مۇحاممەد پايعامباردىڭ كاريكاتۋراسى توڭىرەگىندەگى داۋ-داماي: ىستامبۇلدا نارازىلىق بىلدىرۋشىلەر «Leman» جۋرنالىنىڭ رەداكتسياسىنا شابۋىل جاساۋعا تىرىستى.

«Leman» جۋرنالى 26 ماۋسىمدا مۇحاممەد پەن مۇسا پايعامبارلاردىڭ كاريكاتۋرالارىن جاريالادى. وندا مۇحاممەد پايعامباردىڭ مەن مۇسا پايعامباردىڭ بومبالاۋ فونىندا اۋەدە ءبىر-ءبىرىن سالەم بەرىپ تۇرعانى بەينەلەنگەن.

بۇل جاريالانىمدى تۇركيا باسشىلىعىنىڭ وكىلدەرى دە ايىپتادى. ال 30 ماۋسىمعا قاراعان ءتۇنى ىستامبۇلدا «Leman» ساتيرالىق جۋرنالى عيماراتىنىڭ الدىنا جينالعان حالىق جاپپاي نارازىلىقتارىن ءبىلدىردى. اشۋ-ىزاعا بۋلىققان جۇزدەگەن دەمونسترانت باسىلىم كەڭسەسىنىڭ الدىنا جينالىپ، ءدىني ۇرانداردى («تاكبير») ايقايلاپ ايتىپ، ىشكە كىرۋگە تىرىستى. ولار عيماراتقا كىرە الماعان سوڭ، اكتسيانىڭ كەيبىر قاتىسۋشىلارى جاقىن ماڭداعى دامحانالارعا شابۋىل جاساي باستاعان. ارتىنشا سول ماڭعا پوليتسيا وكىلدەرى جينالعان.

وسىلايشا، مۇحاممەد پايعامباردىڭ كاريكاتۋراسىن جاريالاعان «Leman» جۋرنالىنىڭ ۇستىنەن تەرگەۋ باستالدى.

تاقىرىپقا تۇزدىق: بۇرىن مۇحاممەد پايعامباردى باتىستىق باسىلىمدار كەلەكەگە اينالدىرىپ، حالىقارالىق داۋ تۋدىرعان ەدى. بۇل جولى تۇرىكتەر بۇيرەكتەن سيراق شىعاردى.

قازىر ىستامبۇلدىڭ باس پروكۋراتۋراسى تۇرىكتىڭ تانىمال «Leman» ساتيريكالىق جۋرنالىنا قاتىستى تەرگەۋدى باستاعان. TRT تەلەارناسىنىڭ حابارلاۋىنشا، كاريكاتۋرانى سالعان اۆتور ۇستالعان. سونىمەن قاتار، ىستامبۇلدىڭ پروكۋراتۋراسى رەداكتسيانىڭ ءتورت قىزمەتكەرىن ۇستاۋعا سانكتسيا شىعارعان.

«ىستامبۇل باس پروكۋراتۋراسى تۇركيا قىلمىستىق كودەكسىنىڭ 216-بابىنا سايكەس، جۋرنالدا جاريالانعان مۇحاممەد پايعامباردىڭ كاريكاتۋراسىنا بايلانىستى دىنگە سەنۋشىلەردىڭ سەزىمدەرىن كوپشىلىك الدىندا قورلاۋ فاكتىسى بويىنشا سوت تەرگەۋىن باستادى. ەشقانداي ەركىندىك كيەلى ورىندار مەن تۇلعالاردى قورلاۋعا قۇقىق بەرمەيدى»، - دەپ مالىمدەدى «ح» الەۋمەتتىك جەلىسىندە تۇركيا ادىلەت مينيسترلىگىنىڭ باسشىسى يىلماز تۋنچ.

ول: «مۇحاممەد پايعامباردىڭ كاريكاتۋرالىق بەينەسى نەمەسە جالپى ونى بەينەلەۋ ارەكەتتەرى ءدىني قۇندىلىقتارعا عانا ەمەس، قوعامدىق تىنىشتىققا دا نۇقسان كەلتىرەدى»، - دەدى.

Abai.kz