قىتايداعى اسكەري پارادتى كورۋگە جۇرت قاتارلى سولتۇستىك كورەيدىڭ باسشىسى كيم شەن ىن دا قىزى كيم شىجۋ ە-ءنى ەرتىپ باردى. ال الەمدىك باق نازارى شي، كيم مەن پۋتين ۇشتىگىنە اۋدى.

الەمدىك باق: «بۇل ۇشتىكتىڭ بەيجىڭدەگى اسكەري پارادتا باسقوسۋى - باتىسقا قارسى كۇش بىرىكتىرۋگە ماقۇل ەكەنىن دەمونستراتسيالاعانى»، - دەپ جازۋدا.

«The New Statesman» باسىلىمى: «پۋتين، شي مەن كيم جاڭا الەمدىك ءتارتىپ جاساماق. بارلىق ەلدىڭ ديكتاتورلارى بىرىگىڭدەر»، - دەپ جازدى.

ال «The New York Times» باسىلىمى: «پارادقا پۋتين مىرزانىڭ قاتىسۋى رەسەي مەن قىتايدىڭ تاريحي مۇددەلەرىن كەلىسۋگە دەگەن ۇمتىلىسىن بىلدىرەدى. ولار ەكىنشى دۇنيەجۇزىلىك سوعىستى – وسى ماقساتتا ءوز ەلدەرىنىڭ قانداي قۇرباندىقتارعا بارا الاتىنىن كورسەتۋ ءۇشىن پايدالانۋدا»، - دەپ جازدى.

ايگىلى «Bloomberg» بولسا: «ءبىر جاعىنا ءپۋتيندى، ءبىر جاعىنا كيمدى جانە قاستارىنا پەزەشكياندى تۇرعىزىپ قويعان ءشيدىڭ وبرازى – «تۇراقسىزدار بىرلىگىن» كورسەتەدى. ولاردىڭ بۇل كواليتسياسى – اقش دومينانت كۇشكە يە الەمدە جاڭا ءتارتىپ ورناتۋدى قالايتىن تۇراقسىز كواليتسيانى كورسەتەدى»، - دەپ جازدى.

اتالعان باسقوسۋدا بىرنەشە ماڭىزدى كەزدەسۋ ءوتىپ، ءبىرسىپىرا ماڭىزدى مالىمدەمەلەر ايتىلدى. ەندى سولارعا شولۋ جاسايىق...

پۋتين مەن كيم

رەسەيباسى پۋتينمەن كەزدەسۋ وتكىزگەن كيم شەن ىن: «سولتۇستىك كورەي رەسەيگە كومەكتەسۋى كەرەك بولسا، دەمەك، ءبىز ءسوزسىز ول كومەكتى اياپ قالمايمىز. ويتكەنى ءبىزدىڭ كومەگىمىز باۋىردىڭ باۋىرعا دەگەن كومەگى»، - دەدى.

ال پۋتين: «سولتۇستىك كورەي ساربازدارىنىڭ كۋرسكىنى ازات ەتۋگە قاتىسۋى – نەوناتسيزيممەن كۇرەسكە قوسقان ولشەۋسىز ۇلەس»، - دەپ لەپىردى.

وڭتۇستىك كورەي بارلاۋى كحرد جۋىردا رەسەيگە كومەككە تاعى 6 مىڭ ساربازىن جىبەرۋدى جوسپارلاپ وتىرعانىن ايتادى. ال جۋىردا 1 مىڭ ساپەر جىبەرگەن.

سولتۇستىك كورەي بىلتىرعى جىلدىڭ قازان ايىنان بەرى رەسەيگە ۇزىن-ىرعاسى 13 مىڭ سارباز كومەككە جىبەرىلگەنى ايتىلادى. ولار كۋرسكىنى ۋكراينادان ازات ەتۋگە قاتىستى. قازىر كحدر اسكەرىنىڭ دەنى تىلدا ورنالاستىرىلعان دەيدى.

شي مەن ترامپ

ال ترامپ شي توراعاعا ارناپ ءۇشبۋ حات جازىپتى (الەۋمەتتىك جەلىدە). بۇيدەيدى:

«باستى سۇراق – قىتاي توراعاسى شي جيپيڭ قىتايدىڭ باسقىنشى جاۋمەن كۇرەستە ازاتتىققا قول جەتكىزۋىنە قوسقان اقش-تىڭ وراسان زور ۇلەسىن اتاپ ايتا ما، جوق پا؟ سول سوعىستا قىتايدىڭ جەڭىسى جولىندا كوپتەگەن امەريكالىق قازا تاپتى. ولاردىڭ سول ەرجۇرەكتىگىننە لايىقتى قۇرمەت كورسەتىلىپ، ەسكە الىنادى دەپ ۇمىتتەنەمىن. شي توراعا، سەندەر اقش-قا قارسى استىرتىن ءسوز بايلاسىپ جاتقان جەردەن، ۆلاديمير پۋتين مەن كيم شەن ىنعا مەنىڭ ىستىق سالەمىمدى جەتكىزىڭىز!»، - دەدى پرەزيدەنت ترامپ.

ال قىتاي وسى جولى اسكەري پارادتا يادرولىق ترياداسىن الىپ ءجۇردى. قاراڭىز:

اۋەدەن ۇشىرىلاتىن يادرولىق وقتۇمسىقتى «تسزينلەي-1» زىمىراندارى، سۇڭگۋىر قايىقتاردان ۇشىرىلاتىن قۇرلىقارالىق بالليستيكالىق «دجۋلانگ-3» زىمىراندارى، قۇرلىقارالىق بالليستيكالىق «دۋنفەن-61» جانە «دۋنفەن-31» زىمىراندارى كولوننا بولىپ ءوتتى.

سونىمەن قاتار، بەيجىڭ ستراتەگيالىق قاۋىپسىزدىكتى قامتاماسىز ەتۋدىڭ ماڭىزدى قۇرالى رەتىندە پوزيتسيالايتىن تۇتاس پلانەتانى جويۋعا قابىلەتتى دەپ سيپاتتالاتىن «DF-5C» ستراتەگيالىق قۇرلىقارالىق يادرولىق زىمىرانى ساپ تۇزەلدى.

ترامپ پەن پۋتين

ايتپاقشى، پرەزيدەنت ترامپتىڭ رەسەيباسى پۋتينگە قويعان ۋلتيماتۋمىنىڭ مەرزىمى اياقتالدى. ۋاشيڭتون ازىرگە بۇل جايىندا ءۇنسىز. ترامپ الگىندە تەپسىنىپ تۇرىپ، «پۋتينگە كەلىسسوز ۇستەلىنە وتىرۋعا پالەنشە ۋاقىت بەرەمىن» دەگەن ەدى.

وسىلايشا، الەمدىك گەوساياسي اتموسفەرا الاعاي دا بۇلاعاي بولىپ تۇر...

Abai.kz