اۆستريانىڭ ەۋروپالىق جانە حالىقارالىق ىستەر جونىندەگى ءمينيسترى بەات ماينل-رايزينگەر اۆستريانىڭ اسكەري بەيتاراپتىعى ءوسىپ كەلە جاتقان قاۋىپ-قاتەر فونىندا ونىڭ قاۋىپسىزدىگىنە كەپىلدىك بەرمەيدى، اتاپ ايتقاندا اگرەسسور ەل رەسەيدەن قاۋىپ بار، سوندىقتان ەلدىڭ ناتو-عا كىرۋ مۇمكىندىگىن تالقىلاعان ءجون دەپ سانايدى.

بۇل تۋرالى ول 26 شىلدەدە جاريالانعان نەمىس Welt باسىلىمىنا بەرگەن سۇحباتىندا ايتتى. ماينل-رايزينگەر «قازىرگى ۋاقىتتا پارلامەنتتە نەمەسە تۇرعىندار اراسىندا اۆستريانىڭ اليانسقا مۇشە بولۋىن قولدايتىندار كوپ بولماسا دا، بۇل تاقىرىپتاعى پىكىرتالاس «ناتيجەلى بولۋى مۇمكىن»، ويتكەنى ءبىز اۆستريانىڭ قاۋىپسىزدىك جانە قورعانىس ساياساتىنىڭ بولاشاعى تۋرالى ايتىپ وتىرمىز» دەيدى.

ديپلومات جاھاندىق قاۋىپسىزدىك جاعدايى بارعان سايىن بەلگىسىز بولىپ بارا جاتقان ءارى «رەسەيدە اگرەسسيۆتى پيعىل ءورشىپ تۇرعان كەزدە» كەزكەلگەن ەل بەيتاراپتىقپەن ەمەس، «ءوزىنىڭ قورعانىس قابىلەتىنە جانە سەرىكتەستىككە ينۆەستيتسيا سالۋ ارقىلى» قاۋىپسىزدىگىن قامتاماسىز ەتەتىنىن اتاپ ءوتتى. ماينلي-رايزينگەردىڭ پىكىرىنشە، قازىرگى جاعدايدا ناتو-عا كىرۋ – تىلەك ەمەس، قاجەتتىلىك.

ول اۆستريا ەشكىمگە زيان تيگىزبەسە، وعان ەشكىم دە زيان تيگىزبەيدى دەپ قۇر قول قاراپ وتىرۋعا بولمايدى دەپ اتاپ ءوتتى. «بۇل اڭعالدىق بولار ەدى. الەم وزگەردى»، - دەدى ول. اۆستريا ءسىم باسشىسى 1995 جىلى ەۋروپالىق وداققا كىرگەننەن بەرى اۆستريانىڭ بەيتاراپتىعى ايتارلىقتاي وزگەرگەنىن، ويتكەنى ونىڭ جاۋىنگەرلەرى ەو-نىڭ «كوپتەگەن بىتىمگەرشىلىك ميسسيالارىنا» قاتىسقانىن، سونداي-اق ءوز ەلى «جالپى ەۋروپالىق قاۋىپسىزدىك پەن قورعانىس ساياساتىن – قارجىلىق، اسكەري جانە ساياسي جاعىنان قولداۋ ءۇشىن قولدان كەلگەننىڭ ءبارىن جاساپ جاتقانىن» اتاپ ءوتتى.

ەسكە سالايىق، 2022 جىلدىڭ 5 شىلدەسىندە ناتو-عا مۇشە مەملەكەتتەر فينليانديا مەن شۆەتسيا سىرتقى ىستەر مينيسترلەرىنىڭ قاتىسۋىمەن ەكى سولتۇستىك ەلدىڭ اليانسقا قوسىلۋى تۋرالى حاتتامالارعا رەسمي تۇردە قول قويدى.

قۇجاتقا ناتو-نىڭ بارلىق 30 ەلىنىڭ جانە شۆەتسيا مەن فينليانديانىڭ وكىلدەرى قول قويدى. ناتو باس حاتشىسى يەنس ستولتەنبەرگ پەن قۇجاتقا قول قويعان فينليانديا مەن شۆەتسيا سىرتقى ىستەر مينيسترلەرى ءوز سوزدەرىندە بۇگىنگى كۇندى «تاريحي» دەپ اتادى.

ولار ەكى ەلدىڭ اليانسقا قوسىلۋى ولاردىڭ قاۋىپسىزدىگىن نىعايتىپ قانا قويماي، جالپى ناتو قاۋىپسىزدىگىن دە نىعايتا تۇسەتىنىن اتاپ ءوتتى. وتىرىستا رەسەي تۋرالى تىكەلەي ايتىلماعانىمەن، بىراق ءداستۇرلى بەيتاراپ ەكى ەلدىڭ سولتۇستىك اتلانتيكالىق اليانسقا قوسىلۋ تۋرالى شەشىم قابىلداۋىنىڭ باستى دالەلى رەسەيدىڭ ۋكرايناعا باسىپ كىرۋى بولدى. ەندى رەسەي مەن سولتۇستىك اتلانتيكالىق اليانس اراسىنداعى شەكارا 1325 شاقىرىمعا ۇلعايدى.

كەرىمسال جۇباتقانوۆ، تاريح عىلىمدارىنىڭ كانديداتى، س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ دوتسەنتى

Abai.kz