كەشەلى-بەرى رەسەي اقپاراتتارى مەدينسكيدىڭ ماڭكىلىن جاپاتارماعاي جازىپ جاتىر. «باقساق – باقا ەكەن» دەگەندەي، جازعان-سىزعاندارىنا كوز جۇگىرتسەك، مەدينسكي بىزگە وكپەلى ەكەن. بىزگە دەگەنىڭىز – جالعىز قازاققا ەمەس، بۇرىنعى كسرو قۇرامىندا، رەسەي يمپەرياسى قۇرامىندا بولعان ەلدەرگە تۇگەل.

«رەسەيدى باعالامايسىڭدار. شاشىراپ جۇرگەن توبىر ەدىڭدەر، بىزگە قوسىلىپ مەملەكەت بولدىڭدار»، - دەگەنگە سايادى جالپى مازمۇنى.

مەدينسكي: «تمد ەلدەرىندە ورتاق وتكەن شاقتاعى رەسەيدىڭ ءرولىن جەتە باعالاماۋ بايقالادى. بۇل ساياسي تەحنولوگيا. تاريحي شىندىق – رەسەيدىڭ ءرولى وڭ بولعانىن كورسەتەدى. سوندىقتان تمد ەلدەرى وزىنە جانە ءوزىنىڭ وتكەن تاريحىنا ادال بولۋى كەرەك»، - دەپ كولگىرسي سويلەدى.

«رەسەي قۇرامىنا قوسىلعاننان كەيىن رەسەي يمپەرياسى كوپتەگەن حالىقتارعا ءوزىنىڭ ۇلتتىق بىرەگەيلىگىن، مادەنيەتىن، ءتىلىن، ءدىني نانىم-سەنىمدەرىن ساقتاپ قالۋعا ۇلكەن مۇمكىندىكتەر جاسادى. بۇل مۇمكىندىكتەر كەيىن كەلە ولاردىڭ مەملەكەتكە اينالۋىنا نەگىز بولدى. ايتپەسە، رەسەي قۇرامىنا قوسىلۋ نەگىزىنەن بەيبىت تۇردە جۇزگە استى. جانە نازار بۇراتىن ماڭىزدى جايت – رەسەي قۇرامىنا ولار مەملەكەت بولىپ قوسىلعان جوق. ەشقانداي مەملەكەت بولعان جوق، ولاردا. ولار حالىق بولىپ قوسىلدى»، - دەدى. بۇل دا «بىلگىش» مەدينسكيدىڭ ءبالدۋ-ءبالدۋى.

جالپى سوڭعى جىلدارى رەسەي تاريحشىلارى مەن ساياسي تۇلعالارى تاراپىنان «وتكەن تاريحقا» قاتىستى داۋلى مالىمدەمەلەر جاساۋ تەندەنتسياعا اينالىپ كەلەدى. بۇنداي ارانداتۋشى مالىمدەمەلەرگە قازاقستاننىڭ دا دەڭگەيلەس تۇلعالارى دەر كەزىندە جاۋاپ قايتارىپ وتىرۋى ادىلەتتى بولماق!

Abai.kz