, - دەدى ايمان وماروۆا.

سۇحبات بارىسىندا زاڭگەر سوت ديسكرەتسياسىن جولعا قويۋدى ۇسىنعانىن مالىمدەدى:

- باس پروكۋراتۋرانىڭ ستاتيسكاسىنا سۇيەنسەك، ايەلدەر اراسىندا ەڭ ءجيى تىركەلگەن قىلمىس تۇرلەرى – الاياقتىق، اقشا جىمقىرۋ. ايەلدەر اراسىنداعى اۋىر قىلمىستاردىڭ دەنى ءوزىن-ءوزى قورعاۋ كەزىندە ورىن العان. بىراق ونداي ايەلدەرگە سوتتىڭ كوزقاراسى ناشار. اسىرەسە سوت ەر ادام بولسا، ونداي ايەلدەردى ايامايدى. مىسالى، زاڭ بويىنشا جۇكتi ايەلدەردiڭ جانە جاس بالالارى بار ايەلدەردىڭ جازانى وتەۋiن كەيiنگە قالدىرۋ قاراستىرىلعان. بىراق كوپ جاعدايدا سوت ونداي مۇمكىندىكتى بەرمەگەن. قازىر ايەلدەر تۇرمەسىندە ورىن جوق. جاۋعاشاتىنىڭ ءوزى لىق تولى. ونىڭ ءليميتى – 550 ورىن، ال ول جەردە 650 ادام وتىر.

زاڭگەر تەك امنيستيامەن شەكتەلمەي، بۇل سالادا رەفورمالار كەرەك دەپ سانايدى:

- ايەلدەر قازىر تۇرمەدە نەمەن اينالىسىپ جاتىر؟ ولارعا جاڭا ەشنارسە ۇيرەتىپ جاتقان جوق، جاقسى باعدارلامالار جوق. تۇرمەدەن شىققان ايەلدەر جۇمىسسىز قالماۋ كەرەك. سوندا ولار ول قايتا قىلمىس جاسامايدى، تۇرمەگە قايتىپ كەلمەيدى. زامان تالابىنا ساي، سۇرانىسى بار كاسىپ ۇيرەتۋ كەرەك.

ەسكە سالساق، ايمان وماروۆا ايەلدەر كولونياسىنداعى جاعداي تۋرالى پرەزيدەنتكە حات جولداعان بولاتىن. ۇلتتىق قۇرىلتايدىڭ ءتورتىنشى وتىرىسىندا مەملەكەت باسشىسى زاڭگەردىڭ ۇسىنىسىن قولداپ، قۇقىق قورعاۋ ورگاندارى مەن دەپۋتاتتارعا تاپسىرما بەردى. قازىرگى كەزدە قازاقستاندا امنيستيا تۋرالى زاڭعا وزگەرىستەر ەنگىزۋ جوسپارلانىپ وتىر.

سۇحباتقا سىلتەمە:

Abai.kz