ەڭ الىپ كومپانيالاردىڭ ءبىرى — Eurasian Resources Group (ERG) قازاقستان بيۋدجەتىنە 365 ملن دوللار ديۆيدەند تولەدى. ءدال وسىنداي جاڭالىقتى بۇگىن قارجى ءمينيسترى ءمادي تاكيەۆ ۇكىمەتتە وتكەن جيىندا مالىمدەدى.

Eurasian Resources Group (ERG) تابيعي رەسۋرستاردى ءوندىرۋ جانە قايتا وڭدەۋ سالاسىنداعى الەمدەگى ءىرى كومپانيالاردىڭ ءبىرى بولىپ تابىلادى. ERG-ءنىڭ باستى اكتسيونەرى (40%) — قازاقستان رەسپۋبليكاسىنىڭ ۇكىمەتى.

قارجى ءمينيسترى ءمادي تاكيەۆ ۇكىمەتتە وتكەن بريفينگتە:

«قازاقستان ERG-دەن 365 ملن دوللار ديۆيدەند الدى. بۇل قاراجات بۇرىن ليۋكسەمبۋرگتە توقتاتىلعان بولاتىن»، — دەپ حابارلاپ، وتكەن-كەتكەن جايلاردىڭ ءمان-جايىن اشىپ بەردى.

مينيستر ءسوزىن جالعاستىرىپ:

«بيىل ءبىز وتكەن جىلدارى 365 ملن دوللار ديۆيدەند الدىق. 2024 جىلدىڭ قورىتىندىسى بويىنشا قارجىلىق ەسەپتىلىك ەندى عانا اياقتالدى. ازىرگە ناتيجەلەردى كورگەن جوقپىن. اعىمداعى جىلدىڭ قورىتىندىسى بويىنشا كەلەسى جىلى قارايتىن بولامىز. بىراق وتكەن جىلدارى، 2021–2022 جىلدارى ءبىز ءوز اقشامىزدى الدىق. ولار بۇعاتتان شىعارىلدى»، — دەدى.

Eurasian Resources Group (ERG) كومپانياسىنىڭ قازاقستانداعى كاسىپكە ينۆەستيتسيا سالۋ باستاماسىنا ناقتى دالەل رەتىندە ەلىمىزدە قاراعاندى وڭىرىندە اشىلعان كوكس-حيميالىق زاۋىتتى مىسال ەتىپ الۋعا بولادى.

ەلىمىزدە اشىلعان كوكس ءوندىرىسىنىڭ الەۋەتى تۋرالى ERG ديرەكتورلار كەڭەسىنىڭ توراعاسى شۋحرات يبراگيموۆ بىلاي دەدى:

«ەلىمىز وسىعان دەيىن وندىرىسكە قاجەتتى كوكستى شەتەلدەن يمپورتتاپ كەلسە، ەندى شۇباركول كومىرى بازاسىندا اشىلعان حيميالىق زاۋىت ەلىمىزدەگى كوكس-حيميالىق ونىمگە قاتىستى يمپورتقا تاۋەلدىلىكتەن قۇتقاراتىن بولادى. اسىرەسە ERG-ءدىڭ بارلىق كاسىپورىندارىنا قاجەتتى كوكس-حيميالىق ءونىمدى ءوزىمىزدىڭ زاۋىت ءوندىرىپ شىعاراتىن بولادى. بولاشاقتا قازاقستاندىق كوكس-حيميالىق ءونىمدى شەتەلگە دە ەكسپورتتاۋ جوسپارىمىزدا بار»، — دەدى.

بۇرىن ەلىمىزگە بەرۋدەن گورى الۋدى باستى ورىنعا قويعان ERG ديرەكتورلار كەڭەسىنىڭ ەسكى باسشىلارى اۋىسىپ، تىزگىندى شۋحرات يبراگيموۆ قولعا العاننان بەرى بۇرىنعى، تەك پايدانى ويلاعان تىرلىك مۇلدەم وزگەردى دەۋگە بولادى. جاڭا باس ديرەكتور ينۆەستيتسيانى تەك قازاقستانعا سالامىن دەپ، وزگە بيزنەسمەندەرگە ۇلگى كورسەتتى. سونىمەن، «ساباقتى ينە ساتىمەن» دەگەندەي، وتاندىق كاسىپكەرلەرگە اقشاسىن شەتەلگە شاشپاي، ەلىمىزدىڭ يگىلىگىنە جۇمساۋ ءداۋىرىنىڭ داۋىلپازى بولا ءبىلدى.

ERG — قازاقستان ەكونوميكاسىنداعى ەڭ ءىرى كومپانيالاردىڭ ءبىرى. جالپى، ERG-دە 60 مىڭنان استام ادام جۇمىس ىستەيدى. كومپانيا ەلىمىزدىڭ بيۋدجەتىن تولىقتىرىپ قانا قويماي، ءوز قاراماعىنداعى ءاربىر جۇمىسشىعا قولايلىلىق جاساۋ مەن كاسىپكەرلىكتى دامىتۋعا باسىمدىق بەرەدى. ERG-ءنىڭ قازاقستان ەكونوميكاسىنا قوسىپ وتىرعان ۇلەسى مەن وتاندىق ينۆەستيتسياعا بەت بۇرۋى — ەل يگىلىگى ءۇشىن جاسالىپ جاتقان ماڭىزدى قادام. كومپانيانىڭ ۇلتتىق دامۋ مەن جۇمىسپەن قامتۋدى قولدايتىن ۇستانىمى — ەلىمىزدەگى ءىرى بيزنەس ءۇشىن ۇلگى بولا الادى.

Abai.kz