مەملەكەت باسشىسى قاسىم-جومارت توقاەۆ 8 قىركۇيەك كۇنى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالايدى.

بۇل تۋرالى قر پارلامەنتى ءماجىلىسىنىڭ تەلەگرام ارناسى حابارلادى.

قازاقستان بيىلعى ساياسي ماۋسىمدى 8-ءشى قىركۇيەكتەن باستاپ اشاتىن بولدى. سول كۇنى مەملەكەت باسشىسى قاسىم-جومارت توقاەۆ ءداستۇرلى جولداۋ اياسىندا اتقارۋشى اپپاراتقا جاڭا تاپسىرمالار بەرىپ، بۇعان دەيىن ىستەلگەن جۇمىستىڭ قورىتىندىسىن شىعارماق.

بۇگىن ۇكىمەت بيۋدجەتتىك جۇمىستاردى پىسىقتاپ تاستادى. ال اكىمدەر جىلۋ ماۋسىمىنا دايىندىق جانە جول-كولىك ينفراقۇرىلىمى جۇمىستارىن تەزدەتىپ جاتىر.

بيىلعى جولداۋ الەۋمەتتىك بلوكتا تابىس پەن ينفلياتسيا اراسىنداعى ايىرماشىلىقتى جابۋ، كرەديت قىسىمىن ازايتۋ، ساياسي رەفورمالار اياسىندا جەرگىلىكتى باسقارۋدى ودان ءارى كۇشەيتۋگە باعىتتالاتىنى انىق. ەكونوميكادا جاڭا يندۋستريالاندىرۋدىڭ ەكىنشى تولقىنى بويىنشا تاپسىرما بەرىلمەك. اسىرەسە لوگيستيكا، ترانزيت، قويمالار مەن وندىرىسكە شەتەلدىك ينۆەستيتسيالاردى كوبىرەك تارتۋ مىندەتتەلەدى دەپ كۇتىلۋدە.

Abai.kz