اۆياتسيا گەنەرال-لەيتەنانتى داۋرەن قوسانوۆ جۇمىس ساپارىمەن اباي وبلىسىندا ورنالاسقان اسكەري بولىمدەرگە باردى. ساپار ماقساتى - اسكەري بولىمدەردىڭ جاۋىنگەرلىك ازىرلىگىن تەكسەرۋ جانە جەكە قۇرامنىڭ قىزمەت ەتۋ جاعدايىمەن تانىسۋ.

سەمەي قالاسىندا قورعانىس ءمينيسترى گارنيزونداعى اسكەري بولىمدەردىڭ باسشىلىق قۇرامىمەن، اباي وبلىسىنىڭ اكىمى بەرىك ۋاليمەن، ارداگەرلەر كەڭەسىنىڭ وكىلدەرىمەن جانە «سەمەي ينجينيرينگ» اق باسشىلىعىمەن كەزدەستى.

اۆياتسيا گەنەرال-لەيتەنانتى داۋرەن قوسانوۆ جاۋىنگەرلىك دايارلىقتىڭ جوعارى دەڭگەيىن ساقتاۋ، جەكە قۇرامنىڭ تاكتيكالىق شەبەرلىگىن جەتىلدىرۋ، اسكەري تەحنيكانىڭ جارامدىلىعىن قامتاماسىز ەتۋ جانە دالالىق وقۋ-جاتتىعۋلاردى ودان ءارى دامىتۋ بويىنشا ناقتى تاپسىرمالار بەردى. اسكەريلەردىڭ الەۋمەتتىك-تۇرمىستىق جاعدايلارىنا ەرەكشە كوڭىل ءبولىندى. اتاپ ايتقاندا تاماقتانۋ ساپاسى، جاتاقحانا جايلىلىعى، مەديتسينالىق قىزمەت كورسەتۋ جانە اسكەري قىزمەتشىلەردىڭ وتباسىلارىنا كورسەتىلەتىن قولداۋ شارالارى بار.

مينيستر سونداي-اق اسكەري قىزمەتشىلەردىڭ زاماناۋي بايلانىس قۇرالدارىمەن، ۇشقىشسىز ۇشۋ اپپاراتتارىمەن جانە تسيفرلىق باسقارۋ جۇيەلەرىمەن جۇمىس ىستەۋ دايىندىعىن كۇشەيتۋدى تاپسىردى. ول جاستاردى وتانعا ادالدىق رۋحىندا تاربيەلەۋدىڭ، ارداگەرلەرمەن تۇراقتى كەزدەسۋلەر وتكىزۋدىڭ، قوعاممەن اشىق بايلانىستىڭ جانە مادەني-سپورتتىق ءىس-شارالارعا قاتىسۋدىڭ ماڭىزدىلىعىن اتاپ ءوتتى.

اباي وبلىسىنىڭ اكىمى بەرىك ۋاليمەن كەزدەسۋدە گارنيزونداردا ورنالاسقان اسكەري بولىمدەردىڭ ينفراقۇرىلىمىن دامىتۋ، جەرگىلىكتى اتقارۋشى ورگاندار مەن قورعانىس مينيسترلىگى اراسىنداعى جۇمىلدىرۋ دايىندىعى سالاسىنداعى ءوزارا ءىس-قيمىل، سونداي-اق اسكەري قىزمەتشىلەردىڭ وتباسى مۇشەلەرىن جۇمىسقا ورنالاستىرۋ جانە باسقا دا الەۋمەتتىك كەپىلدىك ماسەلەلەرى تالقىلاندى.

ارداگەرلەر ۇيىمىنىڭ وكىلدەرىمەن وتكەن اشىق ديالوگ بارىسىندا تالىمگەرلىك، مەرزىمدى قىزمەتتەگى ساربازدارمەن، مەكتەپ پەن كوللەدج وقۋشىلارىمەن اسكەري-پاتريوتتىق جۇمىس، اسكەري داستۇرلەردى ساقتاۋ ماسەلەلەرى قوزعالدى.

قورعانىس ءمينيسترى اسكەري زەينەتكەرلەردىڭ الەۋمەتتىك قورعالۋى، مەديتسينالىق قىزمەتى، ساناتورلىق-كۋرورتتىق ەمدەلۋ جانە باسقا دا جەڭىلدىكتەرگە قاتىستى سۇراقتارىنا جاۋاپ بەردى.

ارداگەرلەرگە ارناعان سوزىندە مينيستر ولاردىڭ ارميانى قالىپتاستىرۋ مەن نىعايتۋداعى ەرەكشە ءرولىن اتاپ ءوتتى:
«سىزدەر ەلىمىزدىڭ قورعانىس قابىلەتىن نىعايتۋعا ولشەۋسىز ۇلەس قوستىڭىزدار. ءومىر جولدارىڭىز ساربازدار ءۇشىن تاربيە مەكتەبى، قازىرگى ۇرپاق ءۇشىن ۇلگى. اسكەري قىزمەتتىڭ ماڭىزىن جانە وتاندى قورعاۋ قاسيەتتى بورىش ەكەنىن جاستارعا سىزدەردەن ارتىق جەتكىزە الاتىن ەشكىم جوق»، – دەدى ول.

ساپار اياسىندا اۆياتسيا گەنەرال-لەيتەنانتى داۋرەن قوسانوۆ «سەمەي ينجينيرينگ» اكتسيونەرلىك قوعامىنا دا بارىپ، كاسىپورىن باسشىلىعىمەن كەزدەستى. وندىرىستىك قۋاتتارمەن جانە قورعانىس پەن ازاماتتىق ماقساتتاعى ونىمدەردى ازىرلەۋ، ءوندىرۋ، جوندەۋ جانە قىزمەت كورسەتۋگە ماماندانعان زاۋىتتىڭ دامۋ پەرسپەكتيۆالارىمەن تانىستى. اتالعان كاسىپورىن قارۋلى كۇشتەردى قامتاماسىز ەتۋدە ماڭىزدى ءرول اتقارادى.
سەمەي قالاسىندا قورعانىس ءمينيسترى گارنيزونداعى اسكەري بولىمدەردىڭ باسشىلىق قۇرامىمەن، اباي وبلىسىنىڭ اكىمى بەرىك ۋاليمەن، ارداگەرلەر كەڭەسىنىڭ وكىلدەرىمەن جانە «سەمەي ينجينيرينگ» اق باسشىلىعىمەن كەزدەستى.

Abai.kz