ايگەرىم التىنبەك XI حالىقارالىق وپەرا انشىلەرىنە ارنالعان پورتوفينو بايقاۋىندا فينالعا ءوتتى. اتالعان بايقاۋ 2025 جىلدىڭ 22-27 شىلدە ارالىعىندا يتاليادا ءوتىپ جاتىر.

مادەنيەت جانە اقپارات مينيسترلىگىنىڭ مالىمەتىنشە، CLIP بايقاۋى العاش رەت 2015 جىلى ۇيىمداستىرىلىپ، 32 جاسقا دەيىنگى وپەرا انشىلەرى ءۇشىن ەڭ بەدەلدى حالىقارالىق دودالاردىڭ بىرىنە اينالدى. قازىلار القاسىنىڭ قۇرامىندا ميلان قالاسىنداعى «La Scala»، مونتە-كارلوداعى وپەرا، بۋەنوس-ايرەستەگى كولون تەاترى، مادريدتەگى كورول تەاترى، ۆيسبادەن مەملەكەتتىك تەاترى سىندى تانىمال تەاتر باسشىلارى بار.

قاتىسۋشىلار بىرنەشە كەزەڭنەن وتەدى. ەڭ اۋەلى قاتىسۋشىلار الدىن الا تىڭداۋدان وتەدى. كەيىن وركەستردىڭ سۇيەمەلدەۋىمەن Piazzetta di Portofino دەپ اتالاتىن پورتوفينونىڭ ورتالىق الاڭىندا وتەتىن فينالعا قاتىسادى. بۇل ءىس-شارا گالا-كونتسەرتپەن اياقتالادى.

ايگەرىم التىنبەك الەمنىڭ 50-گە جۋىق ەلىنەن كەلگەن 92 قاتىسۋشىنى باسىپ وزىپ، كلاسسيكالىق ۆوكال ونەرىندە قازاقستاننىڭ ورنىن ايشىقتاپ بەردى، - دەلىنگەن مينيسترلىك حابارلاماسىندا.

ايتا كەتەيىك، ايگەرىم التىنبەك كوپتەگەن حالىقارالىق بايقاۋلاردىڭ لاۋرەاتى اتانعان. بۇعان دەيىن ول يتاليادا وتكەن وپەرا انشىلەرى بايقاۋىنىڭ جەڭىمپازدارى قاتارىنان كورىنىپ، مودەنا قالاسىندا (يتاليا) وتكەن نيكولاي گياۋروۆ اتىنداعى حالىقارالىق وپەرا بايقاۋىندا ءۇشىنشى ورىندى يەلەندى. سونىمەن قاتار ول ايگىلى يتاليا وپەرا ءانشىسى ميرەللا فرەني اتىنداعى ارنايى ماراپاتتى جەڭىپ الدى. سونىمەن قاتار ءانشى ايگىلى «لا سكالا» تەاترىنىڭ جاستار باعدارلاماسىنا قاتىستى جانە الداعى ەكى جىل بويى سول جەردە ءبىلىم الادى. ال ماۋسىم ايىندا ول الەمدىك وپەرا جۇلدىزدارى حوسە كاررەراس جانە اندرەا بوچەلليمەن بىرگە ءبىر ساحنادا ونەر كورسەتتى.

Abai.kz