كىمگە سەنەرىن بىلمەيتىن ەلمىز!

كەشە ەلى ءىشى (سىرتى دا) ءبىر دۇرلىكتى: جوعارى لاۋازىمدى، پرەزيدەنتكە ءبىر تابان جاقىن تۇلعا مەن سول ماڭايدان تابىلىپ جۇرگەن كاسىپكەردىڭ تۇتقىندالعانى تۋرالى اقپارات جارق ەتە قالدى. جانە دە ول حابار اناۋ-مىناۋ ەمەس، رەسمي تىركەلگەن، وقىرمانعا ءبىرشاما تانىس باق-تا جارىق كوردى. باسقاسىن ايتپاعاندا، WhatSapp پەن TikTok, Instagram-نىڭ الىپ-قاشپا اقپاراتىنىڭ وزىنە يمانداي سەنىپ جۇرگەن ەل بۇل جاڭالىققا قالاي سەنبەسىن؟!

بىرەر ساعاتتان سوڭ بىرقاتار رەسمي ورگاندار بۇل اقپاراتتى جوققا شىعاردى.

بۇگىن بولسا، حاباردى العاش تاراتقان باق ايتقانىنان قايتپاي، ەلدى دۇرلىكتىرگەن اقپاراتتى سايتىنان الماي وتىر. ياعني، تارتىس اياقتالعان جوق.

مۇنىڭ ءبارى بيلىك ىشىندەگى كالانارالىق تارتىستىڭ جارقىن كورىنىسى ەكەنىن ساياساتتانۋ فاكۋلتەتىنىڭ ءبىرىنشى كۋرسىنىڭ ستۋدەنتىنەن باستاپ، ءبارى دە بىلەدى. ول جاعىن تاراتپاي-اق قويايىن (ول تۋرالى ايتىپ تا، جازىپ تا كەلەمىز). تەك بۇل باقتالاس، تاقتالاس مەملەكەتىمىزدىڭ تاۋەلسىزدىگى مەن تۇراقتىلىعىنا، جەر تۇتاستىعىنا زالال كەلتىرمەسە دەپ ويلايسىڭ.

مەنىڭ ايتايىن دەگەنىم باسقا نارسە.

بىزدە قوعام سەنەتىن اقپارات كوزى بار ما؟

مەملەكەتتىك ورگاندار مەن رەسمي باق جۇيەسىنە جۇرت قۇلاي سەنە مە؟

جوق! ويتكەنى ولار قوعامدا بولىپ جاتقان ءارتۇرلى، سونىڭ ىشىندە بيلىككە جاقپايتىن جايتتاردى جازىپ-كورسەتۋگە نيەتتى ەمەس، ولار تاراتىپ جۇرگەن اقپارات اعىنى بىرجاقتى. ول تەرىس ءۇردىس ەسكى قازاقستاندا بولعان، جاڭا قازاقستان دا سول سۇرلەۋمەن جۇرۋگە داعدىلانا باستاعان سىڭايلى.

جانە دە بىزدە مەملەكەتتىك ورگاندار مەن جەكە شەنەۋنىكتەر بەلگىلى ءبىر كلاننىڭ قاراۋىندا ەكەنى بەلگىلى. اركىم ءوز كلانىنىڭ اتىن شاقىرادى، سونىڭ سويىلىن سوعادى. 2029 جىل جاقىنداعان سايىن، بۇل تەندەنتسيا كۇشەيە بەرمەك. جاسان ايتپاي جاقسى جوق (بەتىن اۋلاق قىلسىن!) كۇنى ەرتەڭ ءبىر مينيستر اقپارات تاراتىپ، ەكىنشى مينيستر ونى جوققا شىعاراتىن جاعدايعا تاپ بولۋىمىز ابدەن ىقتيمال! سوندا اڭتارىلعان ەل كىمگە سەنبەك؟!

ءوزىن تاۋەلسىز دەپ اتايتىن، ءىس جۇزىندە ناقتى كلاندار مەن توپتاردىڭ اقپاراتتىق قۇلى بوپ جۇرگەن باق-تارعا ما؟ ءيا، ولاردىڭ ىشىندە بيلىككە قاتتى-قاتتى سىن ايتىپ، بيلىككە نارازى اۋديتوريا الدىندا بەدەل جيناپ جۇرگەندەرى بارشىلىق. بىراق، «مۋزىكاعا كىم تاپسىرىس بەرەدى، قىزدى سول بيلەيدى» دەمەكشى، ولاردىڭ دا شىندىعى جارتىكەش، قۇرىلتايشىلارىنىڭ تاپسىرىسىنان اسىپ كەتە المايدى. جەمە-جەمگە كەلگەندە ولار ءوز قوجايىندارىنىڭ ايتقانىنان شىعا المايدى.

وسى ورايدا ەلىمىزدىڭ اقپارات ايدىنىندا شالقىپ جۇرگەن رەسەيلىك باق جۇيەسى تۋرالى دا قاتتى ويلانۋىمىز كەرەك! ءبىر كۇنى ولار ەلدىڭ ساياسي ومىرىنە قاتىستى، وزدەرىنە قاجەت، بىزگە زياندى اقپارات تاراتسا شە؟ كۇنى-ءتۇنى سولاردان كوز اشپاي، سولارعا سەنىپ قالعان ءجۇرت نە ويلاپ، نە ىستەمەك؟!

ارينە، مەملەكەتتىك باق جۇيەسىنە شىعارماشىلىق ەركىندىك ۇسىنىپ، قيىن تاقىرىپتار مەن ءارتۇرلى الىپ-قاشپا اڭگىمەلەردى اشىق تا قوعام وكىلدەرىنىڭ قاتىسۋىمەن تالقىلاۋعا مۇمكىندىك بەرىپ، ولاردى ناقتى كلاندار ىقپالىنان بوساتىپ، باتىل قادامدار جاسالسا، جۇرتتىڭ ول جۇيەگە دەگەن سەنىمى قالپىنا كەلەر ەدى. بىراق، قايدام، قازىرگى بيلىك ءدال سونداي ارەكەتكە بارادى دەپ ايتا المايمىن.

ولاي بولسا، ىشكى جانە سىرتقى قاۋىپ-قاتەرلەردىڭ الدىن الۋ ءۇشىن ەلىمىزدە وبەكتيۆتى دە جان-جاقتى اقپارات بەرە الاتىن، قوعامنىڭ ءوزى قۇرىلتايشى بولاتىن باق جۇيەسى قاجەت-اق!

قازاق ەلىنىڭ اقپاراتتىق بوستاندىعى مەن قاۋىپسىزدىگى قاتار جۇرەتىنىن ەندى عانا تۇسىنە باستاعان سياقتمىمىز با، قالاي؟

PS. ءبىر قىزىعى پرەزيدەنتتىڭ ءوزى ءالى دە ءۇنسىز. ماڭايىنداعى سارىشاياندار ءبىر-ءبىرىن تالاپ، جەپ جاتقانىن ول كىسى بىلمەيدى ەمەس، بىلەدى دەپ ويلايمىن.

ءامىرجان قوسان

Abai.kz