بۇگىن الماتىدا مەملەكەتتىك كەڭەسشى ەرلان قاريننىڭ توراعالىق ەتۋىمەن «قازاقستان تاريحى: ەجەلگى داۋىردەن بۇگىنگە دەيىن» اتتى جەتى تومدىق اكادەميالىق باسىلىمدى ازىرلەۋگە قاتىستى رەداكتسيا القاسىنىڭ كەزەكتى وتىرىسى ءوتتى.

رەداكتسيا القاسى جالپى داۋىس بەرۋ ارقىلى ودان ءارى باسپاعا دايىنداۋ ءۇشىن باسىلىمنىڭ ەكىنشى تومىنىڭ قولجازباسىن بەكىتۋ تۋرالى شەشىم قابىلدادى. سونداي-اق جەتى تومدىق ەڭبەكتىڭ ءۇشىنشى تومىنىڭ مازمۇنىن تالقىلادى.

اۆتورلار ۇجىمىنىڭ جەتەكشىسى، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى ايماقتانۋ كافەدراسىنىڭ پروفەسسورى، تاريح عىلىمدارىنىڭ دوكتورى ايبولات كوشكىمباەۆ باسىلىمنىڭ تۇجىرىمداماسى، مازمۇنى جانە قۇرىلىمى جونىندە بايانداما جاساپ، «التىن وردا» دەپ اتالاتىن ءۇشىنشى تومنىڭ ەرەكشەلىكتەرى مەن جاڭالىعىن اتاپ ءوتتى. ش.ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ باس ديرەكتورى، ۇلتتىق عىلىم اكادەمياسىنىڭ اكادەميگى زيابەك قابىلدينوۆ، مەملەكەت تاريحى ينستيتۋتى ديرەكتورىنىڭ ورىنباسارى، تاريح عىلىمدارىنىڭ دوكتورى، پروفەسسور بۇركىتباي اياعان، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى، تاريح عىلىمدارىنىڭ دوكتورى بەرەكەت كارىباەۆ پىكىر ءبىلدىردى.

سونداي-اق رەداكتسيا القاسىنىڭ مۇرات ءابدىروۆ، گالينا كسەنجيك، راديك تەمىرعاليەۆ، كەنجەحان ماتىجانوۆ، ديحان قامزابەكۇلى، ايدوس سارىم، حانكەلدى ءابجانوۆ، مامبەت قويگەلديەۆ، مەرۋەرت ابۋسەيىتوۆا، ايگۇل سادۋاقاسوۆا، بولات كومەكوۆ، اقان وڭعار، جاقسىلىق ءسابيتوۆ سەكىلدى وزگە دە مۇشەلەرى ءوز ويلارىن ورتاعا سالدى.

جيىن سوڭىندا رەداكتسيا القاسى ءۇشىنشى تومدى جەتىلدىرۋ جۇمىستارىن جالعاستىرۋ جانە كەلەسى وتىرىستا «قازاقستان تاريحى: ەجەلگى داۋىردەن بۇگىنگە دەيىن» اتتى اكادەميالىق باسىلىمنىڭ ءتورتىنشى تومىن قاراستىرۋ جونىندە شەشىم قابىلدادى.

سۋرەت: akorda.kz سايتىنان الىندى.

Abai.kz