پرەزيدەنت جولداۋىنداعى تاپسىرمالاردى ورىنداۋ اياسىندا ەلىمىزدە IT-تەحنولوگيالاردى پايدالانۋ ارقىلى ازاماتتارعا ارنالعان تسيفرلىق قىزمەتتەر كەڭەيىپ كەلەدى.  

G2C (ازاماتتارعا ارنالعان مەملەكەت) فورماتىنداعى سەرۆيستەر مەملەكەتتىك قىزمەتتەردى جەدەل، اشىق ءارى قولجەتىمدى ەتۋگە جول اشتى، دەپ جازادى inbusiness.kz سايتى. 

قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتىنشە، مەديتسينالىق انىقتامالار مەن ەڭبەككە ۋاقىتشا جارامسىزدىق پاراقتارىن تسيفرلاندىرۋ كولەڭكەلى ەكونوميكانى 7,5 ملرد تەڭگەگە قىسقارتىپ، بيۋدجەتكە 450 ملن تەڭگە ۇنەم اكەلدى. ال 1,5 ملن قىزمەتتى قامتيتىن تەلەمەديتسينا سەرۆيسى قاشىقتان كەڭەس بەرىپ، دياگنوستيكا جاساۋعا مۇمكىندىك بەرىپ، حالىقتىڭ 13 ملرد تەڭگەدەن استام قارجىسىن ۇنەمدەۋگە ىقپال ەتتى.

ءبىلىم بەرۋ سالاسىندا دا وڭ وزگەرىستەر بار: بالاباقشا مەن مەكتەپكە قابىلداۋ، جوو-عا ءتۇسۋ جانە جاتاقحاناعا ورنالاستىرۋ پروتسەستەرى تولىق ونلاين فورماتقا كوشتى. ەندى بىرىڭعاي سەرۆيس ارقىلى قۇجات تاپسىرىپ، ەمحاناعا تىركەلىپ، اسكەري ەسەپكە تۇرۋعا نەمەسە جاتاقحانادان ورىن الۋعا بولادى. ۇبت ناتيجەسىنىڭ ەلەكتروندى سەرتيفيكاتى ەنگىزىلىپ، بيۋدجەت شىعىنى 83 ملن تەڭگەگە قىسقارىپ، ازاماتتار شىعىنى 300 ملن تەڭگەدەن استام سوماعا ازايدى.

الەۋمەتتىك سالادا "الەۋمەتتىك ءاميان" جوباسى ىسكە قوسىلىپ، مەكتەپ وقۋشىلارىنا تەگىن تاماق بەرۋ پروتسەسى تولىق باقىلاۋعا الىندى. بۇل باستاما بيۋدجەت قارجىسىن ءتيىمدى جۇمساۋعا جول اشىپ، الداعى ۋاقىتتا ەلىمىزدەگى بارلىق مەكتەپتەردە جۇزەگە اسىرىلماق.

"الەۋمەتتىك ءاميان ارقىلى تەگىن تاماق بەرۋ پروتسەسى باقىلاۋعا الىندى. جوبا بيۋدجەت قاراجاتىن ۇنەمدەپ، ءتيىمدى پايدالانۋعا مۇمكىندىك بەردى. قازىر ول بارلىق مەكتەپتەردە ەنگىزىلۋدە", – دەدى ءتسدياوم باسشىسى جاسلان ماديەۆ.

Abai.kz