قازاقستاندا اقپاراتتىق قاۋىپسىزدىكتى نىعايتۋ باعىتىنداعى جۇمىس جالعاسۋدا. وسى ستراتەگيا اياسىندا ەلدىڭ قارۋلى كۇشتەرى قىزمەتتىك مالىمەتتەردى جىبەرۋ ءۇشىن وتاندىق Aitu مەسسەندجەرىنە كەزەڭ-كەزەڭمەن كوشۋدى باستايدى. مەملەكەت باسشىسىنىڭ تاپسىرماسىمەن قابىلدانعان بۇل شەشىم شەتەلدىك پلاتفورمالاردى پايدالانعان كەزدەگى تاۋەكەلدەردى ازايتۋعا باعىتتالعان.

وتاندىق مەسسەندجەرگە كوشۋ – مەملەكەتتىك قۇرىلىمداردا، ونىڭ ىشىندە قورعانىس سالاسىندا دا قىزمەتتىك اقپاراتتى قورعاۋ دەڭگەيىن ارتتىرۋ بويىنشا نەگىزگى قادامداردىڭ ءبىرى. بۇعان دەيىن دەرەكتەردى جىبەرۋ ءۇشىن كوبىنەسە شەتەلدىك مەسسەندجەرلەر قولدانىلىپ كەلگەن. بۇل ءوز كەزەگىندە قاۋىپسىزدىككە بەلگىلى ءبىر قاتەر ءتوندىرۋى مۇمكىن ەدى. قازاقستان يۋريسديكتسياسىندا ورنالاسقان جانە دەرەكتەردى ساقتاۋ مەن وڭدەۋ تالاپتارىنا تولىق ساي كەلەتىن Aitu مەسسەندجەرىن پايدالانۋ اقپارات اعىنىن تولىق باقىلاۋعا مۇمكىندىك بەرەدى.

قازاقستان رەسپۋبليكاسىنىڭ قورعانىس ءمينيسترى اۆياتسيا گەنەرال-لەيتەنانتى داۋرەن كوسانوۆ قر قارۋلى كۇشتەرىنىڭ بارلىق بولىمشەلەرىن Aitu مەسسەندجەرىنە كەزەڭ-كەزەڭمەن كوشىرۋدى تاپسىردى.

كوشۋ پروتسەسى 2025 جىلدىڭ سوڭىنا دەيىن اياقتالادى. بۇل رەتتە ارميانىڭ ۇيىمدىق-شتاتتىق قۇرىلىمى مەن قولدانىستاعى بايلانىس ارنالارى ەسكەرىلەدى. مۇنداي ءتاسىل قىزمەتتىك پروتسەستى بۇزباي، جۇيەلى ءارى بىرتىندەپ ينتەگراتسيانى قامتاماسىز ەتەدى.

– ۇلتتىق IT-ونىمدەردى قولدانۋ – تسيفرلىق كەڭىستىكتەگى دەربەستىكتى قورعاۋعا باعىتتالعان جاھاندىق ءۇردىس. قارۋلى كۇشتەردىڭ Aitu مەسسەندجەرىنە كوشۋى قىزمەتتىك دەرەكتەردىڭ سىرتقا تارالۋىن بولدىرماي، قىزمەتتىك ماقساتتاعى اقپاراتتى ءتيىستى دەڭگەيدە قورعاۋعا مۇمكىندىك بەرەدى، – دەپ اتاپ ءوتتى قورعانىس ءمينيسترىنىڭ تسيفرلاندىرۋ جونىندەگى ورىنباسارى دارحان احمەديەۆ.

جاڭا مەسسەندجەر كەڭ اۋقىمدى مىندەتتەردى شەشۋ ءۇشىن قولدانىلاتىن بولادى. ونىڭ ىشىندە جەدەل اقپارات الماسۋدان باستاپ، جينالىستار وتكىزۋ مەن ءىس-قيمىلداردى ۇيلەستىرۋ شارالارى دا بار. بۇل قاۋىپسىزدىك دەڭگەيىن ارتتىرىپ قانا قويماي، ىشكى كوممۋنيكاتسيانى دا وڭتايلاندىرۋعا مۇمكىندىك بەرەدى.

Abai.kz